നടിയെ ആക്രമിച്ച കേസിൽ ഒന്നാം പ്രതി പൾസർ സുനി ഉൾപ്പെടെയുള്ള ആറുപേർക്ക് 20 വർഷം കഠിനതടവ് വിധിച്ചെങ്കിലും, കേസിൻറെ നാൾവഴികളിൽ അവശേഷിക്കുന്ന ചില ദുരൂഹതകൾ ഇപ്പോഴും ബാക്കിയാണ്. അതിൽ ഏറ്റവും പ്രധാനപ്പെട്ടതാണ് പൾസർ സുനി തുടക്കത്തിൽ പരാമർശിച്ച ‘മാഡം’. കേസിൽ ദിലീപിനെ കുറ്റവിമുക്തനാക്കിയ വിധിന്യായത്തിൽ, പോലീസിന്റെ അന്വേഷണ വീഴ്ചകളെക്കുറിച്ചും ഈ ‘മാഡം’ ആരാണെന്നതിനെക്കുറിച്ചും നിർണ്ണായകമായ പരാമർശങ്ങളാണുള്ളത്. കൃത്യം നടന്ന ദിവസം പൾസർ സുനി ഫോണിൽ വിളിച്ച ‘ശ്രീലക്ഷ്മി’ എന്ന സ്ത്രീ ആര് എന്ന ചോദ്യം വിധിന്യായത്തിലൂടെ വീണ്ടും സജീവമാവുകയാണ്.
ആരാണ് ആ ‘മാഡം’?
കേസിൻറെ ആദ്യഘട്ടത്തിൽ പൾസർ സുനി പോലീസിനോടും മറ്റും വെളിപ്പെടുത്തിയിരുന്നത് ഇതൊരു സ്ത്രീ നൽകിയ ക്വട്ടേഷൻ ആണെന്നായിരുന്നു. എന്നാൽ പിന്നീട് അന്വേഷണം പുരോഗമിച്ചപ്പോൾ ഈ ‘മാഡം’ എന്ന കഥാപാത്രം അപ്രത്യക്ഷമാവുകയും, പകരം ദിലീപ് എന്ന പേരിലേക്ക് അന്വേഷണം കേന്ദ്രീകരിക്കുകയുമാണ് ചെയ്തത്. 1711 പേജുള്ള വിധിന്യായത്തിൽ കോടതി ഈ മാറ്റത്തെ സംശയത്തോടെയാണ് വീക്ഷിക്കുന്നത്.
കൃത്യം നടന്ന ദിവസം പൾസർ സുനി ‘ശ്രീലക്ഷ്മി’ എന്ന പേരുള്ള ഒരു സ്ത്രീയുമായി ഫോണിൽ സംസാരിച്ചതായി രേഖകളിലുണ്ട്. എന്നാൽ, ആരാണ് ഈ ശ്രീലക്ഷ്മി എന്നോ, അവർക്ക് ഈ കൃത്യത്തിൽ എന്തെങ്കിലും പങ്കുണ്ടോ എന്നോ പോലീസ് വിശദമായി അന്വേഷിച്ചില്ലെന്ന് കോടതി ചൂണ്ടിക്കാട്ടുന്നു. സുനിയുമായി അത്രമേൽ അടുപ്പമുള്ള, കൃത്യം നടക്കുന്ന ദിവസം പോലും ഫോണിൽ ബന്ധപ്പെട്ട ഈ സ്ത്രീയെക്കുറിച്ച് അന്വേഷണം നടത്താത്തത് പ്രോസിക്യൂഷൻറെ ഭാഗത്തുനിന്നുള്ള ഗുരുതരമായ വീഴ്ചയായാണ് കോടതി വിലയിരുത്തുന്നത്. അത് സുനിയുമായി ബന്ധമുള്ള ഒരു സ്ത്രീയാണ് അതിൽ വലിയ കാര്യമില്ല എന്ന തരത്തിലാണ് പോലീസ് അതിനെ കൈകാര്യം ചെയ്തത്.
