സോഷ്യൽ മീഡിയയിൽ ഇപ്പോൾ ഒരു യുവതിയുടെ ഞെട്ടിക്കുന്ന വെളിപ്പെടുത്തലാണ് ചർച്ചയാകുന്നത്. തന്റെ ഏഴ് വയസ്സുകാരിയായ മകളെ ദത്ത് നൽകിയതിനെക്കുറിച്ചാണ് ഇവർ വീഡിയോയിൽ സംസാരിക്കുന്നത്. ഇതിന് കാരണമായി ഇവർ പറയുന്നത്, തന്റെ കാമുകനോടൊപ്പം ഒരു ആർവിയിൽ (RV) ലോകം ചുറ്റണം എന്നതാണ്. ഒരു തരിമ്പുപോലും സങ്കടമോ കുറ്റബോധമോ ഇല്ലാതെ, താൻ ജീവിതത്തിൽ ഏറെ കാത്തിരുന്ന “സ്വാതന്ത്ര്യ”മാണിതെന്ന് ഇവർ പ്രഖ്യാപിക്കുന്നത് കേട്ട് അമ്പരന്നിരിക്കുകയാണ് ഇന്റർനെറ്റ് ലോകം.
‘സ്വാതന്ത്ര്യത്തിലേക്കുള്ള’ അവസാന ദിനം
തന്റെ ജീവിതത്തിലെ ഒരു വഴിത്തിരിവായാണ് ഈ ദിവസത്തെ യുവതി വിശേഷിപ്പിക്കുന്നത്. “ഇന്ന് എന്റെ മകളുടെ ജീവിതത്തിലെ ഒരു പ്രധാന ദിവസമാണ്. ഞാൻ അവളെ ജീവിതകാലം മുഴുവൻ മറ്റൊരാളെ ഏൽപ്പിക്കാൻ പോകുന്നു,” എന്നാണ് ഇവർ വീഡിയോ തുടങ്ങുന്നത്.
“എനിക്കതിൽ സങ്കടമുണ്ടെന്ന് പറയാൻ കഴിയില്ല. സത്യം പറഞ്ഞാൽ എനിക്കൊരു കുഴപ്പവുമില്ല (I really don’t care). ഞാൻ എന്റെ കുട്ടിയുടെ സംരക്ഷണ ചുമതല ഒഴിഞ്ഞു. അവളെ ദത്ത് നൽകി. അവൾക്ക് ഏഴ് വയസ്സായി,” ഒരു ഭാവഭേദവുമില്ലാതെ യുവതി പറയുന്നു.
ദത്തെടുക്കൽ നടപടികൾ പൂർത്തിയായെന്നും, മകളെ അവസാനമായി സ്കൂളിൽ കൊണ്ടുവിടുന്നതിനെക്കുറിച്ചും ഇവർ വീഡിയോയിൽ വിവരിക്കുന്നുണ്ട്. “അവളിപ്പോൾ സ്കൂളിൽ പോകുകയാണ്. സ്കൂളിലെ അവളുടെ അവസാന ദിവസമാണിന്ന്. ഞാൻ അവളെ അവിടെ കൊണ്ടുവിടും. ദത്തെടുക്കുന്ന മാതാപിതാക്കൾ സ്കൂൾ പിക്കപ്പ് ലൈനിൽ നിന്ന് അവളെ കൂട്ടിക്കൊണ്ടുപോകും. അതോടെ ഞാൻ ഒരു സ്വതന്ത്ര സ്ത്രീയാകും!”
തീരുമാനത്തിന് പിന്നിൽ കാമുകൻ
എന്തിനാണ് ഇങ്ങനെയൊരു കടുംകൈ ചെയ്തതെന്ന ചോദ്യത്തിനും ഇവർക്ക് വ്യക്തമായ മറുപടിയുണ്ട്. “എന്റെ വീട് വിൽക്കുകയാണ്. ഒരു ആർവി (Recreational Vehicle) വാങ്ങി ലോകം ചുറ്റാൻ പോകുന്നു. ഞാൻ വളരെ ആവേശത്തിലാണ്. എന്റെ ജീവിതകാലം മുഴുവൻ ഞാൻ ഈ നിമിഷത്തിനായി കാത്തിരിക്കുകയായിരുന്നു.”
