ഈ രണ്ടു കാര്യങ്ങൾ ശ്രദ്ധിച്ചാൽ മതി നിങ്ങളുടെ മുന്നിലുള്ള ആളുടെ സ്വഭാവം അറിയാം ; അമേരിക്കൻ പ്രസിഡന്റുമാരുടെ സുരക്ഷാ ഏജന്റിന്റെ വെളിപ്പെടുത്തൽ

പുതിയൊരാളെ പരിചയപ്പെടുമ്പോൾ നമ്മൾ ആദ്യം ശ്രദ്ധിക്കുന്നത് എന്താണ്? അവരുടെ സംസാരം, വസ്ത്രധാരണ രീതി, ശരീരഭാഷ (Body Language) എന്നിവയൊക്കെ നോക്കി “ഇയാൾ ഇങ്ങനെയൊരു ടൈപ്പ് ആണ്” എന്ന് നമ്മൾ പെട്ടെന്ന് വിധിയെഴുതാറുണ്ട്. എന്നാൽ പലപ്പോഴും നമ്മുടെ ഈ കണക്കുകൂട്ടലുകൾ തെറ്റാറുമുണ്ട്. എന്നാൽ ഒരാളുടെ യഥാർത്ഥ സ്വഭാവവും ഉദ്ദേശശുദ്ധിയും മനസ്സിലാക്കാൻ അവരുടെ ശരീരഭാഷ മാത്രം നോക്കിയാൽ പോരാ, മറിച്ച് അവർ ചിന്തിക്കുന്ന രീതി അഥവാ ‘ഹെഡ്‌സ്പേസ്’ (Headspace) കൂടി തിരിച്ചറിയണം എന്ന് പറയുകയാണ് മുൻ യുഎസ് സീക്രട്ട് സർവീസ് ഏജന്റായ എവി പൗംപോറസ്.

മുൻ അമേരിക്കൻ പ്രസിഡന്റുമാരായ ബരാക് ഒബാമ, ജോർജ്ജ് ഡബ്ല്യു ബുഷ്, ബിൽ ക്ലിന്റൺ തുടങ്ങിയവരുടെ സുരക്ഷാ ചുമതല വഹിച്ചിരുന്ന ഉദ്യോഗസ്ഥയാണ് എവി. കുറ്റവാളികളെ ചോദ്യം ചെയ്യുമ്പോഴും, വിവിഐപികളുടെ സുരക്ഷ ഉറപ്പാക്കുമ്പോഴും മനുഷ്യരെ കൃത്യമായി നിരീക്ഷിക്കാൻ പഠിച്ച പാഠങ്ങൾ അവർ ഇപ്പോൾ സാധാരണക്കാർക്കായി പങ്കുവെക്കുകയാണ്.

എന്താണ് ആ ‘രണ്ട്’ കാര്യങ്ങൾ?
എവിയുടെ അഭിപ്രായത്തിൽ, നമ്മൾ സംസാരിക്കുന്ന വ്യക്തി ഏത് മാനസികാവസ്ഥയിലാണ് നിൽക്കുന്നത് എന്ന് തിരിച്ചറിയുകയാണ് പ്രധാനം. ഇതിനായി ആളുകളെ പ്രധാനമായും രണ്ട് വിഭാഗങ്ങളായി തിരിക്കാം:

1. ഐഡന്റിറ്റി (Identity Headspace)
2. ഇൻസ്ട്രുമെന്റൽ (Instrumental Headspace)

ഈ രണ്ട് അവസ്ഥകളും എങ്ങനെ തിരിച്ചറിയാം എന്ന് നോക്കാം.

1. വികാരങ്ങൾക്ക് മുൻതൂക്കം നൽകുന്നവർ (Identity)

ഇക്കൂട്ടർ എപ്പോഴും സ്വന്തം വികാരങ്ങൾക്കും ചിന്തകൾക്കും പ്രാധാന്യം നൽകുന്നവരായിരിക്കും. “ഞാൻ ചിന്തിക്കുന്നു”, “എനിക്ക് തോന്നുന്നു”, “ഞാൻ വിശ്വസിക്കുന്നു” (I feel, I think, I believe) എന്നിങ്ങനെയുള്ള വാക്കുകളാകും ഇവർ സംസാരത്തിൽ കൂടുതലായി ഉപയോഗിക്കുക.

* ഇവർ വൈകാരികമായി (Emotional) കാര്യങ്ങളെ സമീപിക്കുന്നവരാണ്.
* സ്വന്തം കാഴ്ചപ്പാടിലൂടെ മാത്രമേ ഇവർ ലോകത്തെ കാണാറുള്ളൂ.
* സംഭാഷണങ്ങളിൽ ഇവർക്ക് കൂടുതൽ പരിഗണന ലഭിക്കണമെന്ന് ഇവർ ആഗ്രഹിക്കുന്നു.

