ഭാനുപ്രിയ എന്ന പേര് കേൾക്കുമ്പോൾ മലയാളികളുടെ മനസിൽ ആദ്യം ഓടിയെത്തുന്നത് ആ വലിയ കണ്ണുകളും അതിൽ വിരിയുന്ന ഭാവങ്ങളുമാണ്. അഭിനയത്തിനപ്പുറം, നൃത്തത്തെ ജീവവായു പോലെ സ്നേഹിച്ച അപൂർവ്വം ചില താരങ്ങളിൽ ഒരാളായിരുന്നു അവർ. എന്നാൽ, നൃത്തം ചെയ്യാൻ വേണ്ടി മാത്രം ജനിച്ചുവെന്ന് തോന്നിപ്പിച്ച ആ കലാകാരി ഇന്ന് സ്വന്തം ചിലങ്കകളെ പോലും മറന്നുതുടങ്ങിയിരിക്കുന്നു എന്ന വാർത്ത സിനിമാ ലോകത്തെയും ആരാധകരെയും ഒരുപോലെ നൊമ്പരപ്പെടുത്തുകയാണ്.
തെന്നിന്ത്യൻ സിനിമയിൽ ഒരുകാലത്ത് നിറസാന്നിധ്യമായിരുന്ന ഭാനുപ്രിയ, തന്റെ ഓർമ്മശക്തി കുറയുന്നതിനെക്കുറിച്ചും നൃത്തത്തോടുള്ള താൽപ്പര്യം നഷ്ടപ്പെട്ടതിനെക്കുറിച്ചും തുറന്നുപറഞ്ഞത് വലിയ ഞെട്ടലോടെയാണ് പ്രേക്ഷകർ കേട്ടത്.
നൃത്തം എന്ന ജീവവായു
കുട്ടിക്കാലം മുതൽ ഭാനുപ്രിയയ്ക്ക് നൃത്തം വെറുമൊരു കലയായിരുന്നില്ല, അത് ജീവിതത്തിന്റെ ഭാഗമായിരുന്നു. “സ്കൂൾ വിട്ടു വന്നാൽ ഹോംവർക്ക് ചെയ്യുന്നതിനേക്കാൾ എനിക്ക് ഇഷ്ടം ഡാൻസ് കളിക്കാനായിരുന്നു. റേഡിയോയിൽ കേൾക്കുന്ന പാട്ടുകൾക്കനുസരിച്ച് സ്വന്തമായി ചുവടുകൾ വെയ്ക്കും. അത് കണ്ടാണ് വീട്ടുകാർ എന്നെ നൃത്തം പഠിക്കാൻ ചേർത്തത്,” ഭാനുപ്രിയ പഴയൊരു അഭിമുഖത്തിൽ പറഞ്ഞിരുന്നു. ആ ബാല്യകാല കൗതുകം പിന്നീട് സിനിമയിലെത്തിയപ്പോൾ അവരുടെ ഏറ്റവും വലിയ കരുത്തായി മാറി.
ഭാനുപ്രിയയുടെ നൃത്തവൈഭവം തിരിച്ചറിഞ്ഞ സംവിധായകർ അവർക്കായി മാത്രം സിനിമകളിൽ നൃത്തപ്പൂക്കുകൾ ഒരുക്കി. കെ.വിശ്വനാഥിന്റെ തെലുങ്ക് ചിത്രം ‘സ്വർണ്ണകമലം’ ഇതിനൊരു മികച്ച ഉദാഹരണമാണ്. മലയാളത്തിലും ഭാനുപ്രിയയുടെ നൃത്തം ആഘോഷിക്കപ്പെട്ടിട്ടുണ്ട്. സത്യൻ അന്തിക്കാട് സംവിധാനം ചെയ്ത ‘കൊച്ചു കൊച്ചു സന്തോഷങ്ങൾ’ എന്ന ചിത്രത്തിൽ ലക്ഷ്മി ഗോപാലസ്വാമിക്കൊപ്പം ഭാനുപ്രിയ നടത്തിയ നൃത്തപ്രകടനം ഇന്നും മലയാളികൾക്ക് വിസ്മയമാണ്. മോഹൻലാലിനൊപ്പം അഭിനയിച്ച ‘രാജശില്പി’യിലെ ശിവതാണ്ഡവവും ഭാനുപ്രിയയിലെ നർത്തകിയുടെ പൂർണ്ണരൂപം കാണിച്ചുതന്ന ചിത്രമായിരുന്നു.
