ദീർഘായുസ്സിന്റെ രഹസ്യം തേടിയുള്ള മനുഷ്യന്റെ യാത്രയ്ക്ക് കാലങ്ങളുടെ പഴക്കമുണ്ട്. ശരിയായ ഭക്ഷണക്രമം, ചിട്ടയായ വ്യായാമം, നല്ല ജീവിതശൈലി എന്നിവ പിന്തുടർന്നാൽ നൂറുവയസ്സുവരെ ജീവിക്കാമെന്നാണ് പൊതുവെയുള്ള ധാരണ. എന്നാൽ, ഈ വിശ്വാസങ്ങളെ വെല്ലുവിളിക്കുന്ന പുതിയൊരു പഠനറിപ്പോർട്ടാണ് ഇപ്പോൾ ശാസ്ത്രലോകത്ത് ചർച്ചയാകുന്നത്. നിങ്ങളുടെ ആയുസ്സിന്റെ ദൈർഘ്യം നിശ്ചയിക്കുന്നതിൽ നിങ്ങൾ കഴിക്കുന്ന ഭക്ഷണത്തേക്കാളും വ്യായാമത്തേക്കാളും പങ്കുഹിക്കുന്നത് നിങ്ങളുടെ ജീനുകളാണെന്ന് (Genes) ഈ പഠനം സമർത്ഥിക്കുന്നു.
ജനുവരി 29-ന് ‘സയൻസ്’ (Science) ജേണലിൽ പ്രസിദ്ധീകരിച്ച പഠനമനുസരിച്ച്, അപകടങ്ങൾ, അണുബാധകൾ തുടങ്ങിയ ബാഹ്യകാരണങ്ങൾ ഒഴിവാക്കിയാൽ, മനുഷ്യന്റെ ആയുസ്സിന്റെ 55 ശതമാനവും തീരുമാനിക്കുന്നത് പാരമ്പര്യ ഘടകങ്ങളാണ്. മുൻകാലങ്ങളിൽ ഇത് വെറും 10 മുതൽ 25 ശതമാനം വരെയാണെന്നായിരുന്നു ശാസ്ത്രലോകം കരുതിയിരുന്നത്. എന്നാൽ, ആയുർദൈർഘ്യത്തിൽ ജനിതക ഘടകങ്ങൾക്ക് നാം കരുതിയതിലും വലിയ സ്വാധീനമുണ്ടെന്നാണ് പുതിയ കണ്ടെത്തൽ.
എന്താണ് ഈ പഠനം പറയുന്നത്?
ഇസ്രായേലിലെ വെയ്‌സ്‌മാൻ ഇൻസ്റ്റിറ്റ്യൂട്ട് ഓഫ് സയൻസിലെ ബയോഫിസിസ്റ്റ് ബെൻ ഷെൻഹാർ ഉൾപ്പെടെയുള്ള ഗവേഷകരാണ് ഈ പഠനത്തിന് പിന്നിൽ. സ്വീഡനിലെ മൂന്ന് സെറ്റ് ഇരട്ടകളുടെയും (twins), നൂറുവയസ്സിലധികം ജീവിച്ചിരുന്ന 444 അമേരിക്കക്കാരുടെ 2092 സഹോദരങ്ങളുടെയും വിവരങ്ങൾ ശേഖരിച്ചാണ് ഗവേഷകർ ഈ നിഗമനത്തിലെത്തിയത്.
മുൻകാല പഠനങ്ങൾ ബാഹ്യമായ മരണകാരണങ്ങളെ (അപകടങ്ങൾ, പരിക്കുകൾ) കൂടി കണക്കിലെടുത്തതുകൊണ്ടാണ് പാരമ്പര്യത്തിന്റെ സ്വാധീനം കുറവാണെന്ന തെറ്റായ നിഗമനത്തിൽ എത്തിയിരുന്നതെന്ന് ഗവേഷകർ പറയുന്നു. എന്നാൽ, വാർധക്യം മൂലമോ പ്രായമാകുമ്പോൾ ശരീരത്തിനുണ്ടാകുന്ന സ്വാഭാവിക ക്ഷയം മൂലമോ ഉള്ള മരണങ്ങളെ മാത്രം അടിസ്ഥാനമാക്കി നടത്തിയ ഈ പഠനം, ആയുസ്സ് നിർണയിക്കുന്നതിൽ ഡിഎൻഎയുടെ (DNA) പങ്ക് വ്യക്തമാക്കുന്നു.
“പുകവലിയും മദ്യപാനവും ശീലമാക്കിയിട്ടും ചിലർ എങ്ങനെ 110 വയസ്സുവരെ ജീവിക്കുന്നു എന്നത് കൗതുകകരമാണ്. ഇതിന് പിന്നിലെ ജനിതക രഹസ്യം കണ്ടെത്താനായെങ്കിൽ, ഭാവിയിൽ ആയുർദൈർഘ്യം വർദ്ധിപ്പിക്കാനുള്ള മരുന്നുകളും ചികിത്സകളും വികസിപ്പിക്കാൻ നമുക്ക് സാധിച്ചേക്കും,” ബെൻ ഷെൻഹാർ പറയുന്നു.
ജീവിതശൈലിക്ക് സ്ഥാനമില്ലേ?