2. കാര്യസാധ്യത്തിന് മുൻതൂക്കം നൽകുന്നവർ (Instrumental)

രണ്ടാമത്തെ വിഭാഗക്കാർ ‘ടാസ്ക് ഓറിയന്റഡ്’ (Task-oriented) അഥവാ കാര്യങ്ങൾ ചെയ്തുതീർക്കാൻ പ്രാധാന്യം നൽകുന്നവരാണ്. വികാരങ്ങൾക്ക് ഇവർ വലിയ സ്ഥാനമൊന്നും നൽകിയെന്നു വരില്ല.

* ഇവർ വളരെ നേരിട്ട് (Direct) സംസാരിക്കുന്നവരാണ്. വളച്ചുകെട്ടില്ലാത്ത സംസാരം ചിലപ്പോൾ മറ്റുള്ളവർക്ക് പരുക്കനായി തോന്നിയേക്കാം.
* ലക്ഷ്യങ്ങൾ പൂർത്തിയാക്കുക എന്നതാണ് ഇവരുടെ രീതി.
* എവി പൗംപോറസ് തന്നെത്തന്നെ ഈ വിഭാഗത്തിലാണ് ഉൾപ്പെടുത്തുന്നത്. “യുഎസ് സീക്രട്ട് സർവീസിൽ വികാരങ്ങൾക്ക് സ്ഥാനമില്ലായിരുന്നു. ഒരു തെറ്റ് പറ്റിയാൽ അത് പരിഹരിക്കുക (Fix it) എന്ന് മാത്രമാണ് അവിടെയുള്ളവർ പറയുക. ആർക്കും സങ്കടം തോന്നുമോ എന്നൊന്നും ആരും ചിന്തിക്കില്ല,” അവർ പറയുന്നു.

ഈ വേർതിരിവ് എന്തിന് മനസ്സിലാക്കണം?
നമ്മുടെ ദൈനംദിന ആശയവിനിമയത്തിലെ പല തർക്കങ്ങളും ഒഴിവാക്കാൻ ഇത് സഹായിക്കും. ഉദാഹരണത്തിന്, വൈകാരികമായി ചിന്തിക്കുന്ന (Identity) ഒരാളോട് നിങ്ങൾ വളരെ പ്രായോഗികമായി (Instrumental) പെരുമാറിയാൽ അത് വലിയ പ്രശ്നമുണ്ടാക്കും.

“നിങ്ങൾ എന്തിനാണ് ഇത്ര ക്രൂരമായി സംസാരിക്കുന്നത്? നിങ്ങൾക്ക് എന്നോട് സ്നേഹമില്ലേ?” എന്നാകും അവർ ചോദിക്കുക. യഥാർത്ഥത്തിൽ നിങ്ങൾ ക്രൂരമായി പെരുമാറിയതാകില്ല, മറിച്ച് നിങ്ങൾ കാര്യങ്ങളെ പ്രായോഗികമായി സമീപിച്ചപ്പോൾ അവർ അതിനെ വൈകാരികമായി എടുത്തു എന്നതാണ് സത്യം.

തിരിച്ച്, ജോലിയിൽ മാത്രം ശ്രദ്ധിക്കുന്ന ഒരാളോട് ചെന്ന് വികാരങ്ങളെക്കുറിച്ച് സംസാരിച്ചാൽ “ഇതൊക്കെ എന്തിനാണ് ഇപ്പോൾ പറയുന്നത്? ജോലി തീർത്തോ എന്ന് പറ,” എന്നായിരിക്കും അവരുടെ മറുപടി.

നമുക്ക് എന്ത് ചെയ്യാം?
ഒരാളോട് സംസാരിക്കും മുൻപ് അവർ ഇപ്പോൾ ഏത് ‘ഹെഡ്‌സ്പേസിലാണ്’ എന്ന് ചിന്തിക്കുക.

* അവർ വികാരഭരിതരാണെങ്കിൽ, അവരുടെ വികാരങ്ങളെ മാനിച്ചുകൊണ്ട് സംസാരിക്കുക.
* അവർ തിരക്കിലാണെങ്കിൽ, അല്ലെങ്കിൽ കാര്യമാത്രപ്രസക്തമായി ചിന്തിക്കുന്നവരാണെങ്കിൽ, വളച്ചുകെട്ടില്ലാതെ കാര്യത്തിലേക്ക് കടക്കുക.

ഈ രണ്ട് രീതികളും തെറ്റല്ല. ഓരോ സാഹചര്യത്തിലും നമ്മൾ എങ്ങനെ പെരുമാറുന്നു എന്നതിലാണ് കാര്യം. അടുത്ത തവണ സുഹൃത്തിനോടോ പങ്കാളിയോടോ സംസാരിക്കുമ്പോൾ ഈ ‘സീക്രട്ട് ഏജന്റ് തന്ത്രം’ ഒന്ന് പയറ്റിനോക്കൂ, മാറ്റം അനുഭവിച്ചറിയാം.