നമ്മുടെ രാജ്യത്ത് പോലീസ് ഉദ്യോഗസ്ഥർ കള്ളത്തെളിവുകൾ ഉണ്ടാക്കിയ ചരിത്രമില്ലേ? മാധ്യമങ്ങൾ കെട്ടിച്ചമച്ച എത്രയോ കഥകൾ പിൽക്കാലത്ത് കോടതികൾ തള്ളിക്കളഞ്ഞിട്ടുണ്ട്. ദിലീപിനെതിരെ കള്ളത്തെളിവുണ്ടാക്കി എന്ന് അയാൾക്ക് തോന്നിയാൽ.. ചോദ്യങ്ങളുമായെത്തിയ മാധ്യമങ്ങളെ വെള്ളം കുടിപ്പിച്ചു മറു ചോദ്യങ്ങളുമായി ഉത്തരം മുട്ടിച്ചു രഞ്ജി പണിക്കർ.

നടിയെ ആക്രമിച്ച കേസിൽ ദിലീപിനെ കുറ്റവിമുക്തനാക്കിയ വിചാരണക്കോടതി വിധിയിൽ പൂർണ വിശ്വാസം രേഖപ്പെടുത്തി നടനും തിരക്കഥാകൃത്തുമായ രഞ്ജി പണിക്കർ. നീതിന്യായ വ്യവസ്ഥ കണ്ടെത്തുന്ന സത്യമാണ് നിലനിൽക്കുന്നതെന്നും, ഈ കേസിൽ യഥാർത്ഥ കുറ്റവാളികൾ ശിക്ഷിക്കപ്പെട്ടുവെന്നും അദ്ദേഹം വ്യക്തമാക്കി. കേസിൽ ദിലീപിനെ വെറുതെ വിട്ടതിനെതിരെ ഡബ്ല്യു.സി.സി അടക്കമുള്ള സംഘടനകളും പൊതുസമൂഹവും ഉയർത്തുന്ന വിമർശനങ്ങളോട് പ്രതികരിക്കുകയായിരുന്നു അദ്ദേഹം.

“കോടതിയുടെ നിലപാടാണ് ശരി എന്ന് വിശ്വസിക്കുന്ന ആളാണ് ഞാൻ. കുറ്റവാളികൾ ശിക്ഷിക്കപ്പെട്ടു എന്ന് തന്നെയാണ് കരുതുന്നത്. ശിക്ഷിക്കപ്പെട്ട ആറുപേർ ആരാണോ, അവർ തന്നെയാണ് കുറ്റവാളികൾ. അതിനപ്പുറം ഒരു ഗൂഢാലോചന ഉണ്ടെന്ന് കോടതി കണ്ടെത്തിയിട്ടില്ല. കോടതി കണ്ടെത്തുന്ന സത്യമാണ് സത്യം. അതിനപ്പുറം മറ്റൊരു സത്യമുണ്ടെങ്കിൽ അത് കോടതിയിൽ തെളിയിക്കപ്പെട്ടിട്ടില്ല എന്ന് മാത്രമേ അർത്ഥമുള്ളൂ,” രഞ്ജി പണിക്കർ പറഞ്ഞു.

ദിലീപിനെതിരെ ഗൂഢാലോചന നടന്നുവെന്ന വാദത്തെക്കുറിച്ചുള്ള ചോദ്യത്തിന്, നമ്മുടെ രാജ്യത്ത് പോലീസ് ഉദ്യോഗസ്ഥർ കള്ളത്തെളിവുകൾ ഉണ്ടാക്കിയ ചരിത്രമില്ലേ എന്നാണ് അദ്ദേഹം മാധ്യമങ്ങളോട് ചോദിച്ചത് . “ദിലീപിനെതിരെ കള്ളത്തെളിവുണ്ടാക്കി എന്ന് അയാൾക്ക് തോന്നിയാൽ അത് അയാളുടെ അഭിപ്രായമാണ്. മാധ്യമങ്ങൾ കെട്ടിച്ചമച്ച എത്രയോ കഥകൾ പിൽക്കാലത്ത് കോടതികൾ തള്ളിക്കളഞ്ഞിട്ടുണ്ട്. മാധ്യമങ്ങൾക്ക് അജണ്ടയില്ലെന്ന് വിശ്വസിക്കാൻ മാത്രം മണ്ടന്മാരല്ല ജനങ്ങൾ,” അദ്ദേഹം മാധ്യമങ്ങളെ രൂക്ഷമായി വിമർശിച്ചു.

