ഹെൽത്ത് ഡെസ്ക്: സത്യം ചിലപ്പോഴൊക്കെ കഥകളെക്കാൾ വിചിത്രമായിരിക്കും എന്ന് പറയുന്നത് എത്ര ശരിയാണ്! 2022 ല്‍ ബ്രസീലിൽ നിന്നുള്ള ഒരു വാർത്ത അന്ന് ലോകത്തെ മുഴുവന്‍ ഞെട്ടിച്ചിരുന്നു ഇപ്പോൾ ആ വാര്‍ത്ത വീണ്ടും ആഗോളതലത്തിൽ ചർച്ചയാകുന്നത്. 19 വയസ്സുള്ള ഒരു യുവതി പ്രസവിച്ച ഇരട്ടക്കുട്ടികൾക്ക് രണ്ട് പിതാക്കന്മാരാണെന്ന ഡി.എൻ.എ (DNA) പരിശോധനാ ഫലം കേട്ട് ഡോക്ടർമാർ പോലും തലയിൽ കൈവെച്ചുപോയി.
എന്താണ് സംഭവിച്ചത്?
2022 ല്‍ ബ്രസീലിലെ മിനീറോസ് നഗരത്തിലാണ് സംഭവം റിപ്പോര്‍ട്ട് ചെയ്യപ്പെട്ടത് . 19-കാരിയായ യുവതി ആരോഗ്യമുള്ള രണ്ട് ഇരട്ടക്കുട്ടികൾക്ക് ജന്മം നൽകി. കുട്ടികൾ വളർന്നപ്പോൾ അവരുടെ രൂപത്തിൽ തോന്നിയ ചില വ്യത്യാസങ്ങളാണ് സംശയത്തിന് ഇടയാക്കിയത്. കുട്ടികളുടെ പിതൃത്വം സ്ഥിരീകരിക്കുന്നതിനായി യുവതി ഡി.എൻ.എ പരിശോധന നടത്താൻ തീരുമാനിച്ചു. അപ്പോള്‍ തന്‍റെ പങ്കാളിയായിരുന്ന വ്യക്തിയുടെ സാമ്പിളുമായിട്ടാണ് പരിശോധന നടത്തിയത്.
ഫലം വന്നപ്പോൾ എല്ലാവരും ഞെട്ടി. ഒരു കുട്ടിയുടെ ഡി.എൻ.എ സാമ്പിൾ ഇയാളുമായി യോജിക്കുന്നുണ്ട്, എന്നാൽ രണ്ടാമത്തെ കുട്ടിയുടേത് യോജിക്കുന്നില്ല! ഇതിനർത്ഥം ആ ഇരട്ടക്കുട്ടികളിൽ ഒരാളുടെ അച്ഛൻ ഇദ്ദേഹമാണ്, എന്നാൽ മറ്റേ കുട്ടിയുടെ അച്ഛൻ മറ്റൊരാളാണ്.
തുടർന്ന് നടത്തിയ അന്വേഷണത്തിൽ, ഗർഭം ധരിച്ച സമയത്ത് യുവതി മറ്റൊരു വ്യക്തിയുമായും ലൈംഗിക ബന്ധത്തിൽ ഏർപ്പെട്ടിരുന്നതായി ഓർത്തെടുത്തു. ആ വ്യക്തിയുടെ സാമ്പിൾ പരിശോധിച്ചപ്പോൾ രണ്ടാമത്തെ കുട്ടിയുടെ പിതൃത്വം സ്ഥിരീകരിക്കുകയും ചെയ്തു.
എങ്ങനെയാണ് ഇത് സാധ്യമാകുന്നത്?
വൈദ്യശാസ്ത്രത്തിൽ അതീവ അപൂർവ്വമായി മാത്രം സംഭവിക്കുന്ന ‘ഹെറ്ററോപറ്റേണൽ സൂപ്പർഫെക്കണ്ടേഷൻ’ (Heteropaternal Superfecundation) എന്ന അവസ്ഥയാണിത്. സാധാരണയായി ഒരു സ്ത്രീയുടെ ശരീരത്തിൽ ഒരു മാസത്തിൽ ഒരു അണ്ഡം മാത്രമേ ഉത്പാദിപ്പിക്കപ്പെടുകയുള്ളൂ. എന്നാൽ ചില അപൂർവ്വ സാഹചര്യങ്ങളിൽ, രണ്ട് അണ്ഡങ്ങൾ ഒരേസമയം റിലീസ് ചെയ്യപ്പെടാം.
