മലയാള സിനിമയിലെ സൂപ്പർതാരമായ മോഹൻലാൽ, പുതിയ സംവിധായകരുമായുള്ള സഹകരണത്തെക്കുറിച്ചും ലിജോ ജോസ് പെല്ലിശ്ശേരി സംവിധാനം ചെയ്ത ‘മലൈക്കോട്ടൈ വാലിബൻ’ എന്ന ചിത്രത്തിന്റെ പ്രതികരണങ്ങളെക്കുറിച്ചും തന്റെ കാഴ്ചപ്പാടുകൾ പങ്കുവെച്ച് ശ്രദ്ധേയനാകുന്നു. പ്രമുഖ സിനിമാ നിരൂപകനായ ഭരദ്വാജ് രംഗന് നൽകിയ അഭിമുഖത്തിലാണ് മോഹൻലാൽ തന്റെ അഭിപ്രായങ്ങൾ തുറന്നുപറഞ്ഞത്.
‘മലൈക്കോട്ടൈ വാലിബൻ’ നല്ല സിനിമയാണെന്ന് താൻ വിശ്വസിക്കുന്നുവെങ്കിലും പ്രതീക്ഷിച്ച പ്രതികരണം ലഭിച്ചില്ലെന്ന് മോഹൻലാൽ അഭിപ്രായപ്പെട്ടു. പുതിയ സംവിധായകരുമായി പ്രവർത്തിക്കുമ്പോൾ തിരക്കഥയുടെ കാര്യത്തിൽ കൂടുതൽ ശ്രദ്ധ ചെലുത്തേണ്ടതിന്റെ പ്രാധാന്യം അദ്ദേഹം ഊന്നിപ്പറഞ്ഞു. ഒരു സിനിമക്ക് വേണ്ടത്ര വിജയം നേടാൻ കഴിഞ്ഞില്ലെങ്കിൽ അത് തന്നെക്കാൾ കൂടുതൽ തന്റെ പ്രേക്ഷകരെയും ആരാധകരെയും ബാധിക്കുമെന്നും അതിനാൽ തിരക്കഥ തിരഞ്ഞെടുക്കുന്നത് തന്റെ ജോലിയുടെ ഒരു നിർണായക വശമാണെന്നും അദ്ദേഹം കൂട്ടിച്ചേർത്തു. അതെ പോലെ തന്നെ ഒരു സിനിമ പരാജയപ്പെട്ടാൽ അതിന്റെ പൂർണ ഉത്തരവാദിത്വം നായക നടനിലേക്കാണ് എത്തുന്നത് എന്നും അദ്ദേഹം പറയുന്നു.
പുതിയ സംവിധായകർക്ക് സിനിമയെക്കുറിച്ചും അതിന്റെ സാങ്കേതിക വശങ്ങളെക്കുറിച്ചും നല്ല അറിവുണ്ടെന്നും എന്നാൽ ചിലപ്പോൾ തിരക്കഥയിൽ വേണ്ടത്ര ശ്രദ്ധ ചെലുത്താറില്ലെന്നും മോഹൻലാൽ അഭിപ്രായപ്പെട്ടു. പഴയ കാലത്തു കണ്ടെന്റുകൾക്ക് വലിയ പ്രാധാന്യമായിരുന്നു അക്കാലത്തെ സിനിമകളിൽ അത് പ്രകടമായിരുന്നു അതുകൊണ്ടു തന്നെ അനശ്വരങ്ങളായ സിനിമകളും നിർമ്മിക്കപ്പെട്ടു. പുതു തലമുറയിലുള്ളവർ അത്തരത്തിലുള്ള കണ്ടെന്റുകൾക്ക് കൂടുതൽ പ്രാധാന്യം കൊടുക്കുമെന്ന് താൻ പ്രതീക്ഷിക്കുന്നു എന്നും ലാൽ പറയുന്നു. പുതു തലമുറയിലെ പലരും വന്നുകാത്ത പറയുമ്പോൾ അതിലെല്ലാം ഞാൻ മോഹൻലാലിനെ കാണുന്നു എന്നും അത് അവർ പൊളിച്ചെഴുതണം എന്നും അത്തരത്തിലുള്ള കണ്ടെന്റുകൾ അല്ല നമ്മുക്ക് വേണ്ടത് എന്നും അദ്ദേഹം പറയുന്നു.
