ദാമ്പത്യജീവിതത്തിൽ പുതുമകൾ കൊണ്ടുവരാൻ ആഗ്രഹിക്കുന്ന ദമ്പതികൾ പലപ്പോഴും യാത്രകളോ പുതിയ രീതികളോ പരീക്ഷിക്കുന്നത് സർവ്വസാധാരണമാണ്. കാമസൂത്രയിലെ അധ്യായങ്ങൾ മറിച്ചുനോക്കുന്നവർ മുതൽ കിടപ്പുമുറിയിലെ വിരസത മാറ്റാൻ പുതിയ ഇടങ്ങൾ തേടുന്നവർ വരെയുണ്ട്. എന്നാൽ ഒരു എം.ആർ.ഐ (MRI) സ്കാനിംഗ് മെഷീനിനുള്ളിൽ ലൈം#ഗികബന്ധത്തിൽ ഏർപ്പെടുന്നതിനെക്കുറിച്ച് നിങ്ങൾക്ക് എപ്പോഴെങ്കിലും ചിന്തിക്കാനാകുമോ? കേൾക്കുമ്പോൾ അതിശയം തോന്നാമെങ്കിലും, ലോകത്തെ ഞെട്ടിച്ചുകൊണ്ട് അങ്ങനെയും ഒരു സംഭവം നടന്നിട്ടുണ്ട്. വെറുമൊരു ആവേശം കൊണ്ടോ സാഹസികതയ്ക്ക് വേണ്ടിയോ ആയിരുന്നില്ല ഇത്; മറിച്ച് തികച്ചും ശാസ്ത്രീയമായ ഒരു പഠനത്തിന്റെ ഭാഗമായായിരുന്നു ഈ വിചിത്രമായ പരീക്ഷണം അരങ്ങേറിയത്.
ശാസ്ത്രത്തിന് വേണ്ടി ഒരു വിട്ടുവീഴ്ച
1991-ൽ നെതർലൻഡ്സിലാണ് വൈദ്യശാസ്ത്രത്തെ അമ്പരപ്പിച്ച ഈ സംഭവം നടന്നത്. ഐഡാ സബെലിസ് (Ida Sabelis), അവരുടെ കാമുകൻ ജൂപ്പ് (Jupp) എന്നിവരാണ് ഈ പരീക്ഷണത്തിനായി തയ്യാറായത്. പ്രശസ്ത ഡച്ച് ശാസ്ത്രജ്ഞനായ മെൻകോ വിക്ടർ പെക് വാൻ ആൻഡെലിന്റെ (Pek van Andel) നേതൃത്വത്തിലായിരുന്നു പഠനം. ലൈം#ഗികബന്ധത്തിലേർപ്പെടുമ്പോൾ മനുഷ്യശരീരത്തിൽ, പ്രത്യേകിച്ച് ജനനേന്ദ്രിയങ്ങളിൽ സംഭവിക്കുന്ന മാറ്റങ്ങൾ കൃത്യമായി മനസ്സിലാക്കുക എന്നതായിരുന്നു ഈ ഗവേഷണത്തിന്റെ പ്രധാന ലക്ഷ്യം.
നൂറ്റാണ്ടുകളായി മനുഷ്യന്റെ ശരീരശാസ്ത്രത്തെക്കുറിച്ച് നിരവധി തെറ്റായ ധാരണകൾ നിലനിന്നിരുന്നു. 1492-93 കാലഘട്ടത്തിൽ പ്രശസ്ത ചിത്രകാരനും ശാസ്ത്രജ്ഞനുമായ ലിയനാർഡോ ഡാവിഞ്ചി വരച്ച ചിത്രങ്ങളിൽ പോലും സ്ത്രീകളുടെ യോ#നി ഒരു നേരായ സിലിണ്ടർ ആകൃതിയിലാണെന്നാണ് ചിത്രീകരിച്ചിരുന്നത്. ഈ ധാരണകളുടെ സത്യാവസ്ഥ ശാസ്ത്രീയമായി പരിശോധിക്കുക എന്നതായിരുന്നു ഡോ. പെക് വാൻ ആൻഡെലിന്റെ ലക്ഷ്യം.
ഇടുങ്ങിയ ട്യൂബിലെ ‘പെർഫോമൻസ്’
എം.ആർ.ഐ മെഷീനുകൾ ആദ്യമായി ഉപയോഗിച്ചു തുടങ്ങിയ കാലമായിരുന്നു അത്. അതുകൊണ്ടുതന്നെ വ്യക്തമായ ചിത്രങ്ങൾ ലഭിക്കാൻ ഏറെ സമയമെടുത്തിരുന്നു. കൺട്രോൾ റൂമിൽ നിന്നും നിർദ്ദേശം ലഭിക്കുന്നതുവരെ ചിലപ്പോൾ മിനിറ്റുകളോളം ഒരേ പൊസിഷനിൽ തന്നെ ദമ്പതികൾക്ക് തുടരേണ്ടി വന്നിട്ടുണ്ട്. വളരെ ഇടുങ്ങിയ, വെറും 50 സെന്റീമീറ്റർ മാത്രം വ്യാസമുള്ള ആ ട്യൂബിനുള്ളിൽ സാധാരണ ഗതിയിലുള്ള (missionary) പൊസിഷനുകൾ സാധ്യമായിരുന്നില്ല. അതിനാൽ വശങ്ങളിലേക്ക് ചരിഞ്ഞുകിടന്നുള്ള (spooning) രീതിയാണ് ഇവർ തിരഞ്ഞെടുത്തത്.
