ഒഡിയ നടി പ്രകൃതി മിശ്രയെ ഞായറാഴ്ച രാവിലെ ഭുവനേശ്വറിലെ തെരുവിൽ വെച്ച് ബാബുഷാൻ മൊഹന്തിയുടെ ഭാര്യ തൃപ്തി സത്പതി ആക്രമിച്ചതായി റിപ്പോർട്ട്. സംഭവത്തിന്റെ നിരവധി വീഡിയോകളാണ് ഇപ്പോൾ സോഷ്യൽ മീഡിയ പ്ലാറ്റ്‌ഫോമുകളിൽ വൈറലായിരിക്കുന്നത്.
ഭർത്താവും നടിയും തമ്മിലുള്ള അവിഹിത ബന്ധത്തിന്റെ പേരിൽ തൃപ്തി നടിയോട് മോശമായി പെരുമാറുകയും മർദിക്കുകയും ചെയ്തതായി റിപ്പോർട്ടുകൾ പറയുന്നു.
ബാബുഷാനും പ്രകൃതിയും അടുത്തിടെ ഒഡിയ ചിത്രമായ “പ്രേമം” ൽ ഒന്നിച്ചഭിനയിച്ചിരുന്നു.
ഭുവനേശ്വറിലെ ഖരാവേല നഗർ പോലീസ് സ്റ്റേഷനിലും വിഷയം എത്തിയിട്ടുണ്ട്, പ്രകൃതി മിശ്രയുടെ അമ്മ കൃഷ്‌ണപ്രിയ മിശ്ര ഇത് സംബന്ധിച്ച് ഔപചാരികമായി പരാതി നൽകി.
വൈറലായിരിക്കുന്ന വീഡിയോകളിൽ, ബാബുഷാന്റെ ഭാര്യ തൃപ്തി തന്റെ ഭർത്താവിനെയും നടി പ്രകൃതിയെയും കാറിൽ ഒരുമിച്ച് പിടികൂടിയ ശേഷം ആക്രമിക്കുന്നത് കാണാം. മറ്റൊരു വീഡിയോയിൽ പ്രകൃതി രക്ഷപെടാൻ ശ്രമിക്കുമ്പോൾ തൃപ്തി അവരുടെ മുടി വലിക്കാൻ ശ്രമിക്കുന്നതും കാണാം.
ഒരു പ്രത്യേക വീഡിയോയിൽ, ഓട്ടോറിക്ഷയിൽ കയറാൻ ശ്രമിക്കുന്ന പ്രകൃതിയെ തൃപ്തി തടയുന്നതും തന്റെ കുടുംബത്തെ നശിപ്പിക്കുകയാണെന്ന് ആരോപിക്കുന്നതും സംഭവസ്ഥലത്ത് ഉണ്ടായിരുന്ന ആളുകൾ അവരുടെ മൊബൈൽ ഫോണുകളിൽ വീഡിയോ റെക്കോർഡുചെയ്യുന്നത് കാണാൻ കഴിയും.
പ്രകൃതിയാകട്ടെ, തൃപ്തിയുടെ മാനസിക സന്തുലിതാവസ്ഥ നഷ്ടപ്പെട്ടതായി പറയുന്നതായി കാണാം.
പ്രകൃതിയുടെ അമ്മയുടെ പരാതി പ്രകാരം, ചെന്നൈയിലേക്കുള്ള യാത്രക്കായി ഭുവനേശ്വർ വിമാനത്താവളത്തിലേക്ക് കാറിൽ പോകുമ്പോൾ ബാബുഷാന്റെ ഭാര്യ തൃപ്തി സത്പതിയും ചില ഗുണ്ടകളും ചേർന്ന് ഇരുവരെയും തടഞ്ഞുവെന്ന് ഭുവനേശ്വർ ഡെപ്യൂട്ടി പോലീസ് കമ്മീഷണർ (ഡിസിപി) പ്രതീക് സിംഗ് പറഞ്ഞു.
