മലയാള സിനിമയിൽ ഷക്കീലയെന്ന പേര് ഒരു കാലഘട്ടത്തിൻ്റെ പ്രതിഭാസമായിരുന്നു. സൂപ്പർതാര ചിത്രങ്ങൾക്ക് പോലും വെല്ലുവിളിയുയർത്തിക്കൊണ്ട് തെന്നിന്ത്യൻ സിനിമയിൽ അവർ അരങ്ങുവാണു. എന്നാൽ, വെള്ളിത്തിരയിലെ ആ തിളക്കത്തിന് പിന്നിൽ ഒരുപാട് കണ്ണീരും കഷ്ടപ്പാടുകളും ഉണ്ടായിരുന്നുവെന്ന് അടുത്തിടെ ഒരു അഭിമുഖത്തിൽ ഷക്കീല തുറന്നുപറഞ്ഞു. ഒരു സാധാരണ പെൺകുട്ടിയിൽ നിന്ന് താരമായി മാറിയതും പിന്നീട് ജീവിതം കൈവിട്ടുപോയതുമെല്ലാം ഷക്കീല വികാരഭരിതയായി വിവരിച്ചു.
സിനിമയിലേക്കുള്ള വഴി
പത്താം ക്ലാസിൽ തോറ്റതിന് ശേഷമാണ് ഷക്കീല സിനിമയിലേക്ക് എത്തുന്നത്. “ഞാൻ പഠനത്തിൽ അത്ര മിടുക്കിയായിരുന്നില്ല. പത്താം ക്ലാസിൽ തോറ്റപ്പോൾ ഇനി എന്തു ചെയ്യുമെന്നായി. ഞങ്ങൾക്ക് ജീവിക്കാൻ വേറെ വഴിയുണ്ടായിരുന്നില്ല,” ഷക്കീല പറഞ്ഞു. കുടുംബത്തെ ദാരിദ്ര്യത്തിൽ നിന്ന് രക്ഷിക്കാൻ വേണ്ടിയാണ് സിനിമ തിരഞ്ഞെടുത്തതെന്ന് അവർ പറയുന്നു. ചെറുപ്പത്തിൽ അച്ഛൻ തന്നെ ഒരുപാട് തല്ലുമായിരുന്നു എന്നും നടി ഓർത്തെടുത്തു.
ഷക്കീലയുടെ ജീവിതത്തിൽ വഴിത്തിരിവാകുന്നത് ഒരു മേക്കപ്പ്മാനാണ്. ഒരു സിനിമയിൽ സിൽക്ക് സ്മിതയുടെ അനിയത്തിയായി അഭിനയിക്കാൻ അവസരം ലഭിച്ചതും അങ്ങനെയാണ്. ആ സമയത്ത് നേരിടേണ്ടി വന്ന ദുരിതങ്ങളെക്കുറിച്ചും ഷക്കീല തുറന്നുപറയുന്നു. “ചില സിനിമകളിൽ വസ്ത്രം മാറ്റാൻ ആവശ്യപ്പെട്ടേക്കാം എന്ന് ഞാൻ അച്ഛനോട് പറഞ്ഞിരുന്നു. അത് ചെയ്യരുത് എന്ന് അവരോട് പറയണം എന്ന് മാത്രമാണ് അച്ഛൻ അന്ന് എന്നോട് പറഞ്ഞത്,” ഷക്കീല പറഞ്ഞു. അച്ഛൻ തന്നോട് അന്ന് പറഞ്ഞ വാക്കുകൾ ഒരു ഷോക്കായിരുന്നു ഒരച്ഛന്റെ വാക്കുകള്‍ അങ്ങനെ ആണോ.
