മലയാള സിനിമയിലെ ചിരിയുടെ മാലപ്പടക്കം തീർത്ത താരമാണ് ഹരീഷ് കണാരൻ. എന്നാൽ കുറച്ചുകാലമായി വെള്ളിത്തിരയിൽ അദ്ദേഹത്തെ പഴയതുപോലെ കാണാനില്ലായിരുന്നു. കോവിഡിന് ശേഷം സിനിമയിലെ തമാശകളുടെ രീതി മാറിയതാകാം തന്നെ വിളിക്കാത്തതെന്നായിരുന്നു ഹരീഷ് കരുതിയിരുന്നത്. എന്നാൽ സത്യം അതല്ലെന്നും, തന്റെ അവസരങ്ങൾ ഇല്ലാതാക്കിയതിന് പിന്നിൽ സിനിമാരംഗത്തെ ഒരു പ്രമുഖന്റെ പകയാണെന്നും തുറന്നുപറയുകയാണ് താരം. താൻ വിശ്വസിച്ച് പണം കടം നൽകിയ പ്രൊഡക്ഷൻ കൺട്രോളർ എൻ.എം. ബാദുഷയാണ് തന്റെ കരിയർ നശിപ്പിക്കാൻ ശ്രമിച്ചതെന്ന് ഹരീഷ് കണാരൻ വെളിപ്പെടുത്തി.
പുതിയ ചിത്രമായ ‘മധുരകണക്ക്’ എന്ന സിനിമയുടെ പ്രമോഷനുമായി ബന്ധപ്പെട്ട് മാധ്യമങ്ങളോട് സംസാരിക്കവെയാണ്, ഇത്രയും നാൾ പറയാതെ സൂക്ഷിച്ച ആ പേര് ഹരീഷ് പരസ്യമാക്കിയത്.
സൗഹൃദത്തിൽ വിള്ളൽ വീഴ്ത്തിയ 20 ലക്ഷം
സിനിമയിൽ കൈനിറയെ അവസരങ്ങളുമായി ഓടിനടന്നിരുന്ന കാലത്താണ് സംഭവങ്ങളുടെ തുടക്കം. അന്ന് ഹരീഷ് താരസംഘടനയായ ‘അമ്മ’യിൽ അംഗത്വമെടുത്തിരുന്നില്ല. അംഗത്വമെടുക്കണമെന്ന് ഇടവേള ബാബു നിർദ്ദേശിച്ച സമയത്താണ് ബാദുഷ ഹരീഷുമായി അടുക്കുന്നത്. ഡേറ്റും മറ്റ് കാര്യങ്ങളും താൻ മാനേജ് ചെയ്തോളാം എന്ന് ബാദുഷ ഏറ്റു. ആ വിശ്വാസത്തിൽ ഹരീഷ് കാര്യങ്ങൾ ഏൽപ്പിച്ചു.
“അത്യാവശ്യമെന്ന് പറഞ്ഞ് 20 ലക്ഷം വാങ്ങി”
“കള്ളൻ ഡിസൂസയുടെ ഷൂട്ടിംഗ് നടക്കുമ്പോഴാണ് ബാദുഷ എന്റെ അടുത്ത് വന്ന് അത്യാവശ്യമായി 20 ലക്ഷം രൂപ വേണമെന്ന് പറഞ്ഞത്. ഒരാഴ്ചയ്ക്കുള്ളിൽ തിരിച്ചുതരാമെന്ന് ഉറപ്പുനൽകി. ഞാൻ അപ്പോൾത്തന്നെ ബാങ്കിൽ വിളിച്ച് പണം ട്രാൻസ്ഫർ ചെയ്തു കൊടുത്തു. എന്നാൽ ആഴ്ചകളും മാസങ്ങളും കഴിഞ്ഞിട്ടും പണം തിരികെ വന്നില്ല,” ഹരീഷ് പറഞ്ഞു.
