ദാമ്പത്യ ജീവിതത്തിൽ പലരും മനസ്സിൽ കൊണ്ടുനടക്കുന്ന, എന്നാൽ പുറത്തുചോദിക്കാൻ മടിക്കുന്ന ചില ചോദ്യങ്ങളുണ്ട്. അതിലൊന്നാണ്, “സന്തുഷ്ടമായ ഒരു ദാമ്പത്യത്തിന് ആഴ്ചയിൽ എത്ര തവണ ലൈം#ഗിക ബന്ധത്തിൽ ഏർപ്പെടണം?” എന്നത്. പലപ്പോഴും സുഹൃത്തുക്കളുടെ വീരവാദങ്ങൾ കേട്ടോ, സിനിമകളിലെ രംഗങ്ങൾ കണ്ടോ സ്വന്തം ജീവിതത്തിൽ എന്തൊക്കെയോ കുറവുകളുണ്ടെന്ന് ഭയപ്പെടുന്നവരാണ് ഭൂരിഭാഗം പേരും. ജോലിത്തിരക്കും, കുട്ടികളെ വളർത്തുന്നതിലെ സമ്മർദ്ദവും, സാമ്പത്തിക പ്രശ്നങ്ങളുമെല്ലാം കിടപ്പറയിലെ അടുപ്പത്തെ ബാധിക്കാറുണ്ട്.
എന്നാൽ, ആകുലപ്പെടാൻ വരട്ടെ. ദീർഘകാലം നിലനിൽക്കുന്ന, സന്തോഷകരമായ ബന്ധത്തിന് ‘കണക്കുകളേക്കാൾ’ പ്രധാനം മറ്റു ചിലതാണെന്ന് പറയുകയാണ് വാഷിംഗ്ടൺ സർവ്വകലാശാലയിലെ പ്രൊഫസറും ഹ്യൂമൻ സെക്ഷ്വാലിറ്റി വിദഗ്ധയുമായ ഡോ. നിക്കോൾ മക്നിക്കോൾസ് (Dr. Nicole McNichols).
ആ ‘മാജിക്കൽ നമ്പർ’ എത്ര?
ദമ്പതികൾ കാത്തിരുന്ന ആ ചോദ്യത്തിന് ഡോ. നിക്കോൾ കൃത്യമായൊരു ഉത്തരം നൽകുന്നുണ്ട്. “ആഴ്ചയിൽ ഒരിക്കൽ” (Once a week). അതെ, കേൾക്കുമ്പോൾ അത്ഭുതം തോന്നിയേക്കാം. ദിവസവും ബന്ധപ്പെട്ടാലേ സ്നേഹം നിലനിൽക്കൂ എന്ന ധാരണ തെറ്റാണെന്നാണ് പഠനങ്ങൾ തെളിയിക്കുന്നത്. ആഴ്ചയിൽ ഒരിക്കൽ ലൈംഗിക ബന്ധത്തിൽ ഏർപ്പെടുന്ന ദമ്പതികളിലെ സംതൃപ്തി (Relationship Satisfaction), അതിൽ കൂടുതൽ തവണ ബന്ധപ്പെടുന്നവരുമായി താരതമ്യം ചെയ്യുമ്പോൾ ഒട്ടും കുറവല്ല.
“ആഴ്ചയിൽ ഒരിക്കൽ എന്നത് വലിയൊരു കണക്കല്ല. എന്നാൽ തിരക്കിട്ട ജീവിതത്തിനിടയിലും പങ്കാളികൾക്ക് പരസ്പരം അടുത്തിരിക്കാൻ ഈ സമയം കണ്ടെത്താനാകുന്നത് അവരുടെ ബന്ധത്തിന്റെ ദൃഢതയെയാണ് സൂചിപ്പിക്കുന്നത്,” മോഡേൺ ലവ് പോഡ്കാസ്റ്റിൽ സംസാരിക്കവെ ഡോ. നിക്കോൾ വ്യക്തമാക്കി. ആഴ്ചയിൽ കൂടുതൽ തവണ ബന്ധപ്പെടാൻ ആഗ്രഹിക്കുന്നവർക്ക് അത് തുടരാം, അത് നല്ലതുമാണ്. എന്നാൽ ‘ആഴ്ചയിൽ ഒരിക്കൽ’ എന്ന കണക്ക് പാലിക്കുന്നവരും പൂർണ്ണ സംതൃപ്തരാണെന്നാണ് കണ്ടെത്തൽ.
അടിമുടി മാറ്റം വേണം, മാസത്തിലൊരിക്കലെങ്കിലും!
എണ്ണം (Quantity) അല്ല, ഗുണമാണ് (Quality) പ്രധാനം. ഒരേ രീതിയിലുള്ള ജീവിതശൈലി മടുപ്പുളവാക്കുന്നത് പോലെ, കിടപ്പറയിലെ ഒരേ രീതിയിലുള്ള ശീലങ്ങളും (Monotony) ബന്ധത്തെ വിരസമാക്കിയേക്കാം. ഇത് മറികടക്കാൻ ഡോ. നിക്കോൾ നിർദ്ദേശിക്കുന്നത് ‘നോവൽറ്റി’ (Novelty) അഥവാ പുതുമ കൊണ്ടുവരിക എന്നതാണ്.
