ഇന്ത്യൻ സൈബർ ലോകത്ത് ഇപ്പോൾ എവിടെ നോക്കിയാലും ഒരൊറ്റ ചർച്ചയേയുള്ളൂ – “ആ 19 മിനിറ്റ് വൈറൽ വീഡിയോ”. ഇൻസ്റ്റാഗ്രാം, ഫേസ്ബുക്ക്, എക്സ് (ട്വിറ്റർ) തുടങ്ങിയ പ്ലാറ്റ്‌ഫോമുകളിലെല്ലാം ഈ ‘നിഗൂഢ വീഡിയോ’യെക്കുറിച്ചുള്ള കമന്റുകളും ട്രോളുകളും നിറയുകയാണ്. ഒരു ഇന്ത്യൻ ഇൻസ്റ്റാഗ്രാം ദമ്പതികളുടെ സ്വകാര്യ നിമിഷങ്ങൾ എന്ന പേരിലാണ് ഈ വീഡിയോ പ്രചരിക്കുന്നത്. എന്നാൽ, വീഡിയോയിലെ യഥാർത്ഥ വ്യക്തികളെ ആർക്കും അറിയില്ല എന്നതാണ് രസകരമായ വസ്തുത. ഈ അനിശ്ചിതത്വം മുതലെടുത്ത് പലരും ഊഹാപോഹങ്ങൾ പ്രചരിപ്പിക്കാൻ തുടങ്ങിയതോടെ, നിരപരാധികളായ പല സോഷ്യൽ മീഡിയ ഇൻഫ്ലുവൻസർമാരും അനാവശ്യമായി വിവാദത്തിൽ കുരുങ്ങിയിരിക്കുകയാണ്.
അബദ്ധത്തിൽ കുടുങ്ങി ‘സ്വീറ്റ് സന്നത്ത്’
ഈ സൈബർ കോലാഹലങ്ങൾക്കിടയിൽ, മേഘാലയയിൽ നിന്നുള്ള ‘സ്വീറ്റ് സന്നത്ത്’ (Sweet Zannat) എന്ന സോഷ്യൽ മീഡിയ ഇൻഫ്ലുവൻസർക്ക് നേരിടേണ്ടി വന്നത് വിചിത്രമായ അനുഭവമാണ്. വൈറലായ വീഡിയോയിലെ പെൺകുട്ടി സന്നത്താണെന്ന് തെറ്റിദ്ധരിച്ച് ആയിരക്കണക്കിന് ആളുകളാണ് അവരുടെ പ്രൊഫൈലിലേക്ക് ഒഴുകിയെത്തിയത്. കമന്റ് ബോക്സ് മുഴുവൻ “19 മിനിറ്റ്”, “ലിങ്ക് തരൂ” തുടങ്ങിയ സന്ദേശങ്ങൾ കൊണ്ട് നിറഞ്ഞു.
ഒടുവിൽ സഹികെട്ട സന്നത്ത്, തമാശ കലർന്ന ഒരു വിശദീകരണ വീഡിയോയുമായി രംഗത്തെത്തി. 16 ദശലക്ഷത്തിലധികം ആളുകൾ കണ്ട ഈ വീഡിയോയിൽ സന്നത്ത് കാര്യങ്ങൾ വ്യക്തമായി പറയുന്നുണ്ട്.
“ആദ്യം നിങ്ങൾ എന്നെ നന്നായി നോക്കൂ, എന്നിട്ട് ആ വീഡിയോയിലെ പെൺകുട്ടിയെ നോക്കൂ,” സന്നത്ത് പറഞ്ഞു. “എവിടെയെങ്കിലും ഞാനുമായി സാമ്യം തോന്നുന്നുണ്ടോ? മറ്റാരുടെയോ വിന എന്റെ തലയിൽ കെട്ടിവെക്കുന്നത് എന്തിനാണ്? ഇത് വല്ലാത്ത കഷ്ടമാണ്”.
View this post on Instagram
“അവൾ ഇംഗ്ലീഷ് പറയുന്നു, ഞാനോ?”
തമാശരൂപേണ സന്നത്ത് പറഞ്ഞ മറുപടിയാണ് ഇപ്പോൾ വൈറലാകുന്നത്. “ഹേയ്, ആ വീഡിയോയിലെ കുട്ടി നന്നായി ഇംഗ്ലീഷ് സംസാരിക്കുന്നുണ്ട്. ഞാനാണെങ്കിൽ പന്ത്രണ്ടാം ക്ലാസ്സ് പോലും പാസ്സായിട്ടില്ല. വെറുതെ എന്നെ വൈറലാക്കുകയാണ് നിങ്ങൾ,” സന്നത്ത് ചിരിച്ചുകൊണ്ട് പറഞ്ഞു. എന്തായാലും തനിക്ക് ഫോളോവേഴ്‌സിനെയും വ്യൂസിനെയും കിട്ടുന്നുണ്ടല്ലോ എന്ന ആശ്വാസത്തിലാണ് താരം.
തട്ടിപ്പുകളിൽ വീഴരുത്
ഈ ട്രെൻഡിന്റെ മറവിൽ വലിയ സൈബർ തട്ടിപ്പുകളും നടക്കുന്നുണ്ട്. “ഒറിജിനൽ വീഡിയോ കാണാൻ ഇവിടെ ക്ലിക്ക് ചെയ്യൂ” എന്ന പേരിലുള്ള ലിങ്കുകൾ വ്യാപകമായി പ്രചരിക്കുന്നുണ്ട്. ഇത്തരം ലിങ്കുകൾ ക്ലിക്ക് ചെയ്യുന്നത് ഫോണിലേക്ക് മാൽവെയറുകൾ (Malware) കടന്നുകൂടാനും, വ്യക്തിവിവരങ്ങൾ ചോർത്താനും (Phishing) കാരണമാകുമെന്ന് സൈബർ സുരക്ഷാ വിദഗ്ധർ മുന്നറിയിപ്പ് നൽകുന്നു.
പലരും പറയുന്നത് ഈ വീഡിയോ എഐ (AI) സാങ്കേതികവിദ്യ ഉപയോഗിച്ച് നിർമ്മിച്ച വ്യാജ വീഡിയോ ആകാമെന്നാണ്. അല്ലെങ്കിൽ പഴയ ഏതെങ്കിലും അശ്ലീല സൈറ്റുകളിലെ ദൃശ്യങ്ങൾ പുതിയതെന്ന പേരിൽ പ്രചരിപ്പിക്കുന്നതാവാം. എന്തായാലും, 19 മിനിറ്റ് വീഡിയോ തേടി സമയം കളയുന്നവർക്ക് ലഭിക്കുന്നത് നിരാശയോ അല്ലെങ്കിൽ വൈറസ് ബാധയോ മാത്രമായിരിക്കും എന്നതാണ് വാസ്തവം. “എന്റെ 19 മിനിറ്റും 34 സെക്കൻഡും വെറുതെ പോയി” എന്നാണ് ഒരു ട്രോളൻ നിരാശയോടെ കുറിച്ചത്.
