ഇന്ത്യയിൽ നിരോധനം നേരിടുന്ന ചൈനീസ് ആപ്ലിക്കേഷനായ ടിക് ടോക്ക്, പുതിയ നിയമനങ്ങൾ ആരംഭിച്ചതായി റിപ്പോർട്ട്. ഔദ്യോഗികമായി ഇന്ത്യയിലേക്ക് തിരിച്ചുവരുന്നതിനെക്കുറിച്ച് പ്രഖ്യാപനങ്ങളൊന്നും ഉണ്ടായിട്ടില്ല. എങ്കിലും, കമ്പനിയുടെ ലിങ്ക്ഡ്ഇൻ പേജിൽ വന്ന പുതിയ തൊഴിൽ ഒഴിവുകൾ, ടിക് ടോക്ക് തിരിച്ചുവരാൻ ഒരുങ്ങുകയാണോ എന്ന സംശയം ഉയർത്തിയിട്ടുണ്ട്.
2020-ൽ ഇന്ത്യ-ചൈന അതിർത്തി സംഘർഷങ്ങളെത്തുടർന്ന്, കേന്ദ്രസർക്കാർ ടിക് ടോക്ക് ഉൾപ്പെടെ 59 ചൈനീസ് ആപ്പുകൾക്ക് രാജ്യത്ത് നിരോധനം ഏർപ്പെടുത്തിയിരുന്നു. ദേശീയ സുരക്ഷ, ഡാറ്റാ സ്വകാര്യത എന്നിവ മുൻനിർത്തിയാണ് സർക്കാർ ഈ തീരുമാനം എടുത്തത്. നിരോധനം ഏർപ്പെടുത്തുമ്പോൾ ഇന്ത്യയിൽ ഏകദേശം 200 ദശലക്ഷം ഉപയോക്താക്കൾ ടിക് ടോക്കിനുണ്ടായിരുന്നു.
നിരോധനത്തിന് ശേഷം ഇന്ത്യയിൽ ടിക് ടോക്ക് പൂർണ്ണമായും ലഭ്യമല്ലാതായി. എന്നാൽ, അടുത്തിടെ ചില ഉപയോക്താക്കൾക്ക് ടിക് ടോക്കിന്റെ വെബ്സൈറ്റ് ഭാഗികമായി ആക്സസ് ചെയ്യാൻ സാധിച്ചിരുന്നു. എങ്കിലും, പ്ലാറ്റ്ഫോമിനുള്ള നിരോധനം തുടരുകയാണെന്ന് സർക്കാർ അധികൃതർ വ്യക്തമാക്കിയിട്ടുണ്ട്.
നിലവിൽ, ടിക് ടോക്ക് അവരുടെ ഗുരുഗ്രാം ഓഫീസിലേക്ക് രണ്ട് പുതിയ ഒഴിവുകളാണ് ലിങ്ക്ഡ്ഇൻ വഴി പ്രഖ്യാപിച്ചിട്ടുള്ളത്. ഈ രണ്ട് തസ്തികകളും കമ്പനിയുടെ ‘ട്രസ്റ്റ് ആൻഡ് സേഫ്റ്റി’ വിഭാഗവുമായി ബന്ധപ്പെട്ടതാണ്. ഉള്ളടക്ക നിയന്ത്രണവും ഉപയോക്താക്കളുടെ സുരക്ഷയും ഉറപ്പാക്കുക എന്നതാണ് ഈ വിഭാഗത്തിന്റെ പ്രധാന ചുമതല.
ഒഴിവുകൾ ഇവയാണ്:
1. കണ്ടന്റ് മോഡറേറ്റർ (ബംഗാളി സംസാരിക്കുന്നവർക്ക്)
* ടിക് ടോക്കിന്റെ നിയമങ്ങൾക്കനുസരിച്ച് ഉള്ളടക്കങ്ങൾ വിലയിരുത്തുക, ഫിൽട്ടർ ചെയ്യുക.
* തെറ്റായ ഉള്ളടക്കങ്ങൾ നീക്കം ചെയ്യുക, ഉപയോക്താക്കളുടെ സുരക്ഷ ഉറപ്പാക്കുക.
* ഇംഗ്ലീഷും ബംഗാളിയും നന്നായി കൈകാര്യം ചെയ്യാൻ കഴിയുന്നവരായിരിക്കണം.
* ഇന്റർനെറ്റ് നിയമങ്ങളെക്കുറിച്ചും സാംസ്കാരികപരമായ കാര്യങ്ങളെക്കുറിച്ചും ധാരണയുണ്ടായിരിക്കണം. ബിരുദധാരികൾക്ക് മുൻഗണന നൽകും.
2. വെൽബീയിംഗ് പാർട്ണർഷിപ്പ് ആൻഡ് ഓപ്പറേഷൻസ് ലീഡ്.
* ടിക് ടോക്കിന്റെ പ്രാദേശിക ടീമുകൾക്കായുള്ള വെൽബീയിംഗ് പ്രോഗ്രാമുകൾക്ക് നേതൃത്വം നൽകുക.
* പങ്കാളിത്ത സ്ഥാപനങ്ങളെ നിയന്ത്രിക്കുക, ആഗോളതലത്തിലുള്ള കമ്പനി നയങ്ങൾ പാലിക്കുന്നുണ്ടെന്ന് ഉറപ്പുവരുത്തുക.
* കുറഞ്ഞത് അഞ്ച് വർഷത്തെ പ്രോജക്ട് മാനേജ്മൻ്റ് പരിചയം ഉണ്ടായിരിക്കണം.
ഈ പുതിയ നിയമനങ്ങൾ ടിക് ടോക്ക് ഉടൻ തന്നെ ഇന്ത്യയിലേക്ക് തിരിച്ചുവരുമെന്ന് ഉറപ്പ് നൽകുന്നില്ല. കാരണം, കേന്ദ്രസർക്കാർ നിരോധനം പിൻവലിച്ചിട്ടില്ല. എന്നാൽ, കമ്പനി ഇന്ത്യയിൽ തങ്ങളുടെ സാന്നിധ്യം നിലനിർത്താനും ഭാവിയിൽ ഇന്ത്യയിലേക്ക് തിരിച്ചുവരാനുള്ള സാധ്യതകൾ തുറന്നിടാനും ശ്രമിക്കുന്നു എന്നതിൻ്റെ സൂചനയാണിത്. ഇന്ത്യയിലെ വലിയൊരു ഉപയോക്തൃ സമൂഹത്തെ ടിക് ടോക്കിന് നഷ്ടമായിട്ടുണ്ട്. അതുകൊണ്ട് തന്നെ, ഭാവിയിൽ അവർക്ക് ഇന്ത്യൻ വിപണിയിലേക്ക് തിരിച്ചെത്താൻ സാധിക്കുമോ എന്ന് ഉറ്റുനോക്കുകയാണ് സൈബർ ലോകം.
ഈ പുതിയ നിയമനങ്ങൾ, വലിയ തോതിലുള്ള തിരിച്ചുവരവിനുള്ള ഒരുക്കമായി കാണാനാവില്ലെങ്കിലും, ഇന്ത്യൻ വിപണിയെ പൂർണ്ണമായി കൈവെടിയാൻ ടിക് ടോക്ക് തയ്യാറല്ല എന്നതിൻ്റെ വ്യക്തമായ സൂചന നൽകുന്നു.