അന്വേഷണം വഴിതിരിച്ചുവിട്ടോ?
തുടക്കത്തിൽ ‘മാഡം’ തന്ന ക്വട്ടേഷൻ എന്ന് പറഞ്ഞ പൾസർ സുനി, പിന്നീട് ജയിലിൽ വെച്ച് ദിലീപിന് അയച്ച കത്തിലൂടെയാണ് ദിലീപിനെ ചിത്രത്തിലേക്ക് കൊണ്ടുവരുന്നത്. എന്നാൽ, സ്ത്രീ നൽകിയ ക്വട്ടേഷൻ എങ്ങനെ ദിലീപ് നൽകിയ ക്വട്ടേഷനായി മാറി എന്നതിനെക്കുറിച്ച് തൃപ്തികരമായ മറുപടി നൽകാൻ പ്രോസിക്യൂഷന് സാധിച്ചില്ല. ശ്രീലക്ഷ്മി എന്ന സ്ത്രീയുമായുള്ള സുനിയുടെ ബന്ധം കേവലം സൗഹൃദമായി കണ്ട് പോലീസ് തള്ളിക്കളഞ്ഞുവെന്നാണ് വിധിന്യായത്തിൽ നിന്നുള്ള സൂചനകൾ.
മാഡം എന്നൊരാൾ ഉണ്ടെന്ന് പൾസർ സുനിയും, പിന്നീട് സംവിധായകൻ ബാലചന്ദ്രകുമാറും വെളിപ്പെടുത്തിയിട്ടും, അന്വേഷണ ഉദ്യോഗസ്ഥർ ആ വഴിക്കുള്ള അന്വേഷണം പാതിവഴിയിൽ ഉപേക്ഷിച്ചു. ഇത് കേസിനെ ദുർബലമാക്കിയെന്നും യഥാർത്ഥ ഗൂഢാലോചന പുറത്തുകൊണ്ടുവരുന്നതിൽ പരാജയപ്പെട്ടുവെന്നും വിമർശനം ഉയരുന്നുണ്ട്.
വിധിക്ക് ശേഷവും അവശേഷിക്കുന്ന ചോദ്യങ്ങൾ
പ്രതികൾക്ക് ശിക്ഷ ലഭിച്ചെങ്കിലും, ‘മാഡം’ എന്ന കഥാപാത്രം ഇപ്പോഴും ഒരു ചോദ്യചിഹ്നമായി തുടരുന്നു. ശ്രീലക്ഷ്മി എന്ന സ്ത്രീ ആരാണെന്നും, അവർക്ക് ഈ കേസുമായി എന്ത് ബന്ധമാണുള്ളതെന്നും കണ്ടെത്തേണ്ടിയിരുന്നു. ദിലീപിനെതിരെ ഗൂഢാലോചന തെളിയിക്കാൻ പ്രോസിക്യൂഷന് സാധിക്കാതെ പോയതിന് പിന്നിലെ പ്രധാന കാരണങ്ങളിലൊന്ന് ഇത്തരം നിർണ്ണായകമായ കണ്ണികൾ വിട്ടുപോയതാണെന്ന് നിയമവിദഗ്ധരും ചൂണ്ടിക്കാട്ടുന്നു.
ദിലീപിനെ കുടുക്കാൻ ഗൂഢാലോചന നടന്നുവെന്ന വാദത്തിന് ബലം നൽകുന്നതാണ് കോടതിയുടെ ഈ നിരീക്ഷണങ്ങൾ. വരും ദിവസങ്ങളിൽ, അപ്പീൽ നടപടികളിലേക്ക് കടക്കുമ്പോൾ ഈ ‘മാഡം’ വീണ്ടും ചർച്ചാവിഷയമാകും എന്ന് ഉറപ്പാണ്.