ഇതിനായി വലിയ സാഹസങ്ങളൊന്നും കാണിക്കേണ്ടതില്ല. മാസത്തിൽ ഒരിക്കലെങ്കിലും പതിവ് രീതികളിൽ നിന്ന് ചെറിയ മാറ്റങ്ങൾ പരീക്ഷിക്കാം.
സമയവും സ്ഥലവും: എപ്പോഴും രാത്രിയിൽ, ഒരേ മുറിയിൽ വെച്ചാകണം എന്നില്ല. സമയത്തിലോ സ്ഥലത്തോ മാറ്റം വരുത്താം. വെക്കേഷൻ സമയത്തോ, അല്ലെങ്കിൽ മറ്റൊരു മുറിയിലോ ആകാം.
അന്തരീക്ഷം: എപ്പോഴും ലൈറ്റ് അണച്ചിട്ട് (Lights off) ബന്ധപ്പെടുന്നവർ ഇടയ്ക്ക് ലൈറ്റ് ഇട്ടുകൊണ്ട് (Lights on) പരീക്ഷിക്കാം.
രീതികൾ: സ്ഥിരം പൊസിഷനുകളിൽ നിന്ന് മാറി, പങ്കാളികൾക്ക് ഇരുവർക്കും സൗകര്യപ്രദമായ പുതിയ രീതികൾ പരീക്ഷിക്കാം. “മിഷ#നറി പൊസിഷനിൽ നിന്ന് ലിഫ്റ്റഡ് മിഷനറിയിലേക്ക് മാറുന്നത് പോലും വലിയ മാറ്റം കൊണ്ടുവരും,” ഡോക്ടർ പറയുന്നു.
സെ#ക്സും സന്തോഷവും: കോഴി ആണോ മുട്ട ആണോ ആദ്യം?
നല്ല ലൈം#ഗിക ജീവിതമാണോ നല്ല ബന്ധം ഉണ്ടാക്കുന്നത്, അതോ നല്ല ബന്ധമാണോ ലൈം#ഗിക ജീവിതം മെച്ചപ്പെടുത്തുന്നത്? ഇതൊരു തർക്കവിഷയമാണ്. എന്നാൽ ആയിരക്കണക്കിന് ദമ്പതികളുടെ ഡയറികൾ പരിശോധിച്ചതിൽ നിന്ന് ഡോ. നിക്കോൾ കണ്ടെത്തിയത്, ലൈം#ഗിക സംതൃപ്തി വർദ്ധിക്കുന്ന സമയങ്ങളിലെല്ലാം ജീവിതത്തോടുള്ള സംതൃപ്തിയും കൂടിയിട്ടുണ്ട് എന്നാണ്. അതായത്, കിടപ്പറയിലെ സന്തോഷം നേരിട്ട് തന്നെ ദാമ്പത്യത്തിന്റെ കെട്ടുറപ്പിനെ ബാധിക്കുന്നുണ്ട്.
യാഥാർത്ഥ്യം എന്ത്?
യുകെയിലെ പ്രമുഖ ഏജൻസിയായ ‘യുഗവ്’ (YouGov) നടത്തിയ സർവ്വേ പ്രകാരം പത്തിൽ ആറ് ദമ്പതികളും ആഴ്ചയിൽ ഒരിക്കൽ പോലും ലൈം#ഗിക ബന്ധത്തിൽ ഏർപ്പെടുന്നില്ല എന്നതാണ് സത്യം. പത്തിൽ ഒരാൾ മാത്രമാണ് ആഴ്ചയിൽ കൃത്യമായി ഇത് പാലിക്കുന്നത്. ജോലി സമ്മർദ്ദവും, സ്മാർട്ട്ഫോണുകളുടെ അമിത ഉപയോഗവും, ഉറക്കക്കുറവും ഇതിന് കാരണമാകുന്നുണ്ട്.
ചുരുക്കത്തിൽ:
മറ്റുള്ളവരുടെ കണക്കുകൾ നോക്കി വിഷമിക്കേണ്ട കാര്യമില്ല. പരസ്പരം തുറന്നു സംസാരിക്കുക (Communication), പങ്കാളിയുടെ ഇഷ്ടങ്ങൾ തിരിച്ചറിയുക, ആഴ്ചയിൽ ഒരിക്കലെങ്കിലും സ്നേഹം പങ്കിടാൻ സമയം കണ്ടെത്തുക. എണ്ണത്തിലല്ല, ആ നിമിഷങ്ങളിലെ അടുപ്പത്തിനാണ് പ്രാധാന്യം നൽകേണ്ടത്. “നിങ്ങളുടെ ആവശ്യങ്ങൾ തുറന്നു പറയാനും, പരസ്പരം ആസ്വദിക്കാനും കഴിയുന്നിടത്താണ് യഥാർത്ഥ വിജയം,” ഡോ. നിക്കോൾ ഓർമ്മിപ്പിക്കുന്നു.
