ഒരു രാഷ്ട്രീയ നേതാവിന്റെ ഭൂതകാലം ഒരു തുറന്ന പുസ്തകം പോലെയാണ്. എപ്പോൾ വേണമെങ്കിലും ആരും മറിച്ചുനോക്കാവുന്ന ഒന്ന്. തമിഴ് രാഷ്ട്രീയത്തിൽ ചുവടുറപ്പിക്കാൻ ശ്രമിക്കുന്ന ‘ദളപതി’ വിജയ് ഇപ്പോൾ നേരിടുന്നതും ഇതാണ്. കരൂരിലെ സ്റ്റാമ്പേഡ് ദുരന്തവുമായി ബന്ധപ്പെട്ട് വലിയ വിമർശനങ്ങൾ നേരിടുന്നതിനിടയിൽ, അദ്ദേഹത്തിന്റെ സിനിമാ ജീവിതത്തിലെ ചില പഴയ ഏടുകളും സോഷ്യൽ മീഡിയ കുത്തിപ്പൊക്കുകയാണ്. അതിലൊന്നാണ്, മുതിർന്ന നടൻ നെപ്പോളിയനെ ‘പോക്കിരി’ സിനിമയുടെ സെറ്റിൽ വെച്ച് വിജയ് അപമാനിച്ചു എന്ന ആരോപണം.
എന്താണ് ആ സംഭവം?
വർഷങ്ങൾക്കിപ്പുറം നിർമ്മാതാവ് ബാലാജി പ്രഭുവാണ് ഈ പഴയ സംഭവം വീണ്ടും ഓർത്തെടുത്ത് ഒരു അഭിമുഖത്തിൽ പങ്കുവെച്ചത്. തമിഴകത്ത് സൂപ്പർഹിറ്റായി ഓടിയ ‘പോക്കിരി’ എന്ന സിനിമയുടെ ചിത്രീകരണ സമയത്താണ് കഥ നടക്കുന്നത്. അന്ന് തമിഴിലെ മുതിർന്ന നടനും വില്ലൻ വേഷങ്ങളിലൂടെ ശ്രദ്ധേയനുമായ നെപ്പോളിയനും ആ സിനിമയിൽ ഒരു പ്രധാന കഥാപാത്രത്തെ അവതരിപ്പിച്ചിരുന്നു.
ഒരു ദിവസം ഷൂട്ടിംഗ് ലൊക്കേഷനിൽ എത്തിയ നെപ്പോളിയൻ, വിജയ്‌യുടെ കാരവാനിലേക്ക് അദ്ദേഹത്തിന് സുഖമാണോ എന്ന് അന്വേഷിക്കാൻ ചെന്നു. ഒരു മുതിർന്ന സഹപ്രവർത്തകൻ എന്ന നിലയിലും, സ്നേഹത്തോടെ ഒരു അനിയനെ കാണാൻ വരുന്നതുപോലെയും ആയിരുന്നു ആ വരവ്. എന്നാൽ, വിജയ്‌യുടെ സഹായികൾ അദ്ദേഹത്തെ അകത്തേക്ക് കടത്തിവിട്ടില്ല. “വിജയ്‌യോട് ഞാൻ കാണാൻ വന്നുവെന്ന് പറഞ്ഞാൽ മതി, അവൻ എനിക്ക് അനിയനെ (തമ്പി) പോലെയാണ്,” എന്ന് നെപ്പോളിയൻ അവരോട് പറഞ്ഞു.
വാക്കുകൾ തീയുണ്ടയായപ്പോൾ
പുറത്ത് സംസാരം കേട്ട് കാരവാനിൽ നിന്ന് പുറത്തിറങ്ങിവന്ന വിജയ്‌യോട് നെപ്പോളിയൻ പരാതിപ്പെട്ടു: “നോക്ക് തമ്പി, ഇവർ എന്നെ നിന്നെ കാണാൻ സമ്മതിക്കുന്നില്ല.”