ജീനുകൾക്കാണ് പ്രാധാന്യം എന്ന് പറയുമ്പോൾ, ആരോഗ്യകരമായ ജീവിതശൈലിക്ക് യാതൊരു വിലയുമില്ലെന്ന് അർത്ഥമില്ല. ബോസ്റ്റൺ സർവകലാശാലയിലെ ന്യൂ ഇംഗ്ലണ്ട് സെന്റനേറിയൻ സ്റ്റഡി ഡയറക്ടറായ ഡോ. തോമസ് പേൾസ് പറയുന്നതിങ്ങനെ: “നിങ്ങൾ നൂറുവയസ്സുവരെ ജീവിക്കുമോ എന്ന് അറിയാൻ സ്വന്തം കുടുംബചരിത്രം പരിശോധിക്കുന്നതാണ് ഉചിതം. എന്നാൽ 80 വയസ്സുവരെ ജീവിക്കാൻ വിധിക്കപ്പെട്ട ജനിതകഘടനയാണ് നിങ്ങളുടേതെങ്കിൽ, എത്ര കഠിനമായി ശ്രമിച്ചാലും നൂറുവയസ്സുവരെ എത്തുക പ്രയാസമായിരിക്കും.” ചുരുക്കത്തിൽ, വ്യായാമത്തിലൂടെയും ഭക്ഷണനിയന്ത്രണത്തിലൂടെയും ആയുസ്സ് അല്പം നീട്ടാൻ സാധിക്കുമെങ്കിലും, അതിന്റെ പരിധി നിശ്ചയിക്കുന്നത് ജീനുകളാണ്.
ഇന്ത്യൻ വിദഗ്ധരുടെ അഭിപ്രായം
ഈ കണ്ടെത്തൽ ഇന്ത്യയെ സംബന്ധിച്ചിടത്തോളം വളരെ നിർണായകമാണ്. ആയുർദൈർഘ്യത്തിൽ ജനിതക ഘടകങ്ങൾക്ക് വലിയ പങ്കുണ്ടെങ്കിലും, ഇന്ത്യയിലെ പ്രത്യേക സാഹചര്യങ്ങൾ ഇതിനെ പ്രതികൂലമായി ബാധിച്ചേക്കാമെന്ന് ഫോർട്ടിസ് സി-ഡോക് ചെയർമാൻ ഡോ. അനൂപ് മിശ്ര മുന്നറിയിപ്പ് നൽകുന്നു. “പോഷകാഹാരക്കുറവ്, അന്തരീക്ഷ മലിനീകരണം, വർദ്ധിച്ചുവരുന്ന പ്രമേഹം, അമിതവണ്ണം എന്നിവ ജനിതകമായി ലഭിക്കേണ്ട ആയുസ്സിനെപ്പോലും വെട്ടിച്ചുരുക്കുന്നു. ജീനുകൾ നൽകുന്ന മുൻതൂക്കം പോലും പലപ്പോഴും നമ്മുടെ മോശം ജീവിതസാഹചര്യങ്ങൾ മൂലം ഇല്ലാതാകുന്നു,” അദ്ദേഹം ടൈംസ് ഓഫ് ഇന്ത്യയോട് പറഞ്ഞു.
മാക്സ് ഹെൽത്ത്‌കെയറിലെ എൻഡോക്രൈനോളജി വിഭാഗം ചെയർമാൻ ഡോ. അംബരീഷ് മിത്തലിന്റെ അഭിപ്രായത്തിൽ, ആയുസ്സ് എന്നത് പാരമ്പര്യവും പരിസ്ഥിതിയും തമ്മിലുള്ള സന്തുലിതാവസ്ഥയാണ്. “നമുക്ക് എത്ര കാലം ജീവിക്കാം എന്നതിന്റെ പരമാവധി പരിധി (Upper Limit) നിശ്ചയിക്കുന്നത് ജനിതകമാണ്. എന്നാൽ ആ പരിധിയോട് എത്ര അടുത്ത് എത്താൻ നമുക്ക് സാധിക്കും എന്നത് നമ്മുടെ ജീവിതശൈലിയെ ആശ്രയിച്ചിരിക്കും,” അദ്ദേഹം വ്യക്തമാക്കുന്നു.
നമുക്ക് എന്ത് ചെയ്യാം?
ഇന്ത്യക്കാരുടെ ശരാശരി ആയുർദൈർഘ്യം 1950-ൽ 41 വയസ്സായിരുന്നത് ഇപ്പോൾ 70-72 വയസ്സിലേക്ക് ഉയർന്നിട്ടുണ്ട്. എന്നാൽ ജീവിക്കുന്ന കാലം അത്രയും ആരോഗ്യമുള്ളവരായിരിക്കുക (Health Span) എന്നതാണ് പ്രധാനം. ജനിതകമായി ലഭിച്ച ആയുസ്സ് പൂർണ്ണമായി അനുഭവിക്കണമെങ്കിൽ, പ്രമേഹം, ഹൃദ്രോഗം തുടങ്ങിയ ജീവിതശൈലീ രോഗങ്ങളെ നിയന്ത്രിച്ചേ മതിയാകൂ. “എല്ലാം വിധിയാണ്” എന്ന് കരുതി മടിപിടിച്ചിരിക്കാതെ, ലഭിച്ച ആയുസ്സ് ഏറ്റവും മികച്ച രീതിയിൽ ജീവിച്ചു തീർക്കാനാണ് നാം ശ്രമിക്കേണ്ടത്.
നൂറുവയസ്സുവരെ ജീവിക്കാൻ ലോട്ടറി അടിച്ചപോലെ നല്ലൊരു ‘ജീൻ’ വേണം, എന്നാൽ ആ ലോട്ടറി നഷ്ടപ്പെടുത്താതിരിക്കാൻ നല്ലൊരു ജീവിതശൈലിയും അത്യാവശ്യമാണ്.