ചിരഞ്ജീവിയുടെ ആ വാക്കുകൾ
നൃത്തത്തോടുള്ള ഭാനുപ്രിയയുടെ സമീപനം എത്രത്തോളം സീരിയസ് ആയിരുന്നുവെന്ന് തെലുങ്ക് സൂപ്പർസ്റ്റാർ ചിരഞ്ജീവി ഒരിക്കൽ പറഞ്ഞിട്ടുണ്ട്. “മറ്റ് നടിമാർക്കൊപ്പം നൃത്തം ചെയ്യുമ്പോൾ നല്ല കെമിസ്ട്രി തോന്നാറുണ്ട്. എന്നാൽ ഭാനുപ്രിയയുടെ കൂടെ ഡാൻസ് കളിക്കുമ്പോൾ കാര്യം വേറെയാണ്. അവർ എപ്പോഴും നൃത്തത്തിന്റെ സാങ്കേതിക തികവിലാണ് ശ്രദ്ധിച്ചിരുന്നത്. കൂടെ കളിക്കുന്ന ആളെക്കാൾ മികച്ചതാകണം എന്ന വാശി അവർക്കുണ്ടായിരുന്നു. അത് പലപ്പോഴും റൊമാന്റിക് കെമിസ്ട്രിയെ ബാധിച്ചിട്ടുണ്ടാകാം, പക്ഷേ അതവരുടെ സമർപ്പണമായിരുന്നു,” ചിരഞ്ജീവി ഓർക്കുന്നു. വിമർശനത്തേക്കാളുപരി, ഒരു കലാകാരിയുടെ കഴിവിനുള്ള അംഗീകാരമായിരുന്നു ആ വാക്കുകൾ.
വിധി വില്ലനായപ്പോൾ
എന്നാൽ 2018 ഭാനുപ്രിയയുടെ ജീവിതത്തിലെ ഇരുണ്ട അധ്യായമായി മാറി. ഭർത്താവ് ആദർശ് കൗശലിന്റെ അപ്രതീക്ഷിത വിയോഗം അവരെ മാനസികമായി തളർത്തി. ആ വലിയ ആഘാതത്തിൽ നിന്ന് കരകയറാൻ അവർക്ക് കഴിഞ്ഞില്ല. പതിയെ പൊതുവേദികളിൽ നിന്ന് അവർ അകന്നു. വൈകാതെ ഓർമ്മകൾ മങ്ങിത്തുടങ്ങി.
“കഴിഞ്ഞ കുറച്ചു വർഷങ്ങളായി ഞാൻ പലതും മറന്നുപോകുന്നു. ഡയലോഗുകൾ പോലും ഓർമ്മയിൽ നിൽക്കുന്നില്ല. നൃത്തം ചെയ്യാനുള്ള ആഗ്രഹം പോലും എന്നിൽ നിന്ന് പോയിമറഞ്ഞു. സ്വന്തമായി ഒരു ഡാൻസ് സ്കൂൾ തുടങ്ങണമെന്നത് എന്റെ വലിയ സ്വപ്നമായിരുന്നു. എന്നാൽ ഇന്നത്തെ അവസ്ഥയിൽ ഞാൻ അതെല്ലാം ഉപേക്ഷിച്ചു. ഇപ്പോൾ വീട്ടിൽ പോലും ഞാൻ നൃത്തം അഭ്യസിക്കാറില്ല,” ഭാനുപ്രിയയുടെ ഈ വെളിപ്പെടുത്തൽ ഒരു തേങ്ങലോടെയല്ലാതെ കേട്ടിരിക്കാനാവില്ല.
നൃത്തം ചെയ്യാത്ത ഭാനുപ്രിയയെ സങ്കൽപ്പിക്കാൻ പോലും അവരുടെ ആരാധകർക്ക് കഴിയില്ല. ‘അഴകേ… നിൻ മടിയിൽ’ എന്ന് പാടി അഭിനയിച്ച ആ കണ്ണുകളിലെ തിളക്കം മാഞ്ഞുപോകുന്നത് സിനിമാലോകത്തിന് വലിയൊരു നഷ്ടം തന്നെയാണ്. എങ്കിലും, വെള്ളിത്തിരയിൽ അവർ ബാക്കിവെച്ച വിസ്മയിപ്പിക്കുന്ന പ്രകടനങ്ങളിലൂടെ ഭാനുപ്രിയ എന്ന നർത്തകി എക്കാലവും ഓർമ്മിക്കപ്പെടും.
