പ്രണയത്തിന് കണ്ണില്ലെന്ന് പറയാറുണ്ട്, എന്നാൽ സമൂഹത്തിന് കണ്ണുണ്ട്, അത് പലപ്പോഴും നിറം മാത്രമാണ് കാണുന്നതെന്ന് തെളിയിക്കുകയാണ് മധ്യപ്രദേശിൽ നിന്നുള്ള ഒരു വിവാഹചിത്രത്തിന് താഴെ വന്നുകൊണ്ടിരിക്കുന്ന കമന്റുകൾ. 11 വർഷത്തെ നീണ്ട പ്രണയത്തിനൊടുവിൽ വിവാഹിതരായ ഋഷഭ് രജപുതും ഷൊണാലി ചൗക്സിയും തങ്ങളുടെ ജീവിതത്തിലെ ഏറ്റവും സന്തോഷകരമായ നിമിഷങ്ങൾ പങ്കുവെച്ചപ്പോൾ, ഇന്റർനെറ്റിന്റെ ഇരുണ്ട മുഖമാണ് അവർക്ക് കാണേണ്ടി വന്നത്. വരനായ ഋഷഭിന്റെ ഇരുണ്ട നിറത്തെച്ചൊല്ലി സോഷ്യൽ മീഡിയയിൽ കടുത്ത വംശീയ അധിക്ഷേപവും ബോഡി ഷെയിമിംഗുമാണ് നടക്കുന്നത്.
വിവാഹ വേഷത്തിൽ, പിങ്ക് ഷാളും തലപ്പാവുമണിഞ്ഞ് വധുവിന് മാലയിടുന്ന ഋഷഭിന്റെയും, മജന്ത ലെഹങ്കയിൽ അതീവ സുന്ദരിയായി നിൽക്കുന്ന ഷൊണാലിയുടെയും ചിത്രങ്ങൾ എക്സിൽ (ട്വിറ്റർ) വൈറലായിരുന്നു. ദശലക്ഷക്കണക്കിന് ആളുകൾ കണ്ട ഈ ചിത്രത്തിന് താഴെ അഭിനന്ദനങ്ങൾക്ക് പകരം പരിഹാസങ്ങളാണ് നിറഞ്ഞത്.
“ബാങ്ക് ബാലൻസ് ആണ് പ്രധാനം”
ഇരുവരും തമ്മിലുള്ള നിറവ്യത്യാസം ചൂണ്ടിക്കാട്ടിയാണ് ഭൂരിഭാഗം കമന്റുകളും. “ഇത്തരം വിവാഹങ്ങൾക്ക് പിന്നിലെ പ്രധാന കാരണം എന്താണ്?” എന്ന ചോദ്യവുമായാണ് ദിവ്യ എന്ന എക്സ് ഉപയോക്താവ് ചിത്രം പങ്കുവെച്ചത്. പണം മാത്രമാണ് വധുവിന്റെ ലക്ഷ്യമെന്നും, വരന് സർക്കാർ ജോലി ഉണ്ടായിരിക്കുമെന്നും പലരും വിധിയെഴുതി. “ബാങ്ക് ബാലൻസ് മാറ്റർ കർത്താ ഹേ” (ബാങ്ക് ബാലൻസാണ് പ്രധാനം), “സഹോദരീ, ഇത്രയ്ക്ക് ഗതികേട് ഉണ്ടായിരുന്നോ?” തുടങ്ങിയ കമന്റുകൾ ദമ്പതികളെ അപമാനിക്കുന്ന തരത്തിലുള്ളതായിരുന്നു.
വിമർശകർക്ക് വായടപ്പിക്കുന്ന മറുപടി
എന്നാൽ, സൈബർ അധിക്ഷേപങ്ങളിൽ തളരാതെ വിമർശകർക്ക് കൃത്യമായ മറുപടി നൽകാൻ ഋഷഭ് രജപുത് തയ്യാറായി. തനിക്ക് സർക്കാർ ജോലിയില്ലെന്നും, എന്നാൽ സ്വന്തം കുടുംബത്തെ മാന്യമായി നോക്കാനുള്ള വരുമാനം തനിക്കുണ്ടെന്നും അദ്ദേഹം വ്യക്തമാക്കി.