പിന്നീട് കൊവിഡ് വന്നതോടെ രണ്ട് വർഷത്തോളം സിനിമകൾ ഇല്ലാതായി. ആ സമയത്തും ബാദുഷയുമായുള്ള സൗഹൃദം തുടർന്നു. ചാരിറ്റി പ്രവർത്തനങ്ങൾക്കായി താൻ പണം അയച്ചുകൊടുത്തിട്ടുണ്ടെന്നും ഹരീഷ് ഓർക്കുന്നു. വീടുപണി തുടങ്ങിയപ്പോൾ പണത്തിന് അത്യാവശ്യം വന്നപ്പോഴാണ് ബാദുഷയോട് പണം തിരിച്ചുചോദിക്കുന്നത്. ‘വെടിക്കെട്ട്’ സിനിമ റിലീസ് ആകുമ്പോൾ തരാമെന്ന് പറഞ്ഞെങ്കിലും നടന്നില്ല.
നീണ്ട നാല് വർഷത്തോളം ഹരീഷ് ആ പണം തിരികെ ചോദിച്ചില്ല. എന്നാൽ സ്വന്തമായി വീട് പണിയാൻ തുടങ്ങിയപ്പോൾ പണത്തിന് ആവശ്യം വന്നു. പണം തിരികെ ചോദിച്ചപ്പോൾ ഒഴികഴിവുകൾ പറയാൻ തുടങ്ങിയ ബാദുഷ, ഒടുവിൽ തനിക്കെതിരെ തിരിയുകയായിരുന്നെന്ന് ഹരീഷ് പറയുന്നു.
നുണക്കഥകൾ പ്രചരിപ്പിച്ച് ഒതുക്കി
പണം തിരികെ നൽകുന്നതിന് പകരം, തന്നെക്കുറിച്ച് സിനിമാക്കാരുടെ ഇടയിൽ ഇല്ലാത്ത കഥകൾ പ്രചരിപ്പിക്കാനാണ് ബാദുഷ ശ്രമിച്ചതെന്ന് ഹരീഷ് ആരോപിക്കുന്നു. “ഹരീഷ് സമയത്ത് സെറ്റിൽ വരില്ല”, “എറണാകുളത്താണ് ഷൂട്ടിംഗ് എങ്കിലും ഉച്ചഭക്ഷണം കഴിക്കാൻ കോഴിക്കോട്ടെ വീട്ടിൽ പോകും” എന്നിങ്ങനെയുള്ള വിചിത്രമായ നുണകൾ വരെ സംവിധായകരോടും നിർമ്മാതാക്കളോടും പറഞ്ഞിരുന്നുവെന്ന് ഹരീഷ് ഞെട്ടലോടെ ഓർക്കുന്നു. ഇതെല്ലാം വിശ്വസിച്ച് പലരും തന്നെ സിനിമകളിൽ നിന്ന് ഒഴിവാക്കി.
‘എആർഎം’ നഷ്ടപ്പെട്ടത് അങ്ങനെയാണ്
ടൊവീനോ തോമസ് നായകനായ സൂപ്പർഹിറ്റ് ചിത്രം ‘അജയന്റെ രണ്ടാം മോഷണ’ത്തിൽ (എആർഎം) തനിക്ക് ഒരു വേഷമുണ്ടായിരുന്നുവെന്ന് ഹരീഷ് വെളിപ്പെടുത്തി. എന്നാൽ ആ വേഷം തനിക്ക് നഷ്ടപ്പെട്ടു. പിന്നീട് ടൊവീനോയെ കണ്ടപ്പോൾ “ചേട്ടൻ എന്താണ് ആ സിനിമയിൽ വരാതിരുന്നത്?” എന്ന് ചോദിച്ചു. തന്നെ ആരും വിളിച്ചില്ലെന്ന് ഹരീഷ് മറുപടി നൽകി. അപ്പോഴാണ് ടൊവീനോ സത്യാവസ്ഥ പറയുന്നത്. “ചേട്ടനെ വിളിച്ചിട്ട് ഫോൺ എടുക്കുന്നില്ലെന്നും, ഡേറ്റ് ഇല്ലെന്നുമാണ് ഇയാൾ (ബാദുഷ) പറഞ്ഞത്” എന്ന് ടൊവീനോ പറഞ്ഞു. ഇത് കേട്ടപ്പോഴാണ് താൻ ഇരയായ ചതിയുടെ ആഴം മനസ്സിലായതെന്ന് ഹരീഷ് പറയുന്നു.