എന്നാൽ, സ്നേഹത്തോടെ ‘തമ്പി’ എന്ന് വിളിച്ച ഒരു മുതിർന്ന സഹപ്രവർത്തകനോട് വിജയ് പ്രതികരിച്ച രീതി അവിടെയുണ്ടായിരുന്നവരെ ഞെട്ടിച്ചുവെന്നാണ് നിർമ്മാതാവ് പറയുന്നത്. “സാർ, നിങ്ങൾക്ക് കുറച്ചെങ്കിലും വിവരമില്ലേ? ഞാൻ വിശ്രമിക്കുമ്പോൾ പുറത്തുനിന്ന് ബഹളം വെക്കുകയാണോ? നിങ്ങൾ വന്നാലുടൻ ഞാൻ എഴുന്നേറ്റ് നിൽക്കണമെന്നാണോ വിചാരം?” എന്നിങ്ങനെയുള്ള ചോദ്യങ്ങളുമായി വിജയ് ദേഷ്യപ്പെട്ടു.
“അല്ല തമ്പി, നമ്മുടെ പയ്യനല്ലേ എന്ന് കരുതി കാണാൻ വന്നതാണ്,” എന്ന് നെപ്പോളിയൻ മറുപടി പറഞ്ഞപ്പോൾ, “അങ്ങനെ പറയേണ്ട കാര്യമില്ല. ആരാണ് നിങ്ങളുടെ പയ്യൻ? ആരാണ് നിങ്ങളുടെ തമ്പി? മേലാൽ എന്നോട് ഇങ്ങനെ സംസാരിക്കരുത്,” എന്ന് പറഞ്ഞുകൊണ്ട് ഏകദേശം ഇരുപതോളം ആളുകളുടെ മുന്നിൽ വെച്ച് വിജയ് നെപ്പോളിയനെ അപമാനിച്ചുവെന്നും നിർമ്മാതാവ് ആരോപിക്കുന്നു. “ഇനി എന്ത് ആവശ്യമുണ്ടെങ്കിലും അപ്പോയിന്റ്മെന്റ് എടുത്തിട്ട് വന്നാൽ മതി,” എന്ന് താക്കീതും നൽകി.
നെപ്പോളിയൻ പറഞ്ഞത്
ഈ സംഭവത്തിന് ശേഷം താനും വിജയ്‌യും തമ്മിൽ സംസാരിക്കാറില്ലെന്ന് നെപ്പോളിയൻ തന്നെ മുൻപ് ഒരു യൂട്യൂബ് ചാനലിന് നൽകിയ അഭിമുഖത്തിൽ പറഞ്ഞിട്ടുണ്ട്. “പോക്കിരിയുടെ സെറ്റിൽ വെച്ച് വേദനിപ്പിക്കുന്ന ഒരു സംഭവം ഉണ്ടായി. അതിനുശേഷം ഞങ്ങൾ സംസാരിച്ചിട്ടില്ല. അതുകൊണ്ട് ഒരുമിച്ച് സിനിമകളും ചെയ്യാറില്ല. അദ്ദേഹം സംസാരിക്കാൻ തയ്യാറാണെങ്കിൽ എനിക്ക് വിരോധമൊന്നുമില്ല,” എന്നായിരുന്നു ‘ദേവാസുരം’ നടന്റെ വാക്കുകൾ.
സിനിമയിലെ നായകൻ ജീവിതത്തിലും നായകനാകണമെന്നില്ല. വിജയ് എന്ന രാഷ്ട്രീയക്കാരനെ തമിഴ്മക്കൾ വിലയിരുത്തുമ്പോൾ, സ്ക്രീനിലെ ഇമേജിനൊപ്പം ഇത്തരം പഴയ കഥകളും ചർച്ചയാകുന്നത് അതുകൊണ്ടാണ്.