“നിങ്ങളെ നിരാശരാക്കുന്നതിൽ ക്ഷമിക്കണം. ഞാനൊരു സർക്കാർ ജീവനക്കാരനല്ല. പക്ഷെ എനിക്ക് അത്യാവശ്യം നല്ല വരുമാനമുണ്ട് (Handsome Income). എന്നാൽ അതൊന്നുമല്ല കാര്യം. എനിക്ക് ഒന്നുമില്ലാതിരുന്ന കാലം മുതൽ അവൾ എന്നെ സ്നേഹിക്കുന്നുണ്ട്. എന്റെ കോളേജ് കാലം മുതൽ, എന്റെ മോശം സമയങ്ങളിലും നല്ല സമയങ്ങളിലും അവൾ എനിക്കൊപ്പം താങ്ങായി നിന്നിട്ടുണ്ട്. അതുകൊണ്ട് നിങ്ങളുടെ അഭിപ്രായങ്ങൾക്ക് എനിക്ക് യാതൊരു വിലയുമില്ല,” ഋഷഭ് കുറിച്ചു.
2014 മുതൽ തങ്ങൾ പ്രണയത്തിലാണെന്നും, ഈ ദിവസത്തിനായി 11 വർഷം കാത്തിരിക്കുകയായിരുന്നുവെന്നും അദ്ദേഹം പറഞ്ഞു. “ഞാനൊരു കറുത്ത വർണ്ണക്കാരനാണെന്ന സത്യം എനിക്ക് നിഷേധിക്കാനാവില്ല. ജീവിതത്തിലുടനീളം നിറത്തിന്റെ പേരിൽ ഞാൻ വിവേചനം നേരിട്ടിട്ടുണ്ട്,” എന്ന ഋഷഭിന്റെ വാക്കുകൾ വംശീയതയുടെ ആഴം വെളിപ്പെടുത്തുന്നതാണ്.
ദൂരങ്ങൾ അവസാനിച്ചു
തങ്ങളുടെ പ്രണയം ഭൂരിഭാഗം സമയവും ‘ലോങ് ഡിസ്റ്റൻസ്’ (Long Distance Relationship) ആയിരുന്നുവെന്നും, ഇപ്പോൾ ആ ദൂരം അവസാനിച്ചതിന്റെ സന്തോഷത്തിലാണ് താനെന്നും വധു ഷൊണാലി പറഞ്ഞു. “ആളുകൾ എന്ത് പറയുന്നു എന്നത് ഞങ്ങളെ ബാധിക്കുന്നില്ല. ഞങ്ങൾ ഈ വൈറൽ നിമിഷങ്ങൾ ആസ്വദിക്കുകയാണ്,” ഷൊണാലി വ്യക്തമാക്കി.
ഇന്ത്യൻ സമൂഹത്തിൽ ഇന്നും നിലനിൽക്കുന്ന ‘വെളുപ്പ് ഭ്രമ’ത്തിന്റെ (Colorism) നേർസാക്ഷ്യമാണ് ഈ സംഭവം. 11 വർഷം നീണ്ട പരിശുദ്ധമായ പ്രണയത്തെപ്പോലും നിറത്തിന്റെയും പണത്തിന്റെയും അളവുകോലുകൾ വെച്ച് അളക്കുന്ന സമൂഹത്തിന്റെ മനോഭാവത്തെയാണ് ഋഷഭിന്റെയും ഷൊണാലിയുടെയും വാക്കുകൾ ചോദ്യം ചെയ്യുന്നത്. നിരവധി പേർ ദമ്പതികൾക്ക് പിന്തുണയുമായി രംഗത്തെത്തിയിട്ടുണ്ട്.