കടം നൽകിയ 20 ലക്ഷത്തിൽ ഏകദേശം ആറ് ലക്ഷം രൂപ തിരികെ ലഭിച്ചെങ്കിലും, ബാക്കി തുക ചോദിച്ചതിന്റെ പേരിൽ കരിയർ തന്നെ ഇല്ലാതാക്കാൻ ശ്രമിച്ച ക്രൂരതയെക്കുറിച്ചാണ് ഹരീഷ് കണാരൻ വേദനയോടെ പങ്കുവെക്കുന്നത്.
“എന്റെ മക്കൾ അനുഭവിക്കേണ്ട പണമാണ്”
“ഞാൻ രാവിലെ മുതൽ രാത്രി വരെ കഷ്ടപ്പെട്ട് അധ്വാനിച്ചുണ്ടാക്കിയ പണമാണത്. എന്റെ മക്കൾ അനുഭവിക്കേണ്ട പണം. അത് തിരിച്ചുചോദിച്ചതിന്റെ പേരിൽ എന്റെ അന്നം മുടക്കുന്നത് ശരിയല്ല,” ഹരീഷ് വികാരാധീനനായി പറഞ്ഞു. രണ്ട് വർഷത്തോളം തനിക്ക് ഒരു സിനിമ പോലും ലഭിച്ചില്ലെന്നും, അതിന് കാരണം ബാദുഷ നടത്തിയ നുണപ്രചാരണങ്ങളാണെന്നും ഹരീഷ് ആരോപിക്കുന്നു.
പണം കിട്ടാതെ വന്നപ്പോൾ ‘അമ്മ’ സംഘടനയുടെ അന്നത്തെ ജനറൽ സെക്രട്ടറി ഇടവേള ബാബുവിനെ വിളിച്ച് കാര്യം പറഞ്ഞു. അദ്ദേഹം ഇടപെട്ട് ബാദുഷയുമായി സംസാരിച്ചെങ്കിലും ഫലമുണ്ടായില്ല. “പണം ചോദിക്കാൻ തുടങ്ങിയതോടെയാണ് എനിക്ക് വരാനിരുന്ന പടങ്ങൾ ഓരോന്നായി നഷ്ടപ്പെടാൻ തുടങ്ങിയത്. പല സംവിധായകരോടും നിർമ്മാതാക്കളോടും എന്നെക്കുറിച്ച് ഇയാൾ മോശമായി സംസാരിച്ചു,” ഹരീഷ് ആരോപിച്ചു.
അമ്മ സംഘടനയിൽ താൻ പരാതി നൽകിയിരുന്നില്ലെന്നും, ഇടവേള ബാബുവിനോട് സംസാരിക്കുക മാത്രമാണ് ചെയ്തതെന്നും ഹരീഷ് വ്യക്തമാക്കി. നിയമനടപടിയെക്കുറിച്ച് ഇതുവരെ ചിന്തിച്ചിട്ടില്ലെങ്കിലും, ഇനിയും തന്നെ ദ്രോഹിക്കാനാണ് ബാദുഷയുടെ നീക്കമെങ്കിൽ അതിനെക്കുറിച്ച് ആലോചിക്കുമെന്നും താരം പറഞ്ഞു. ബാദുഷയിൽ നിന്ന് ഇതുവരെയും അനുകൂലമായ പ്രതികരണമൊന്നും ഉണ്ടായിട്ടില്ലെന്നും ഹരീഷ് കണാരൻ കൂട്ടിച്ചേർത്തു.