“തീർച്ചയായും അതൊരു റൊമാന്റിക് അനുഭവമായിരുന്നില്ല. മറിച്ച് ശാസ്ത്രത്തോടുള്ള സ്നേഹവും, ഒരുതരം അഭ്യാസപ്രകടനവും (performance) മാത്രമായിരുന്നു അത്,” ദശാബ്ദങ്ങൾക്ക് ശേഷം ‘വാട്ട് വാസ് ഇറ്റ് ലൈക്ക്’ (What Was It Like) എന്ന പോഡ്കാസ്റ്റിൽ ഐഡാ ഈ അനുഭവത്തെക്കുറിച്ച് ചിരിച്ചുകൊണ്ട് ഓർത്തെടുത്തു. ഭാഗ്യവശാൽ, ഈ ഇടുങ്ങിയ സ്ഥലത്ത് കിടന്നത് അവർക്ക് ക്ലോസ്ട്രോഫോബിയ (അടഞ്ഞ സ്ഥലങ്ങളോടുള്ള ഭയം) ഉണ്ടാക്കിയില്ല എന്നും അവർ കൂട്ടിച്ചേർത്തു.
ലോകത്തെ അമ്പരപ്പിച്ച കണ്ടെത്തലുകൾ
1999-ൽ പ്രശസ്തമായ ബ്രിട്ടീഷ് മെഡിക്കൽ ജേർണലിൽ (BMJ) ഈ പഠനത്തിന്റെ ഫലങ്ങൾ പ്രസിദ്ധീകരിച്ചു. വൈദ്യശാസ്ത്രരംഗത്ത് വലിയൊരു തിരുത്തലായിരുന്നു ആ പഠനം. ഡാവിഞ്ചിയുടെ കാലം മുതൽ വിശ്വസിച്ചുപോന്നിരുന്ന പല ധാരണകളും ഈ എം.ആർ.ഐ ചിത്രങ്ങൾ തിരുത്തിക്കുറിച്ചു. ലൈംഗികബന്ധ സമയത്ത് പുരുഷലിംഗം ഒരു ‘ബൂമറാങ്ങിന്റെ’ (Boomerang) ആകൃതിയിലേക്ക് വളയുന്നുണ്ടെന്നും, അല്ലാതെ അത് നേരായ സിലിണ്ടർ ആകൃതിയിലല്ല നിലകൊള്ളുന്നതെന്നും എം.ആർ.ഐ സ്കാനിംഗിലൂടെ തെളിയിക്കപ്പെട്ടു. ഇത് പുരുഷന് വേദനയുണ്ടാക്കാതെ തന്നെ സ്ത്രീയുടെ യോനിയുടെ ആകൃതിക്കനുസരിച്ച് വളയാൻ സഹായിക്കുന്നു. കൂടാതെ, ലൈംഗിക ഉത്തേജന സമയത്ത് സ്ത്രീകളുടെ ഗർഭപാത്രത്തിന്റെ വലുപ്പം വർദ്ധിക്കുന്നില്ല എന്ന പുതിയ വിവരവും ഈ പഠനം ശാസ്ത്രലോകത്തിന് നൽകി.
പരീക്ഷണത്തിനൊടുവിലെ പ്രണയസാഫല്യം
വൈദ്യശാസ്ത്രത്തിന് നൽകിയ ഈ വലിയ സംഭാവനയ്ക്ക് 2000-ൽ ഈ ഗവേഷണത്തിന് വിഖ്യാതമായ ‘ഇഗ് നോബൽ’ (Ig Nobel) പുരസ്കാരവും ലഭിച്ചു. ഇന്നും ബ്രിട്ടീഷ് മെഡിക്കൽ ജേർണലിന്റെ ചരിത്രത്തിൽ ഏറ്റവും കൂടുതൽ ആളുകൾ വായിക്കുകയും ഡൗൺലോഡ് ചെയ്യുകയും ചെയ്ത ലേഖനങ്ങളിൽ ഒന്നാണിത്. അടുത്തിടെ ‘വൈസ്’ (Vice) പോലെയുള്ള മാധ്യമങ്ങൾ ടിക് ടോക്കിലൂടെ ഈ കഥ വീണ്ടും പങ്കുവെച്ചതോടെ പുതിയ തലമുറയും ഈ ചരിത്രസംഭവം അറിഞ്ഞു.
വിചിത്രമെന്ന് തോന്നാമെങ്കിലും, സ്ത്രീകളുടെ ശരീരശാസ്ത്രത്തെക്കുറിച്ച് കൂടുതൽ മനസ്സിലാക്കാൻ ഈ പരീക്ഷണം ലോകത്തെ വലിയ രീതിയിൽ സഹായിച്ചു. അന്ന് ഈ പഠനത്തിന് തയ്യാറായ ഐഡാ ഇന്ന് ആംസ്റ്റർഡാമിലെ പ്രശസ്തമായ വ്രിജെ സർവകലാശാലയിലെ (Vrije University) ഓർഗനൈസേഷണൽ ആന്ത്രോപോളജി പ്രൊഫസറാണ്. ശാസ്ത്രലോകത്തെ ഞെട്ടിച്ച പരീക്ഷണത്തിനപ്പുറം ഇതൊരു മനോഹരമായ പ്രണയകഥ കൂടിയാണ്; കാരണം, വർഷങ്ങൾക്കിപ്പുറവും ഐഡായും ജൂപ്പും ഇന്നും ഒരുമിച്ച് സന്തോഷത്തോടെ ജീവിക്കുന്നു.
