വാടകവീടുകളിൽ നിന്ന് വാടകവീടുകളിലേക്ക് മാറിമാറി താമസിക്കുന്ന മാതാപിതാക്കൾക്ക് സ്വന്തമായൊരു വീട് സമ്മാനിക്കുക എന്നത് ഏതൊരു മകന്റെയും സ്വപ്നമായിരിക്കും. ആ സ്വപ്നം സഫലമാകുന്ന നിമിഷം എത്രത്തോളം വൈകാരികമായിരിക്കുമെന്ന് തെളിയിക്കുകയാണ് മുംബൈയിൽ നിന്നുള്ള ഒരു വീഡിയോ. മുംബൈയിലെ ഡയമണ്ട് വ്യാപാരിയായ ആശിഷ് ജെയിൻ എന്ന യുവാവ് തന്റെ മാതാപിതാക്കൾക്ക് നൽകിയ ഒരു ‘സർപ്രൈസ്’ ആണ് ഇപ്പോൾ ഇന്റർനെറ്റിലെ പുതിയ ചർച്ചാവിഷയം.
മകൻ പുതിയതായി വാടകയ്ക്ക് എടുത്ത വീട് കാണാനാണ് തങ്ങൾ വന്നതെന്നാണ് ആ മാതാപിതാക്കൾ കരുതിയിരുന്നത്. എന്നാൽ, ആ സന്ദർശനം അവരുടെ ജീവിതത്തിലെ ഏറ്റവും വലിയ സന്തോഷ നിമിഷമായി മാറുകയായിരുന്നു. വീടിന്റെ താക്കോൽ മാതാപിതാക്കളുടെ കൈകളിൽ വെച്ചുകൊണ്ട് ആശിഷ് പറഞ്ഞു: “ഇത് വാടകയ്ക്കല്ല, ഇത് ഇനി മുതൽ നിങ്ങളുടെ സ്വന്തം വീടാണ്”.
അവിശ്വസനീയമായ ആ നിമിഷം
ആശിഷ് ജെയിൻ ഇൻസ്റ്റാഗ്രാമിൽ പങ്കുവെച്ച വീഡിയോ നിമിഷനേരം കൊണ്ടാണ് വൈറലായത്. വീഡിയോയുടെ തുടക്കത്തിൽ, മകൻ പുതിയതായി താമസിക്കാൻ പോകുന്ന വാടകവീട് കാണാനെത്തിയ മാതാപിതാക്കളെയാണ് കാണുന്നത്. വീടിനുള്ളിൽ വെച്ച് ആശിഷ് ചില രേഖകളും ഒരു നെയിംപ്ലേറ്റും മാതാപിതാക്കൾക്ക് കൈമാറുന്നു. അത് കണ്ട് അവർ അമ്പരക്കുന്നു.
ആശിഷിന്റെ വാക്കുകൾ കേട്ട അമ്മയുടെ മുഖത്ത് ആദ്യം അവിശ്വസനീയതയായിരുന്നു. “ഇത് സത്യമാണോ?” എന്ന ഭാവത്തിൽ അവർ മകനെ ഉറ്റുനോക്കി. പതിയെ ആ അമ്പരപ്പ് നിറഞ്ഞ പുഞ്ചിരിയിലേക്കും ആനന്ദക്കണ്ണീരിലേക്കും വഴിമാറി. ഒടുവിൽ സ്നേഹത്തോടെ അവർ മകനെ കെട്ടിപ്പിടിച്ചു.
അച്ഛന്റെ പ്രതികരണമായിരുന്നു ഏവരെയും ചിരിപ്പിക്കുകയും ചിന്തിപ്പിക്കുകയും ചെയ്തത്. വീട് തങ്ങളുടേതാണെന്ന് തിരിച്ചറിഞ്ഞ ആ നിമിഷം, പ്രായം മറന്ന് അദ്ദേഹം തുള്ളിച്ചാടി. മകനെ കെട്ടിപ്പിടിച്ച് ഉമ്മ നൽകിയ ശേഷം, സന്തോഷം അടക്കാനാവാതെ അദ്ദേഹം നൃത്തം ചെയ്യാനും തുടങ്ങി. “യേ ഘർ ആപ്കാ ഹേ” (ഈ വീട് നിങ്ങളുടേതാണ്) എന്ന് മകൻ പറയുമ്പോൾ ആ അച്ഛന്റെയും അമ്മയുടെയും മുഖത്തുണ്ടായ തിളക്കം വാക്കുകൾക്ക് അതീതമായിരുന്നു. “അവരുടെ സന്തോഷമാണ് എനിക്ക് എല്ലാം” എന്ന കുറിപ്പോടെയാണ് ആശിഷ് വീഡിയോ പങ്കുവെച്ചത്.
View this post on Instagram
ഏറ്റെടുത്ത് സോഷ്യൽ മീഡിയ
ലക്ഷക്കണക്കിന് ആളുകളാണ് ഇതിനോടകം വീഡിയോ കണ്ടത്. ഹൃദയസ്പർശിയായ കമന്റുകളാൽ നിറഞ്ഞിരിക്കുകയാണ് വീഡിയോയുടെ താഴെ. “മാതാപിതാക്കൾക്ക് വീടിന്റെ താക്കോൽ കൈമാറുന്ന ആ നിമിഷം, അതൊരു അനുഗ്രഹമാണ്,” എന്ന് ഒരാൾ കുറിച്ചു. അച്ഛന്റെ നിഷ്കളങ്കമായ നൃത്തവും അമ്മയുടെ കണ്ണിലെ തിളക്കവുമാണ് വീഡിയോയുടെ ഹൈലൈറ്റ് എന്ന് മറ്റൊരാൾ അഭിപ്രായപ്പെട്ടു.
സ്വന്തം സുഖസൗകര്യങ്ങൾ നോക്കാതെ മക്കൾക്ക് വേണ്ടി ജീവിതം ഉഴിഞ്ഞുവെച്ച മാതാപിതാക്കൾക്ക് മക്കൾ നൽകുന്ന ഇത്തരം സ്നേഹസമ്മാനങ്ങൾ അവർക്ക് നൽകുന്ന സംതൃപ്തി ചെറുതല്ല. മുംബൈയിൽ ഡയമണ്ട് ബിസിനസ്സ് ചെയ്യുന്ന ആശിഷ് ജെയിൻ, തന്റെ കുടുംബത്തോടൊപ്പമുള്ള യാത്രാവിശേഷങ്ങളും മറ്റും സോഷ്യൽ മീഡിയയിൽ പങ്കുവെക്കാറുണ്ട്. എന്നാൽ, മാതാപിതാക്കളുടെ മുഖത്ത് വിരിയിച്ച ഈ പുഞ്ചിരിയാണ് അദ്ദേഹത്തിന്റെ പ്രൊഫൈലിലെ ഏറ്റവും തിളക്കമുള്ള വിശേഷമായി മാറിയിരിക്കുന്നത്.
വാർദ്ധക്യത്തിൽ മക്കൾ മാതാപിതാക്കളെ ഉപേക്ഷിക്കുന്ന വാർത്തകൾക്കിടയിൽ, സ്നേഹത്തിന്റെ ഇത്തരം കാഴ്ച്ചകൾ സമൂഹത്തിന് നൽകുന്ന സന്ദേശം വലുതാണ്.