“പുതിയ സംവിധായകരുമായി പ്രവർത്തിക്കുമ്പോൾ അവരുടെ കാഴ്ചപ്പാടുകളെയും ആശയങ്ങളെയും ബഹുമാനിക്കേണ്ടത് പ്രധാനമാണ്. എന്നാൽ അതേസമയം, തിരക്കഥയുടെ കാര്യത്തിൽ കൂടുതൽ ശ്രദ്ധയും കൃത്യതയും ആവശ്യമാണ്. ഒരു സിനിമയുടെ വിജയത്തിന് ശക്തമായ തിരക്കഥ അത്യന്താപേക്ഷിതമാണ്,” മോഹൻലാൽ പറഞ്ഞു.
ലിജോ ജോസ് പെല്ലിശ്ശേരിയുടെ സംവിധാന മികവിനെയും മോഹൻലാൽ പ്രശംസിച്ചു. ലിജോയുടെ സംവിധാന ശൈലി വളരെ വ്യത്യസ്തമാണെന്നും അദ്ദേഹത്തിന് സിനിമയെക്കുറിച്ചുള്ള കാഴ്ചപ്പാടുകൾ അഭിനന്ദനാർഹമാണെന്നും മോഹൻലാൽ കൂട്ടിച്ചേർത്തു. എന്നിരുന്നാലും, ‘മലൈക്കോട്ടൈ വാലിബൻ’ പ്രതീക്ഷിച്ച വിജയം നേടാതിരുന്നത് ഒരു പാഠമാണെന്നും ഭാവിയിൽ തിരക്കഥ തിരഞ്ഞെടുക്കുമ്പോൾ കൂടുതൽ ശ്രദ്ധാലുവായിരിക്കാൻ ഇത് സഹായിക്കുമെന്നും മോഹൻലാൽ വ്യക്തമാക്കി.
ഒരുപാട് പ്രതീക്ഷകളോടെ കാത്തിരുന്ന ഒരു ചിത്രമായിരുന്നു ‘മലൈക്കോട്ടൈ വാലിബൻ’. പ്രശസ്ത സംവിധായകനും താരവും ഒന്നിച്ചപ്പോൾ വലിയ ഹൈപ്പ് ലഭിച്ചിരുന്നു. എന്നിരുന്നാലും, സിനിമക്ക് സമ്മിശ്ര പ്രതികരണമാണ് ലഭിച്ചത്. ഈ സാഹചര്യത്തിലാണ് മോഹൻലാലിന്റെ ഈ തുറന്നുപറച്ചിൽ ശ്രദ്ധേയമാകുന്നത്. പ്രഗത്ഭരായ സംവിധായകരും അഭിനേതാക്കളും ഒന്നിച്ചാലും പ്രേക്ഷകരുടെ പ്രതീക്ഷകൾ നിറവേറ്റുന്നതിലെ വെല്ലുവിളികളും തിരക്കഥയുടെ പ്രാധാന്യവും ഈ വാക്കുകളിലൂടെ വ്യക്തമാകുന്നു. സിനിമയുടെ കലാപരമായ മൂല്യവും വാണിജ്യപരമായ വിജയവും ഒരുപോലെ പ്രധാനമാണെന്നും മോഹൻലാൽ അഭിപ്രായപ്പെട്ടു. തന്റെ കരിയറിൽ ഇനിയും പുതിയ പരീക്ഷണങ്ങൾ നടത്താൻ താൻ തയ്യാറാണെന്നും എന്നാൽ പ്രേക്ഷകരെ നിരാശപ്പെടുത്താതിരിക്കാൻ ശ്രദ്ധിക്കുമെന്നും അദ്ദേഹം കൂട്ടിച്ചേർത്തു.