വിധിയിൽ അതൃപ്തിയുള്ളവർക്ക് മേൽക്കോടതികളെ സമീപിക്കാനുള്ള അവകാശമുണ്ടെന്നും അദ്ദേഹം ഓർമ്മിപ്പിച്ചു. “സർക്കാരിനും അതിജീവിതയ്ക്കുമൊക്കെ അപ്പീൽ പോകാനുള്ള അവകാശമുണ്ട്. സെഷൻസ് കോടതി വിധിയിൽ ഈ കേസ് അവസാനിക്കുമെന്ന് ആരും കരുതുന്നില്ല. ഹൈക്കോടതിയിലേക്കോ സുപ്രീം കോടതിയിലേക്കോ ഒക്കെ കേസ് പോകാം. എന്നാൽ നിലവിൽ വിചാരണക്കോടതിയുടെ കണ്ടെത്തലിനെ മാനിക്കുകയാണ് വേണ്ടത്,” അദ്ദേഹം കൂട്ടിച്ചേർത്തു.

മെമ്മറി കാർഡ് ചോർന്നതുമായി ബന്ധപ്പെട്ട വിവാദങ്ങളിൽ ഹൈക്കോടതിയുടെ ഇടപെടലുകളെക്കുറിച്ചുള്ള ചോദ്യത്തിന്, ഹൈക്കോടതിക്ക് അത് ഗൗരവമുള്ളതായി തോന്നിയിരുന്നെങ്കിൽ കൃത്യമായ നടപടി ഉണ്ടാകുമായിരുന്നുവെന്നും, കീഴ്ക്കോടതി വിധിയിൽ അത് പ്രതിഫലിക്കാത്തത് തെളിവുകളുടെ അഭാവം കൊണ്ടാകാമെന്നും രഞ്ജി പണിക്കർ അഭിപ്രായപ്പെട്ടു. ദിലീപ് വേട്ടയാടപ്പെട്ടു എന്ന് വിശ്വസിക്കുന്നുണ്ടോ എന്ന ചോദ്യത്തിന്, താൻ ഒരു പക്ഷത്തുമില്ലെന്നും എന്നാൽ കുറ്റവാളിയല്ലെന്ന് കോടതി വിധിച്ച ഒരാൾക്ക് താൻ വേട്ടയാടപ്പെട്ടു എന്ന് തോന്നുന്നത് സ്വാഭാവികമാണെന്നും അദ്ദേഹം വ്യക്തമാക്കി.

വിധിയിൽ നിരാശയുണ്ടോ എന്ന ചോദ്യത്തിന്, താൻ കോടതിയുടെ പ്രക്രിയയിലാണ് വിശ്വസിക്കുന്നതെന്നും, അടിസ്ഥാനരഹിതമായ വാർത്തകളെയും പ്രചാരണങ്ങളെയും കോടതി നിരാകരിച്ചതിൽ സംതൃപ്തിയുണ്ടെന്നും രഞ്ജി പണിക്കർ പറഞ്ഞു. അപ്പീൽ നടപടികളിലൂടെ കേസ് മുന്നോട്ട് പോകുന്നത് സ്വാഭാവികമാണെന്നും അദ്ദേഹം കൂട്ടിച്ചേർത്തു.