ഇന്ത്യയിൽ സ്ത്രീകളിൽ കാണപ്പെടുന്ന കാൻസറുകളിൽ മുൻപന്തിയിലാണ് ഗർഭാശയ ഗള കാൻസർ (Cervical Cancer). എന്നാൽ ഇതിൽ അമ്പരപ്പിക്കുന്ന ഒരു വൈരുദ്ധ്യമുണ്ട്. ലോകത്ത് വെച്ച് നോക്കുമ്പോൾ, ഒന്നിലധികം ലൈംഗിക പങ്കാളികളുള്ള (Promiscuity) സ്ത്രീകൾ താരതമ്യേന കുറവുള്ള രാജ്യമാണ് ഇന്ത്യ. ഭൂരിഭാഗം ഇന്ത്യൻ സ്ത്രീകളും ജീവിതത്തിൽ ഒരു പങ്കാളിയുമായി (ഭർത്താവ്) മാത്രം ബന്ധം പുലർത്തുന്നവരാണ്. എന്നിട്ടും എന്തുകൊണ്ട് ഇവർക്ക് കാൻസർ വരുന്നു?
അതിൽ വളരെ പ്രധാനമായ ഒരു കാരണം ഭർത്താവിന്റെ ജീവിതശൈലിയിലാണെന്ന് പഠനങ്ങൾ തെളിയിക്കുന്നു. ഭർത്താവിന്റെ അവിഹിത ബന്ധങ്ങളും, ബീഡി വലി പോലുള്ള ശീലങ്ങളും എങ്ങനെയാണ് നിരപരാധിയായ ഭാര്യയെ രോഗിയാക്കുന്നത് എന്ന് നോക്കാം.
1. ഭർത്താവിന്റെ വിവാഹേതര ബന്ധങ്ങൾ.
ഇന്ത്യയിൽ നടത്തിയ പഠനത്തിൽ കണ്ടെത്തിയത്, ജീവിതത്തിൽ ഒരു പങ്കാളി മാത്രമുള്ള സ്ത്രീകളിലെ കാൻസർ ബാധയ്ക്ക് പ്രധാന കാരണം ഭർത്താവിന്റെ ലൈംഗിക ചരിത്രമാണ് എന്നാണ്.
വിവാഹത്തിന് മുമ്പും ശേഷവും: ഭർത്താവിന് വിവാഹത്തിന് മുൻപ് ലൈംഗിക ബന്ധങ്ങൾ ഉണ്ടായിരുന്നെങ്കിൽ ഭാര്യയ്ക്ക് കാൻസർ വരാനുള്ള സാധ്യത 1.9 മടങ്ങും, വിവാഹശേഷം മറ്റ് ബന്ധങ്ങൾ ഉണ്ടെങ്കിൽ അത് 2.7 മടങ്ങും കൂടുതലാണ്.
അപകടകരമായ അവസ്ഥ: ഇനി ഭർത്താവിന് വിവാഹത്തിന് മുൻപും, അതിനുശേഷം വിവാഹേതര ബന്ധവും ഉണ്ടെങ്കിൽ ഭാര്യയ്ക്ക് ഗർഭാശയ കാൻസർ വരാനുള്ള സാധ്യത 6.9 മടങ്ങ് വർദ്ധിക്കുന്നു. മൂന്നിലധികം സ്ത്രീകളുമായി ബന്ധം പുലർത്തുന്ന ഭർത്താക്കന്മാരുടെ ഭാര്യമാർ അതീവ അപകടസാധ്യതയുള്ളവരാണ്.
2. ലൈംഗിക രോഗങ്ങൾ
ഭർത്താവിന് വിവാഹത്തിന് മുൻപോ ശേഷമോ ലൈംഗിക രോഗങ്ങൾ (Sexually Transmitted Diseases) വന്നിട്ടുണ്ടെങ്കിൽ അത് ഭാര്യയുടെ ആരോഗ്യത്തെ ഗുരുതരമായി ബാധിക്കും. പഠനങ്ങൾ പ്രകാരം, വിവാഹശേഷം ഭർത്താവിന് ലൈംഗിക രോഗങ്ങൾ വന്നിട്ടുണ്ടെങ്കിൽ ഭാര്യയ്ക്ക് കാൻസർ വരാനുള്ള സാധ്യത 5.9 മടങ്ങാണ്.