ഈ സമയത്ത്, വളരെ ചുരുങ്ങിയ സമയത്തിനുള്ളിൽ (ഏകദേശം 12-24 മണിക്കൂറിനുള്ളിൽ) സ്ത്രീ രണ്ട് വ്യത്യസ്ത പുരുഷന്മാരുമായി ലൈംഗിക ബന്ധത്തിൽ ഏർപ്പെട്ടാൽ, ഈ രണ്ട് അണ്ഡങ്ങളും രണ്ട് വ്യത്യസ്ത ബീജങ്ങളാൽ (Sperm) ബീജസങ്കലനം ചെയ്യപ്പെടാനുള്ള സാധ്യതയുണ്ട്. പുരുഷ ബീജത്തിന് സ്ത്രീയുടെ ശരീരത്തിൽ ഏകദേശം അഞ്ച് ദിവസം വരെ ജീവനോടെ ഇരിക്കാൻ കഴിയും. അതിനാൽ, മണിക്കൂറുകളുടെയോ ദിവസങ്ങളുടെയോ വ്യത്യാസത്തിൽ നടക്കുന്ന ബന്ധങ്ങളിൽ നിന്ന് രണ്ട് അണ്ഡങ്ങളും വെവ്വേറെ ഫെർട്ടിലൈസ് ചെയ്യപ്പെടുകയും, അവ രണ്ട് വ്യത്യസ്ത ഭ്രൂണങ്ങളായി വളരുകയും ചെയ്യുന്നു. ഫലമോ, ഒരേ ഗർഭപാത്രത്തിൽ വളരുന്ന, ഒരേ സമയം ജനിക്കുന്ന, എന്നാൽ അച്ഛൻമാർ വ്യത്യസ്തരായ ഇരട്ടകൾ!
മനുഷ്യരിൽ അപൂർവ്വം, മൃഗങ്ങളിൽ സർവ്വസാധാരണം
മനുഷ്യരിൽ ഇത്തരം സംഭവങ്ങൾ കോടികളിൽ ഒന്ന് മാത്രമേ നടക്കാറുള്ളൂ എന്ന് വിദഗ്ധർ പറയുന്നു. ലോകത്താകമാനം ഇതുവരെ ഇത്തരത്തിൽ സ്ഥിരീകരിക്കപ്പെട്ട കേസുകൾ വിരലിലെണ്ണാവുന്നവ (ഏകദേശം ഇരുപതോളം) മാത്രമാണ്. എന്നാൽ മൃഗങ്ങളിൽ, പ്രത്യേകിച്ച് പൂച്ചകളിലും പട്ടികളിലും പശുക്കളിലും ഇത് സാധാരണമാണ്. ഒരു പെൺപൂച്ച പ്രസവിക്കുന്ന കുട്ടികൾ പല നിറത്തിലുള്ളവയായിരിക്കുന്നത് നിങ്ങൾ ശ്രദ്ധിച്ചിട്ടില്ലേ? അത് ചിലപ്പോൾ പല ആൺപൂച്ചകളിൽ നിന്നായതുകൊണ്ടാകാം.
ഇനിയെന്ത്?
ഈ ബ്രസീലിയൻ കേസിൽ രസകരമായ മറ്റൊരു കാര്യം കൂടിയുണ്ട്. കുട്ടികൾക്ക് അച്ഛൻമാർ രണ്ടാണെങ്കിലും, അവരെ വളർത്തുന്നതിന്റെ ഉത്തരവാദിത്തം ആദ്യത്തെ പിതാവ് തന്നെ ഏറ്റെടുത്തിരിക്കുകയാണ്. രണ്ട് കുട്ടികളെയും സ്വന്തം മക്കളെപ്പോലെ നോക്കാൻ അദ്ദേഹം തയ്യാറാണെന്ന് യുവതി പ്രാദേശിക മാധ്യമങ്ങളോട് വ്യക്തമാക്കി.
ശാസ്ത്രത്തിന് ഇനിയും പിടിതരാത്ത എത്രയോ രഹസ്യങ്ങൾ മനുഷ്യശരീരത്തിലുണ്ടെന്ന് ഈ സംഭവം നമ്മളെ ഓർമ്മിപ്പിക്കുന്നു. ഇരട്ടക്കുട്ടികൾ എന്ന് കേൾക്കുമ്പോൾ ഒരേ മുഖമുള്ളവരെയാണ് നമ്മൾ സങ്കൽപ്പിക്കാറുള്ളതെങ്കിൽ, ഇനിമുതൽ അങ്ങനെയല്ലെന്നും പ്രകൃതി തെളിയിക്കുന്നു.