“അവളുണ്ടായതുമുതൽ എനിക്ക് കുറ്റബോധമുണ്ടായിരുന്നു. ഒരമ്മ എന്ന നിലയിൽ കുഞ്ഞിനെ ഉപേക്ഷിക്കാൻ പാടില്ലല്ലോ എന്ന് കരുതി. പക്ഷെ, ഞാൻ എന്റെ കാമുകനുമായി ഇതേക്കുറിച്ച് സംസാരിച്ചു. മറ്റുള്ളവർ എന്ത് ചിന്തിക്കുന്നു എന്നതിൽ കാര്യമില്ലെന്നും, നിനക്ക് എന്താണ് വേണ്ടത് അതാണ് പ്രധാനമെന്നും അവൻ പറഞ്ഞു. അവന് ഒരു കുട്ടിയെ വേണ്ടായിരുന്നു,” ഇതാണ് തീരുമാനത്തിന് പിന്നിലെന്ന് അവർ തുറന്നു സമ്മതിക്കുന്നു.
View this post on Instagram
രൂക്ഷ വിമർശനവുമായി സൈബർ ലോകം
ഈ വീഡിയോ പുറത്തുവന്നതോടെ സമ്മിശ്ര പ്രതികരണമാണ് ആളുകളിൽ നിന്ന് ഉണ്ടാകുന്നത്. ഭൂരിഭാഗം പേരും ഈ അമ്മയുടെ പ്രവൃത്തിയെ രൂക്ഷമായി വിമർശിച്ചു. “നിന്റെ ജീവിതത്തിൽ ഇനി ഒരിക്കലും അനുഗ്രഹം ഉണ്ടാകില്ല ഹോം ഗേൾ,” എന്ന് ഒരാൾ കുറിച്ചു.
മറ്റൊരാളുടെ കമന്റ് ഇങ്ങനെ: “നിങ്ങൾ അവളെ സ്കൂളിൽ കൊണ്ടുവിട്ടിട്ട് പോകുന്നു, അവൾ ഇനി അവളുടെ അമ്മയെ ഒരിക്കലും കാണില്ല. ആ പാവം കുട്ടിക്ക് അത് നൽകുന്ന മാനസികാഘാതം എത്ര വലുതായിരിക്കും. കുട്ടികളെ വേണ്ടായിരുന്നെങ്കിൽ ഗർഭനിരോധന മാർഗ്ഗങ്ങൾ ഉപയോഗിക്കാമായിരുന്നില്ലേ?” “എന്തിനാണ് ഏഴ് വർഷം കാത്തിരുന്നത്?” എന്ന ചോദ്യവും പലരും ഉന്നയിക്കുന്നുണ്ട്.
അതേസമയം, ഈ അമ്മയുടെ കൂടെ വളരുന്നതിനേക്കാൾ നല്ലത് ആ കുട്ടിക്ക് മറ്റൊരിടം ലഭിക്കുന്നതാണെന്ന് ചിലർ അഭിപ്രായപ്പെട്ടു. “നിങ്ങളുടെ മകൾക്കിപ്പോൾ അത് മനസ്സിലാകില്ല, പക്ഷെ നിങ്ങളില്ലാത്തതാണ് അവൾക്ക് നല്ലത്. പുതിയ മാതാപിതാക്കൾ അവൾക്ക് ധാരാളം സ്നേഹവും ശ്രദ്ധയും നൽകുമെന്ന് പ്രതീക്ഷിക്കുന്നു,” എന്ന് ഒരു ഉപയോക്താവ് എഴുതി. “ഇതൊരു നല്ല കാര്യമാണ്! തന്നെ വേണ്ടാത്ത, വെറുക്കുന്ന ഒരു അമ്മയുടെ കൂടെ വളർന്നിരുന്നെങ്കിൽ അവളുടെ ജീവിതം വളരെ പ്രയാസകരമായേനെ,” എന്നും ചിലർ നിരീക്ഷിച്ചു.
മാതൃത്വത്തേക്കാൾ സ്വന്തം സ്വാതന്ത്ര്യത്തിനാണ് താൻ വില നൽകുന്നതെന്ന് ഈ യുവതി തുറന്നുപറയുമ്പോൾ, ഒരു കുഞ്ഞിന്റെ ഭാവിയെക്കുറിച്ചുള്ള വലിയ ആശങ്കകളാണ് സോഷ്യൽ മീഡിയ പങ്കുവെക്കുന്നത്. ഒരു അമ്മയുടെ സ്നേഹം അറിഞ്ഞുവളരേണ്ട പ്രായത്തിൽ ഉപേക്ഷിക്കപ്പെട്ട ആ ഏഴുവയസ്സുകാരിയുടെ മാനസികാവസ്ഥ എന്തായിരിക്കുമെന്ന ചോദ്യമാണ് ഈ വൈറൽ വീഡിയോ ബാക്കിയാക്കുന്നത്.