3. ബീഡി വലി
നേരത്തെ പറഞ്ഞത് പോലെ പുകവലി വലിയൊരു വില്ലനാണ്. എന്നാൽ ഈ പഠനത്തിൽ എടുത്തു പറയുന്ന ഒരു കാര്യമുണ്ട് – സിഗരറ്റിനേക്കാൾ അപകടകാരിയായി കണ്ടെത്തിയത് ‘ബീഡി’ ആണ്. 20 വർഷത്തിലധികമായി ബീഡി വലിക്കുന്ന ശീലമുള്ള ഭർത്താക്കന്മാരുടെ ഭാര്യമാർക്ക് കാൻസർ സാധ്യത 2.4 മടങ്ങ് കൂടുതലാണ്. അതിനര്ത്ഥം സിഗരറ്റ് വലി സുരക്ഷിതമാണന്നല്ല. സിഗരറ്റും വലിയ പ്രശ്നക്കാരന് തന്നെ.
4. ആർത്തവ സമയത്തെ നിർബന്ധിത ബന്ധം
സ്ത്രീകളുടെ ശരീരം ഏറ്റവും കൂടുതൽ ശ്രദ്ധ ആവശ്യപ്പെടുന്ന സമയമാണ് ആർത്തവ ദിനങ്ങൾ. ഈ സമയത്ത് ശുചിത്വം പാലിച്ചില്ലെങ്കിൽ അത് ഗുരുതരമായ ആരോഗ്യപ്രശ്നങ്ങൾക്ക് വഴിവെക്കും. പക്ഷെ പല ഭര്ത്താക്കന്മാരും ആ സമയത്ത് ലൈംഗിക ബന്ധത്തിനു ഭാര്യമാരെ നിര്ബന്ധിക്കുന്നവരാണ്.
* ആർത്തവ സമയത്ത് ഗർഭാശയമുഖം (Cervix) അല്പം തുറന്നിരിക്കുന്ന അവസ്ഥയിലായിരിക്കും. അതിനാൽ ബാക്ടീരിയൽ അണുബാധകൾ പെട്ടെന്ന് ഉണ്ടാകാൻ സാധ്യതയുണ്ട്.
* ഫുജിയാൻ മെഡിക്കൽ യൂണിവേഴ്സിറ്റിയിലെ ഡോ. ട്രാൻ ലി ഹോങ്ങിന്റെ അഭിപ്രായത്തിൽ, ഈ സമയത്തെ സുരക്ഷിതമല്ലാത്ത ബന്ധം അണുബാധകൾക്കും മറ്റ് ഗൈനക്കോളജിക്കൽ രോഗങ്ങൾക്കും കാരണമാകും. ചികിത്സിക്കാത്ത ഇത്തരം അണുബാധകൾ ഭാവിയിൽ കാൻസർ പോലുള്ള സങ്കീർണ്ണതകളിലേക്ക് നയിച്ചേക്കാം.
5. ആശ്വാസമാകുന്ന ഒരു ശീലം
ഭർത്താക്കന്മാരുടെ ചില ശീലങ്ങൾ ഗുണകരവുമാണ്. പ്രസവത്തിന് ശേഷമോ അല്ലെങ്കിൽ അബോർഷന് ശേഷമോ കുറഞ്ഞത് 40 ദിവസമെങ്കിലും ലൈംഗിക ബന്ധത്തിൽ നിന്ന് വിട്ടുനിൽക്കുന്ന (Abstinence) ദമ്പതികളിൽ കാൻസർ സാധ്യത കുറവാണെന്ന് കണ്ടെത്തിയിട്ടുണ്ട്. ഈ സമയത്ത് ഗർഭാശയത്തിന് സ്വാഭാവികമായി ഉണങ്ങാനും ആരോഗ്യം വീണ്ടെടുക്കാനും സമയം ലഭിക്കുന്നതിനാലാണിത്.
ചുരുക്കത്തിൽ:
ഇന്ത്യൻ സ്ത്രീകൾ സുരക്ഷിതമായ ജീവിതം നയിക്കുന്നവരാണെങ്കിലും, ഭർത്താവിന്റെ ഭൂതകാലവും വർത്തമാനകാല ശീലങ്ങളും അവരുടെ ജീവന് ഭീഷണിയാകുന്നു. “എന്റെ ജീവിതം എന്റെ ഇഷ്ടം” എന്ന് കരുതുന്ന ഭർത്താക്കന്മാർ, തങ്ങളുടെ പ്രിയപ്പെട്ടവളുടെ ജീവൻ കൂടിയാണ് അപകടത്തിലാക്കുന്നതെന്ന് തിരിച്ചറിയുക. സുരക്ഷിതമായ ലൈംഗിക ജീവിതവും, വ്യക്തിശുചിത്വവും, പുകവലി ഉപേക്ഷിക്കലും കുടുംബത്തിന്റെ മൊത്തം ആരോഗ്യത്തിന് അനിവാര്യമാണ്.
