ഒരു മനുഷ്യന് എത്രത്തോളം ക്രൂരനാകാൻ കഴിയും? ഈ ചോദ്യത്തിനുള്ള ഏറ്റവും ഭയാനകമായ ഉത്തരമാണ് ജോസഫ് ഫ്രിറ്റ്സൽ (Josef Fritzl) എന്ന ഓസ്ട്രിയക്കാരൻ. ലോകം കണ്ട ഏറ്റവും വലിയ ക്രിമിനലുകളിലൊരാളായി അറിയപ്പെടുന്ന ഇയാൾക്ക്, ശിക്ഷാകാലയളവിൽ ചെറിയൊരു ഇളവ് നൽകാൻ ഓസ്ട്രിയൻ കോടതി അടുത്തിടെ തീരുമാനിച്ചിരിക്കുകയാണ്. സ്വന്തം മകളെ 24 വർഷത്തോളം വീടിന്റെ നിലവറയിലടച്ച് മൃ#ഗീയമായി പീ#ഡിപ്പിച്ച ഈ കൊടുംകുറ്റവാളിയെ, നിലവിലെ സൈക്യാട്രിക് ഡിറ്റൻഷൻ സെന്ററിൽ (മാനസികരോഗികളായ കുറ്റവാളികളെ പാർപ്പിക്കുന്ന അതിസുരക്ഷാ ജയിൽ) നിന്നും ഒരു സാധാരണ ജയിലിലേക്ക് മാറ്റാനാണ് കോടതി ഉത്തരവിട്ടിരിക്കുന്നത്. ഈ മാറ്റം ഫ്രിറ്റ്സലിന്റെ നിയമപോരാട്ടത്തിൽ വലിയൊരു വിജയമായാണ് വിലയിരുത്തപ്പെടുന്നത്.
ആരാണ് ജോസഫ് ഫ്രിറ്റ്സൽ? എന്തായിരുന്നു അയാളുടെ ക്രൂരത?
2008-ലാണ് ഓസ്ട്രിയയിലെ അംസ്റ്റെറ്റൻ (Amstetten) എന്ന ശാന്തമായ നഗരത്തിൽ നിന്നും മനുഷ്യ മനസ്സാക്ഷിയെ മരവിപ്പിക്കുന്ന ആ വാർത്ത പുറത്തുവരുന്നത്. 1984-ൽ തന്റെ 18 വയസ്സുകാരിയായ മകൾ എലിസബത്തിനെ ഫ്രിറ്റ്സൽ സ്വന്തം വീടിന്റെ അടിത്തട്ടിൽ പ്രത്യേകം നിർമ്മിച്ച, ശബ്ദം പുറത്തുകേൾക്കാത്ത ഒരു രഹസ്യ അറയിൽ പൂട്ടിയിട്ടു. മകൾ ഏതെങ്കിലും അജ്ഞാത മതസംഘടനയിൽ ചേർന്ന് ഒളിച്ചോടിപ്പോയി എന്നായിരുന്നു ഇയാൾ ഭാര്യയെയും നാട്ടുകാരെയും വിശ്വസിപ്പിച്ചിരുന്നത്. എന്നാൽ തുടർന്നുള്ള 24 നീണ്ട വർഷങ്ങൾ ആ പെൺകുട്ടിക്ക് ആ ഇരുട്ടറയിൽ അനുഭവിക്കേണ്ടി വന്നത് വിവരിക്കാനാകാത്ത നരകയാതനയായിരുന്നു.
സ്വന്തം അച്ഛനിൽ നിന്നും നേരിടേണ്ടി വന്ന നിരന്തരമായ ലൈം#ഗിക പീഡ#നങ്ങളെത്തുടർന്ന് അവൾ അവിടെ വെച്ച് 7 കുഞ്ഞുങ്ങൾക്ക് ജന്മം നൽകി. ഇതിൽ ഒരു കുഞ്ഞ് മതിയായ ചികിത്സ ലഭിക്കാതെ ജനിച്ച് ദിവസങ്ങൾക്കകം തന്നെ മരിച്ചുപോയി. ഫ്രിറ്റ്സൽ യാതൊരു ദയയുമില്ലാതെ ആ പിഞ്ചുകുഞ്ഞിന്റെ മൃതദേഹം ഫർണസിൽ ഇട്ട് കത്തിച്ചുകളഞ്ഞു. ബാക്കിയുള്ള കുഞ്ഞുങ്ങളിൽ മൂന്ന് പേർ പുറംലോകം എന്താണെന്നുപോലും അറിയാതെ, സൂര്യപ്രകാശം പോലുമേൽക്കാതെ അമ്മയ്ക്കൊപ്പം ആ ഇരുട്ടറയിൽ തന്നെ വളർന്നു. മറ്റ് മൂന്ന് പേരെ മകൾ വീടിന്റെ പടിവാതിലിൽ ഉപേക്ഷിച്ചു പോയതാണെന്ന് കളവ് പറഞ്ഞ് വിശ്വസിപ്പിച്ച് ഫ്രിറ്റ്സൽ തന്റെ ഭാര്യയ്ക്കൊപ്പം വീടിന്റെ മുകളിലത്തെ നിലയിൽ വളർത്തി. താഴെ നിലവറയിൽ സ്വന്തം മകൾ അനുഭവിക്കുന്ന കൊടിയ ക്രൂരതകളെക്കുറിച്ച് ഭാര്യ റോസ്മേരിക്ക് യാതൊരു അറിവുമുണ്ടായിരുന്നില്ല എന്നാണ് അന്വേഷണ ഉദ്യോഗസ്ഥർ പറയുന്നത്.
