ബോളിവുഡിലെ ഖാൻ ത്രയത്തിലെ പ്രമുഖരായ ആമിർ ഖാനും ഷാരൂഖ് ഖാനും തമ്മിൽ ഇപ്പോൾ നല്ല സൗഹൃദത്തിലാണെങ്കിലും, ഒരു കാലത്ത് ഇരുവരും പരസ്പരം വാക്കുകൾ കൊണ്ട് ഏറ്റുമുട്ടുകയും ‘ചിഛോര’ എന്ന് വിളിച്ച് ആക്ഷേപിക്കുകയും ചെയ്തിരുന്നു. ആ പഴയകാലത്തെക്കുറിച്ചും ഷാരൂഖ് തനിക്കെതിരെ അവാർഡ് വേദികളിൽ തമാശകൾ പറയാറുണ്ടായിരുന്നതിനെക്കുറിച്ചും ആമിർ ഖാൻ അടുത്തിടെ ‘ദ ലല്ലൻടോപ്പ്’ എന്ന യൂട്യൂബ് ചാനലിന് നൽകിയ അഭിമുഖത്തിൽ തുറന്നുപറഞ്ഞത് വലിയ വാർത്തയായിരിക്കുകയാണ്. ഇതിനിടയിലാണ് തനിക്ക് ഷാരൂഖ് എന്ന് പേരുള്ള ഒരു നായ ഉണ്ടായിരുന്നതായും ആമിർ വെളിപ്പെടുത്തിയത്!
ഷാരൂഖ് എന്ന നായയും അവാർഡ് നിശകളിലെ തമാശകളും
തനിക്കൊരു നായയുണ്ടായിരുന്നു എന്നും അതിന് ഷാരൂഖ് എന്ന് പേരിട്ടിരുന്നു എന്നും ആമിർ പറഞ്ഞപ്പോൾ, അത് ഷാരൂഖ് ഖാനെ കളിയാക്കാനാണോ എന്ന ചോദ്യം ഉയർന്നു. എന്നാൽ ആമിർ അതിന് വ്യക്തമായ മറുപടി നൽകി. “ഷാരൂഖ് പലപ്പോഴും എന്നെക്കുറിച്ച് തമാശകൾ പറയാറുണ്ടല്ലോ, ഓരോ വർഷവും അവാർഡ് ഫംഗ്ഷനുകൾ നടക്കുമ്പോൾ. ഞാൻ അതിലൊന്നും പോകാറില്ല. അതുകൊണ്ട് എല്ലാ വർഷവും അവൻ എന്നെക്കുറിച്ച് തമാശകൾ പറയും,” ആമിർ ഖാൻ വിശദീകരിച്ചു. ഷാരൂഖ് ഖാന്റെ ഈ പരിഹാസങ്ങൾക്കുള്ള ഒരു മറുപടിയായിരുന്നോ ആ നായയുടെ പേര് എന്നത് രസകരമായ ഒരു ചോദ്യമായി അവശേഷിക്കുന്നു.
‘ചിഛോര’ വിവാദവും പഴയകാല മത്സരവും
ഷാരൂഖ് ഖാനും താനും പരസ്പരം കാര്യങ്ങൾ പറഞ്ഞിരുന്ന ഒരു കാലമുണ്ടായിരുന്നെന്നും, ഒരുപക്ഷേ തന്നോട് ഷാരൂഖിന് അന്ന് അതൃപ്തി ഉണ്ടായിരുന്നിരിക്കാമെന്നും ആമിർ ഓർത്തെടുത്തു. “കാരണം ഞാൻ എന്റെ അഭിമുഖങ്ങളിൽ മറ്റുള്ളവരെക്കുറിച്ച് സംസാരിക്കാറില്ല,” അദ്ദേഹം കൂട്ടിച്ചേർത്തു.
എന്നാൽ ഈ പഴയകാലത്തെക്കുറിച്ച് ആമിർ ഇപ്പോൾ പറയുന്നത് ഇങ്ങനെയാണ്: “ഏതായാലും അതൊക്കെ നമുക്ക് പിന്നിലേക്ക് ഉപേക്ഷിക്കാം. ഷാരൂഖ് എപ്പോൾ എന്റെ നല്ല സുഹൃത്താണ്. ഞങ്ങളുടെ കരിയർ തുടങ്ങിയപ്പോൾ സ്വാഭാവികമായ ഒരു മത്സരം ഞങ്ങൾക്കിടയിൽ ഉണ്ടായിരുന്നു. പക്ഷേ അത് 10-15 വർഷം മുൻപ് അവസാനിച്ചു – എന്റെ ഭാഗത്തുനിന്നെങ്കിലും, അവന്റെ ഭാഗത്തുനിന്നും അങ്ങനെതന്നെയായിരുന്നു എന്ന് ഞാൻ കരുതുന്നു. അതൊരു കുട്ടിക്കളിയായിരുന്നു.”