പൊന്മുട്ടയിടുന്ന താറാവ്
കുടുംബം തന്നെ ഒരു പൊന്മുട്ടയിടുന്ന താറാവിനെ പോലെയാണ് കണ്ടതെന്ന് ഷക്കീലയുടെ വാക്കുകൾ വ്യക്തമാക്കുന്നു. തൻ്റെ കരിയറിൻ്റെ തിരക്കിട്ട ഘട്ടത്തിൽ സാമ്പത്തിക കാര്യങ്ങൾ നോക്കിയിരുന്നത് സഹോദരിയായിരുന്നു. ഷക്കീലയുടെ കഷ്ടപ്പാടുകളെ മുതലെടുത്ത് സഹോദരി സ്വന്തം ജീവിതം സുരക്ഷിതമാക്കി. “എന്നെ ചതിച്ച് അവൾ എല്ലാം കൊണ്ടുപോയി, അവൾ മാത്രമാണ് രക്ഷപ്പെട്ടത്,” ഷക്കീലയുടെ വാക്കുകളിൽ വേദന നിറഞ്ഞു.
പ്രസിദ്ധി പെട്ടെന്ന് അണഞ്ഞ ഒരു സമയമുണ്ടായിരുന്നു ഷക്കീലയുടെ ജീവിതത്തിൽ. “എൻ്റെ സിനിമകൾക്ക് സെൻസർ അനുമതി ലഭിക്കാതെ വന്നു. ചിലർ എൻ്റെ സിനിമകൾക്ക് നിരോധനം ഏർപ്പെടുത്താൻ ശ്രമിച്ചു,” ഷക്കീല പറയുന്നു. അമ്മ സംഘടനയിലെ പലരും തന്റെ സിനിമകള്‍ക്ക് എതിരെ പ്രവര്‍ത്തിച്ചു എന്ന് ഷക്കീല പറഞ്ഞിരുന്നു. അതില്‍ മമ്മൂട്ടിയുടെ പേരും താരം എടുത്തു പറഞ്ഞിരുന്നു. ഇതോടെ നാല് വർഷത്തോളം സിനിമയിൽ നിന്ന് വിട്ടുനിൽക്കേണ്ടി വന്നു. സാധാരണ സിനിമകളിൽ വേഷം നൽകാൻ അന്ന് ആരും തയ്യാറായില്ല. സിനിമയിൽ നിന്ന് അകന്നുനിൽക്കേണ്ടി വന്നത് തൻ്റെ ജീവിതത്തിലെ വലിയൊരു തിരിച്ചടിയായിരുന്നുവെന്നും ആ സമയത്ത് വീട്ടിൽ പോലും ഒന്നുമില്ലാത്ത അവസ്ഥയായിരുന്നുവെന്നും ഷക്കീല കൂട്ടിച്ചേർത്തു.
പുതിയൊരു തുടക്കം
സിനിമാ ജീവിതം അവസാനിച്ചെന്ന് കരുതിയ സമയത്താണ് സംവിധായകൻ തേജ രക്ഷകനായി വരുന്നത്. “ഒരു ദൈവത്തെപ്പോലെയാണ് അദ്ദേഹം വന്നത്. അദ്ദേഹം സംവിധാനം ചെയ്ത ജയം എന്ന സിനിമയിൽ എനിക്ക് ഒരു അവസരം തന്നു,” ഷക്കീല പറഞ്ഞു. അതിന് ശേഷമാണ് വീണ്ടും ചെറിയ ചെറിയ സിനിമകളിലും ടെലിവിഷൻ പരിപാടികളിലും സജീവമായത്.
ഇന്ന് ഷക്കീല പഴയ സിനിമകളിൽ നിന്ന് മാറി സാധാരണ കഥാപാത്രങ്ങൾ ചെയ്യുന്ന തിരക്കിലാണ്. ബിഗ് ബോസ് എന്ന റിയാലിറ്റി ഷോയിൽ എത്തിയപ്പോൾ അവരുടെ ജീവിതകഥ പ്രേക്ഷകരുടെ മനസ്സിൽ ഇടം നേടി. ഒരു സാധാരണ പെൺകുട്ടിയുടെ ജീവിതം സിനിമ കാരണം മാറിയതും എന്നാൽ സിനിമ തന്നെ ജീവിതം നശിപ്പിച്ചതും പിന്നീട് ജീവിതം തിരിച്ചുപിടിച്ചതുമെല്ലാം ഷക്കീലയുടെ വാക്കുകളിൽ നിന്ന് വ്യക്തമാണ്.