ക്രൂരതയുടെ ചുരുളഴിയുന്നു
ഒടുവിൽ 2008-ൽ നിലവറയിലുണ്ടായിരുന്ന മൂത്ത കുട്ടിക്ക് കടുത്ത അസുഖം ബാധിച്ചതിനെ തുടർന്ന് ആശുപത്രിയിൽ പ്രവേശിപ്പിക്കേണ്ടി വന്നതോടെയാണ് ഈ കൊടുംക്രൂരതയുടെ ചുരുളഴിയുന്നത്. സംഭവം പുറത്തുവന്നതോടെ ഫ്രിറ്റ്സലിനെ മാധ്യമങ്ങൾ ‘അംസ്റ്റെറ്റനിലെ രാക്ഷസൻ’ (Monster of Amstetten) എന്ന് വിളിച്ചു. 2009-ൽ കൊലപാതകം, ബലാ#ത്സംഗം, തട്ടിക്കൊണ്ടുപോകൽ, അടിമയാക്കി വെക്കൽ തുടങ്ങിയ കുറ്റങ്ങൾ ചുമത്തി കോടതി ഫ്രിറ്റ്സലിന് ജീവപര്യന്തം തടവുശിക്ഷ വിധിക്കുകയും ചെയ്തു.
പുതിയ കോടതി വിധി
ഓസ്ട്രിയയിലെ ക്രെംസ് (Krems) നഗരത്തിലെ മൂന്നംഗ ജഡ്ജിമാരുടെ പാനലാണ് ഫ്രിറ്റ്സലിനെ സാധാരണ ജയിലിലേക്ക് മാറ്റാൻ ഇപ്പോൾ ഉത്തരവിട്ടിരിക്കുന്നത്. 90 വയസ്സുകാരനായ ഫ്രിറ്റ്സലിന് ഇപ്പോൾ കടുത്ത ഡിമെൻഷ്യ (Dementia) അഥവാ ഓർമ്മക്കുറവ് ബാധിച്ചിട്ടുണ്ടെന്നും, ശാരീരികമായി തീരെ അവശനായ ഇയാൾ സമൂഹത്തിന് ഇനി ഒരു ഭീഷണിയല്ലെന്നുമുള്ള മാനസികാരോഗ്യ വിദഗ്ദ്ധരുടെ റിപ്പോർട്ടുകളുടെ അടിസ്ഥാനത്തിലാണ് ഈ തീരുമാനം. എന്നിരുന്നാലും, ഇയാളെ പൂർണ്ണമായി ജയിൽ മോചിതനാക്കണമെന്ന അഭിഭാഷകരുടെ ആവശ്യം കോടതി തള്ളിക്കളഞ്ഞു.
സാധാരണ ജയിലിലേക്ക് മാറ്റിയാലും 10 വർഷത്തെ പ്രൊബേഷൻ കാലയളവിൽ ഇയാൾ കൃത്യമായി സൈക്കോതെറാപ്പിക്കും മറ്റ് പരിശോധനകൾക്കും വിധേയനാകണമെന്ന് കർശന നിർദ്ദേശമുണ്ട്. കോടതി വാദം കേൾക്കുന്നതിനിടയിൽ ഫ്രിറ്റ്സൽ പലപ്പോഴും കരയുന്ന അവസ്ഥയിലായിരുന്നുവെന്ന് അയാളുടെ അഭിഭാഷകയായ ആസ്ട്രിഡ് വാഗ്നർ (Astrid Wagner) പറഞ്ഞു. “താൻ ചെയ്ത ക്രൂരതകളിൽ അവന് അതിയായ കുറ്റബോധമുണ്ട്. കഴിഞ്ഞതെല്ലാം തിരുത്താൻ കഴിഞ്ഞിരുന്നെങ്കിലെന്നും അവൻ ആഗ്രഹിക്കുന്നു,” വാഗ്നർ മാധ്യമങ്ങളോട് വ്യക്തമാക്കി.
ഓർമ്മ നശിച്ച് ശാരീരികമായി തളർന്ന ഈ വയോധികനെ വരും കാലങ്ങളിൽ ഏതെങ്കിലും നഴ്സിംഗ് ഹോമിലേക്ക് മാറ്റാൻ കഴിയുമെന്ന പ്രതീക്ഷയിലാണ് ഇയാളുടെ അഭിഭാഷക. മനുഷ്യരൂപത്തിലുള്ള ചില രാക്ഷസന്മാർ സമൂഹത്തിൽ എങ്ങനെ മറഞ്ഞിരിക്കുന്നു എന്നതിന്റെ ഏറ്റവും ഭയാനകമായ ഉദാഹരണമായി ജോസഫ് ഫ്രിറ്റ്സലിന്റെ ഈ കേസ് ചരിത്രത്തിൽ എന്നെന്നും നിലനിൽക്കും.
