സോഷ്യൽ മീഡിയയിൽ ചർച്ചയായ ‘ഫിലോകാലിയ’ ദമ്പതികൾ തമ്മിലുള്ള തർക്കത്തിൽ, ഇതുവരെ കേട്ടതൊന്നുമല്ല സത്യമെന്ന് വെളിപ്പെടുത്തി ഭാര്യ ജിജി മാരിയോ. ഭർത്താവ് മാരിയോ ജോസഫ് ചിലരുടെ വലയിൽ കുടുങ്ങിയിരിക്കുകയാണെന്നും, താൻ ഇത്രയും നാൾ മൗനം പാലിച്ചത് ആരെയും അപമാനിക്കരുതെന്ന് കരുതിയാണെന്നും ജിജി കണ്ണീരോടെ പറയുന്നു. ഫിലോകാലിയ ചാരിറ്റബിൾ ട്രസ്റ്റിനെ തകർക്കാനും, സമാന്തരമായി മറ്റൊരു കമ്പനി ഉണ്ടാക്കി പണം തട്ടാനും ചിലർ നടത്തിയ ഗൂഢാലോചനയാണ് എല്ലാ പ്രശ്നങ്ങൾക്കും കാരണമെന്നും അവർ ആരോപിച്ചു.
ഒരു വീഡിയോയിലൂടെയും ഫേസ്ബുക്ക് കുറിപ്പിലൂടെയുമാണ് ജിജി തന്റെ ഭാഗം വിശദീകരിച്ചത്. “എനിക്ക് എന്റെ ചേട്ടായിയെ തിരിച്ചു വേണം. അദ്ദേഹത്തിന് ഇപ്പോൾ സാധാരണ രീതിയിൽ ചിന്തിക്കാൻ കഴിയുന്നില്ല. അത് മുതലെടുത്ത് ചിലർ അദ്ദേഹത്തെ തെറ്റിദ്ധരിപ്പിക്കുകയാണ്,” ജിജി പറഞ്ഞു.
ട്രസ്റ്റിനെ തകർക്കാൻ സമാന്തര കമ്പനി
‘ഫിലോകാലിയ ചാരിറ്റബിൾ ട്രസ്റ്റ്’ വഴി പാവപ്പെട്ടവർക്ക് വീട് വെച്ചുനൽകുന്നതടക്കമുള്ള കാര്യങ്ങൾ തടസ്സപ്പെട്ടത് എങ്ങനെയെന്ന് ജിജി വെളിപ്പെടുത്തി. “എന്നെ അറിയിക്കാതെ, മാരിയോയും അജ്മൽ ഉൾപ്പെടെയുള്ള എട്ടുപേരും ചേർന്ന് ‘ഫിലോകാലിയ ഫൗണ്ടേഷൻ’ എന്ന പേരിൽ രഹസ്യമായി ഒരു കമ്പനി ആരംഭിച്ചു. ഞാൻ ഇതിനെ എതിർത്തു. ചാരിറ്റബിൾ ട്രസ്റ്റിലേക്ക് വരേണ്ട പണം അവർ തന്ത്രപൂർവ്വം പുതിയ കമ്പനിയുടെ അക്കൗണ്ടിലേക്ക് മാറ്റി. ഇതോടെ ട്രസ്റ്റ് വഴി നടന്നിരുന്ന 30 വീടുകളുടെ നിർമ്മാണം പാതിവഴിയിൽ മുടങ്ങി,” ജിജി പറഞ്ഞു.
ഇതിനെ ചോദ്യം ചെയ്തതാണ് തനിക്കെതിരെ തിരിയാൻ അവരെ പ്രേരിപ്പിച്ചത്. ട്രസ്റ്റിന്റെ പ്രവർത്തനം മരവിപ്പിക്കരുതെന്ന് താൻ അപേക്ഷിച്ചെങ്കിലും, അവർ ഗൂഢാലോചന നടത്തി തന്നെ സ്ഥാപനത്തിൽ നിന്ന് പുറത്താക്കുകയായിരുന്നുവെന്ന് ജിജി ആരോപിച്ചു.