ഈ സംസാരത്തിനിടയിലാണ് ഇരുവരും തമ്മിലുണ്ടായ കുപ്രസിദ്ധമായ ‘ചിഛോര’ വിവാദവും ആമിർ ഓർത്തെടുത്തത്.
‘ചിഛോര’ യുദ്ധം: തുടക്കവും ഒടുക്കവും
ഈ ‘ചിഛോര’ വിവാദത്തിന്റെ തുടക്കം 2009-ലാണ്. ആമിർ ഖാന്റെ സൂപ്പർഹിറ്റ് ചിത്രം ‘3 ഇഡിയറ്റ്സ്’ ഡിസംബർ 2009-ൽ റിലീസ് ചെയ്തപ്പോൾ, തന്റെ ചിത്രത്തിന്റെ പ്രചാരണത്തിനായി ആമിർ രാജ്യത്തിന്റെ വിവിധ ഭാഗങ്ങളിലൂടെ യാത്ര ചെയ്തിരുന്നു. ഇതിനെക്കുറിച്ച് ഷാരൂഖ് ഖാൻ, ഒരു റിപ്പോർട്ടറുടെ ചോദ്യത്തിന് മറുപടിയായി പറഞ്ഞ വാക്കുകളാണ് വിവാദത്തിന് തിരികൊളുത്തിയത്.
ഷാരൂഖിന്റെ വാക്കുകൾ ഇങ്ങനെയായിരുന്നു: “ഇങ്ങനെയൊരു വാക്ക് ഉപയോഗിക്കുന്നതിൽ ഞാൻ ക്ഷമ ചോദിക്കുന്നു, പക്ഷേ ‘ഇതൊരുതരം ചിഛോരപ്പൻ (അൽപം തരംതാണ പരിപാടി) ആയി തോന്നുന്നു.’ എന്റെ സിനിമ പ്രമോട്ട് ചെയ്യാൻ ഞാൻ ഒരിക്കലും ഇത്രയും ദൂരേക്ക് പോകില്ല. ഓരോ സിനിമയ്ക്കും പ്രൊമോഷൻ ചെയ്യാൻ ഓരോ വഴിയുണ്ട്, ഈ സിനിമ പ്രൊമോട്ട് ചെയ്യാൻ ഞങ്ങൾക്ക് ഞങ്ങളുടെതായ തന്ത്രങ്ങളുണ്ട് (‘മൈ നെയിം ഈസ് ഖാൻ’ എന്ന ചിത്രത്തെക്കുറിച്ച് പറഞ്ഞു കൊണ്ട് ഷാരൂഖ് പറയുന്നു ).”
ഷാരൂഖിന്റെ ഈ കമന്റിന് ആമിർ ഖാൻ അന്ന് നൽകിയ മറുപടിയാണ് ‘ചിഛോര’ വാദപ്രതിവാദത്തെ അടുത്ത തലത്തിലേക്ക് എത്തിച്ചത്. എബിപി ന്യൂസിന് നൽകിയ അഭിമുഖത്തിൽ ആമിർ ഇങ്ങനെ പറഞ്ഞു: “ഷാരൂഖ് ഒരു ബുദ്ധിമാനാണ്. ഞാൻ നമ്മുടെ രാജ്യത്തിന്റെ വിവിധ പ്രദേശങ്ങളിലേക്ക് പോകുന്നത് ‘ചിഛോരപ്പൻ’ ആണെന്ന് അവൻ കരുതുന്നുണ്ടെങ്കിൽ എനിക്കെന്ത് പറയാൻ കഴിയും? ഇത് അവന്റെ ചിന്തയാണ്. തരംതാണ പരിപാടിയെക്കുറിച്ച് പറയുകയാണെങ്കിൽ, ഷാരൂഖിന് അതിനെക്കുറിച്ച് കൂടുതൽ അറിയാമായിരിക്കും, കാരണം അവൻ സ്വന്തം ജീവിതത്തിൽ ഒരുപാട് തരംതാണ രീതികളിൽ പെരുമാറുന്നുണ്ട്. അവൻ ഈ കാര്യങ്ങളിലൊക്കെ ഒരു വിദഗ്ദ്ധനാണ്.”
ഈ വിവാദങ്ങളെല്ലാം ഇന്ന് തമാശകളായി മാറിക്കഴിഞ്ഞു. കാലം മാറിയപ്പോൾ ബോളിവുഡിലെ ഈ രണ്ട് വലിയ താരങ്ങളും പരസ്പരം ബഹുമാനിക്കുകയും സൗഹൃദം പങ്കുവെക്കുകയും ചെയ്യുന്ന കാഴ്ച സിനിമാപ്രേമികൾക്ക് സന്തോഷം നൽകുന്ന ഒന്നാണ്. പഴയകാലത്തെ ഈ വാക്പോരുകൾ അവരുടെ സൗഹൃദത്തിന്റെ ഒരു ഭാഗം മാത്രമായിരുന്നെന്ന് വേണം കരുതാൻ.
