പുതിയൊരു വിചിത്ര ചികിത്സാ രീതിയുമായി യുവതി രംഗത്ത് വന്നത് സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചിരിക്കുകയാണ്. സ്വന്തം മൂത്രം കണ്ണിലൊഴിച്ച് ചികിത്സിക്കുന്ന വീഡിയോയാണ് ഒരു യുവതി ഇൻസ്റ്റാഗ്രാമിലൂടെ പങ്കുവെച്ചത്. ഇത് ഇന്റർനെറ്റിൽ വലിയ ഞെട്ടലാണ് ഉണ്ടാക്കിയിരിക്കുന്നത്.
പുണെയിൽ നിന്നുള്ള ‘മരുന്ന് രഹിത ജീവിത പരിശീലക’ (medicine-free life coach) എന്ന് സ്വയം വിശേഷിപ്പിക്കുന്ന നൂപുർ പിറ്റി എന്ന യുവതിയാണ് തന്റെ ഈ അസാധാരണ ചികിത്സാ രീതിയുടെ വീഡിയോ പങ്കുവെച്ചത്. ‘മൂത്രം കൊണ്ടുള്ള നേത്ര ശുദ്ധീകരണം – പ്രകൃതിയുടെ സ്വന്തം മരുന്ന്’ (Urine Eye Wash — Nature’s Own Medicine) എന്ന തലക്കെട്ടോടെയാണ് ഇവർ വീഡിയോ ഇൻസ്റ്റാഗ്രാമിൽ പോസ്റ്റ് ചെയ്തത്. കണ്ണിലെ ചുവപ്പ്, വരൾച്ച, അസ്വസ്ഥത എന്നിവ മാറാൻ ഈ രീതി സഹായിക്കുമെന്നാണ് ഇവർ അവകാശപ്പെടുന്നത്. രാവിലെ ആദ്യം ഒഴിക്കുന്ന മൂത്രമാണ് കണ്ണിൽ ഒഴിക്കാൻ ഉപയോഗിക്കുന്നതെന്നും ഇവർ വീഡിയോയിൽ പറയുന്നുണ്ട്.
വീഡിയോ അതിവേഗം വൈറലായതോടെ വലിയ വിമർശനങ്ങളും ആശങ്കകളുമാണ് ഉയർന്നു വന്നത്. ഡോക്ടർമാരും ആരോഗ്യ വിദഗ്ധരും ഈ പ്രവണതക്കെതിരെ ശക്തമായ മുന്നറിയിപ്പുമായി രംഗത്തെത്തിയിട്ടുണ്ട്. യൂറിൻ അണുവിമുക്തമല്ലെന്നും കണ്ണിൽ ഇത് ഒഴിക്കുന്നത് ഗുരുതരമായ അണുബാധകൾക്കും മറ്റ് ആരോഗ്യ പ്രശ്നങ്ങൾക്കും കാരണമാകുമെന്നും അവർ ചൂണ്ടിക്കാട്ടുന്നു.
പ്രമുഖ ഹെപ്പറ്റോളജിസ്റ്റായ ഡോ. സിറിയക് ആബി ഫിലിപ്സ് (The Liver Doc എന്ന പേരിൽ സോഷ്യൽ മീഡിയയിൽ അറിയപ്പെടുന്നയാൾ) ഈ വീഡിയോ എക്സ് പ്ലാറ്റ്ഫോമിൽ പങ്കുവെച്ചുകൊണ്ട് ശക്തമായ താക്കീത് നൽകി. “നിങ്ങളുടെ കണ്ണിൽ മൂത്രം ഒഴിക്കരുത്. യൂറിൻ അണുവിമുക്തമല്ല,” അദ്ദേഹം കുറിച്ചു. കൂടാതെ, “ഇൻസ്റ്റാഗ്രാമിൽ കൂൾ ആകാൻ ശ്രമിക്കുന്ന ‘ബൂമർ ആന്റിമാർ’ നിരാശാജനകവും ഭയപ്പെടുത്തുന്നതുമാണ്,” എന്നും അദ്ദേഹം കൂട്ടിച്ചേർത്തു.
Watch Video
View this post on Instagram
വീഡിയോയ്ക്ക് താഴെ നിരവധി ആളുകളാണ് എതിർപ്പുകളുമായി എത്തിയത്. “മൂത്രം നിങ്ങളുടെ ശരീരത്തിൽ നിന്ന് പുറന്തള്ളുന്ന മാലിന്യമാണ്, അതിൽ ബാക്ടീരിയകൾ അടങ്ങിയിരിക്കാം, അത് അസിഡിറ്റി ഉള്ളതുമാകാം… എന്നിട്ടും നിങ്ങൾ അത് നിങ്ങളുടെ കണ്ണ് വൃത്തിയാക്കാൻ തിരഞ്ഞെടുക്കുന്നുണ്ടോ? ഇത് തികച്ചും അനാരോഗ്യകരവും നിരുത്തരവാദിത്തപരവുമാണ്,” ഒരാൾ കമന്റ് ചെയ്തു. “അടുത്തത് മലം ഉപയോഗിച്ച് ഫേഷ്യൽ ചെയ്യുമോ?” എന്ന് മറ്റൊരു ഉപയോക്താവ് പരിഹസിച്ചു.
സമൂഹമാധ്യമങ്ങളിൽ ഇത്തരം വിചിത്രമായ ആരോഗ്യ പ്രവണതകൾ പ്രചരിക്കുന്നത് ആശങ്കാജനകമാണെന്ന് ആരോഗ്യ വിദഗ്ധർ പറയുന്നു. ഏതൊരു ചികിത്സാരീതിയും വൈദ്യോപദേശം തേടിയ ശേഷം മാത്രം ചെയ്യേണ്ടതാണെന്നും സ്വയം ചികിത്സ ഇത്തരം ഗുരുതരമായ പ്രത്യാഘാതങ്ങളുണ്ടാക്കുമെന്നും അവർ മുന്നറിയിപ്പ് നൽകുന്നു. ഈ വീഡിയോ ആളുകളെ തെറ്റിദ്ധരിപ്പിക്കുകയും അവരുടെ ആരോഗ്യത്തിന് ദോഷകരമാവുകയും ചെയ്യുമെന്ന ആശങ്കയും ശക്തമാണ്.