ആക്രമണവും കള്ളക്കേസും
തർക്കത്തിനിടെ മാരിയോ ജോസഫ് വീട്ടിലെ ക്യാമറയുടെ ഡിവിആർ (DVR) എടുത്ത് തന്റെ തലയ്ക്കടിച്ചുവെന്നും, മകൾ ബന്ധുക്കളെ വിളിച്ചുവരുത്തി തന്നെ ആശുപത്രിയിലാക്കുകയായിരുന്നുവെന്നും ജിജി പറഞ്ഞു. ആശുപത്രിയിൽ നിന്നുള്ള വിവരം അനുസരിച്ച് പോലീസ് സ്വമേധയാ കേസെടുക്കുകയായിരുന്നു. എന്നാൽ, താൻ ഭർത്താവിനെ ആക്രമിച്ചു എന്ന തരത്തിലുള്ള നുണപ്രചരണങ്ങളാണ് ഇപ്പോൾ നടക്കുന്നതെന്ന് അവർ സങ്കടത്തോടെ പറയുന്നു.
ആർഭാട ജീവിതമെന്ന ആരോപണം
സോഷ്യൽ മീഡിയയിൽ തനിക്കെതിരെ ഉയരുന്ന സാമ്പത്തിക ആരോപണങ്ങൾക്കും ജിജി മറുപടി നൽകി. തന്റെ അനുജൻ ഗൾഫിൽ ജോലി ചെയ്ത് ഉണ്ടാക്കിയ പണം കൊണ്ടാണ് വീട് വാങ്ങിയത്. ഫിലോകാലിയ തുടങ്ങുന്നതിന് മുൻപേ തങ്ങൾക്ക് കാറും വീടും ഉണ്ടായിരുന്നു. “മീറ്ററിന് 50 രൂപയുള്ള തുണി വാങ്ങി സാരിയുണ്ടാക്കി ഉടുക്കുന്നത് ആർഭാടമാണോ?” ജിജി ചോദിക്കുന്നു.
കയ്യിൽ പണമില്ലാത്തതുകൊണ്ട് കുട്ടികളുടെ പഠനത്തിനും ജീവനക്കാരുടെ ശമ്പളത്തിനുമായി സ്വർണ്ണം പണയം വെക്കേണ്ടി വന്നിട്ടുണ്ട്. ട്രസ്റ്റിൽ നിന്ന് ഒരു രൂപ പോലും താൻ മോഷ്ടിച്ചിട്ടില്ലെന്നും, ഉള്ളതെല്ലാം മറ്റുള്ളവർക്ക് വാരിക്കോരി നൽകുകയായിരുന്നെന്നും ജിജി പറഞ്ഞു.
സ്വഭാവഹത്യയെന്ന ആയുധം
ഒരു സ്ത്രീയെ തോൽപ്പിക്കാൻ സമൂഹം എപ്പോഴും ഉപയോഗിക്കുന്ന ആയുധം അവളുടെ സ്വഭാവശുദ്ധിയെ ചോദ്യം ചെയ്യുക എന്നതാണെന്ന് ജിജി ഫേസ്ബുക്കിൽ കുറിച്ചു. “അജ്മൽ എന്ന വ്യക്തി 2017-ൽ വെറുമൊരു ഡ്രൈവർ മാത്രമായിരുന്നു. അതിനപ്പുറം ഒരു സ്വാതന്ത്ര്യവും ഞാൻ നൽകിയിട്ടില്ല. എന്നാൽ ഇന്ന് സ്വന്തം തെറ്റുകൾ മറയ്ക്കാൻ അവർ നുണകൾ പടച്ചുവിടുകയാണ്,” ജിജി പറഞ്ഞു.
WATCH VIDEO :
താനും മക്കളും സൈബർ ആക്രമണത്തിൽ തളർന്നുപോയെന്നും, എന്നാൽ സത്യം തന്റെ കൂടെയുള്ളതുകൊണ്ട് പോരാടുമെന്നും ജിജി വ്യക്തമാക്കി. “സത്യം നിങ്ങൾ ഇതുവരെ കണ്ടതോ കേട്ടതോ അല്ല. താമസിയാതെ ഞാൻ എല്ലാ തെളിവുകളുമായി വരും,” എന്ന് പറഞ്ഞുകൊണ്ടാണ് ജിജി തന്റെ വാക്കുകൾ അവസാനിപ്പിക്കുന്നത്.