ଅଭିନେତ୍ରୀ ପ୍ରକୃତି ମିଶ୍ରଙ୍କୁ ପିଟିଲେ ଅଭିନେତା ବାବୁସାନଙ୍କ ପତ୍ନୀ।
ଅଭଯୋଗ- ଇଏ କାଳେ ତାଙ୍କ ଘର ଭାଙ୍ଗୁଛନ୍ତି।#PrakrutiMishra#Babusan pic.twitter.com/OzY2DVuLHX— SUBHRANSU PANDA (@AuthorSubhransu) July 23, 2022
പ്രകൃതി മിശ്രയുടെ അമ്മ കൃഷ്‌ണപ്രിയ മിശ്രയുടെ പരാതിയുടെ അടിസ്ഥാനത്തിൽ ഇന്ത്യൻ ശിക്ഷാ നിയമത്തിലെ (ഐപിസി) 341, 294, 323, 506 വകുപ്പുകൾ പ്രകാരം ഖാർവേൽ നഗർ പോലീസ് കേസെടുത്തു. ജോലിക്ക് പോയ നടിയെ ഏതോ ഗുണ്ട വഴിയിറക്കി ആക്രമിക്കുകയായിരുന്നുവെന്നാണ് പരാതിയിൽ പറയുന്നത്. ഇക്കാര്യം അന്വേഷിക്കുമെന്നും ഡിസിപി സിംഗ് പറഞ്ഞു.
സംഭവം നടന്ന സ്ഥലത്തേക്ക് പോലീസ് പോയതായി വൈറലായ വീഡിയോയിൽ ഡിസിപി പറഞ്ഞു. ഈ കേസിൽ ലഭിക്കുന്ന തെളിവുകളുടെ അടിസ്ഥാനത്തിൽ അന്വേഷണം നടത്തുമെന്നും അദ്ദേഹം കൂട്ടിച്ചേർത്തു.
പിന്നീട്, ബാബുഷാന്റെ അമ്മ അപരാജിത മൊഹന്തി മരുമകളുടെ വീട്ടിലെത്തി, പിന്നീട് ഇരുവരും ഖരവേൽ നഗർ പോലീസ് സ്റ്റേഷനിലെത്തി കൗണ്ടർ എഫ്‌ഐആർ ഫയൽ ചെയ്തു.
ഇപ്പോൾ ചെന്നൈയിലുള്ള ബാബുഷാൻ ഒടിവിയോട് പറഞ്ഞു, “ചെന്നൈയിൽ ഉത്കൽ അസോസിയേഷൻ സംഘടിപ്പിച്ച ഉത്കൽ ദിവസ് ആഘോഷത്തിന് അതിഥികളായി എന്നെയും പ്രകൃതി മിശ്രയെയും ക്ഷണിച്ചിരുന്നു. ഒരു പുതിയ സിനിമ പ്രഖ്യാപിക്കാനും പ്രകൃതി എന്റെ സഹനടിയായ മറ്റൊരു സിനിമയുടെ പ്രൊമോഷനുമായി ഞാൻ ചെന്നൈയിലാണ്. അവൾ എന്റെ വളരെ നല്ല സുഹൃത്തും ബാല്യകാല സുഹൃത്തുമാണ്. ഞാൻ അവളെ എയർപോർട്ടിലേക്ക് കൊണ്ടുപോകാൻ പോയതായിരുന്നു.
“ഞാനും പ്രകൃതിയും എയർപോർട്ടിലേക്ക് പോകുമ്പോൾ, പെട്ടെന്ന് എന്റെ ഭാര്യയും അമ്മായിയപ്പനും വന്ന് ഞങ്ങളെ ആക്രമിക്കുകയും പ്രകൃതിയെ ഉപദ്രവിക്കുകയും ചെയ്യുന്നത് അംഗീകരിക്കാനാവില്ല. എന്റെ ഭാര്യ സിനിമാ മേഖലയിലല്ല, അതുകൊണ്ട് ഞങ്ങളുടെ ജോലിയെക്കുറിച്ചും ഞങ്ങൾ എങ്ങനെ പ്രവർത്തിക്കുന്നുവെന്നതിനെക്കുറിച്ചും അവർക്ക് ഒരു ധാരണയുമില്ല. ഞാൻ പൂർണ്ണ ഞെട്ടലിലാണ്,” ഒടിവി ഉദ്ധരിച്ച് താരം കൂട്ടിച്ചേർത്തു.
താനും താരവും സുഹൃത്തുക്കൾ മാത്രമായിരുന്നുവെന്നും പ്രകൃതി വ്യക്തമാക്കി. “തികച്ചും നിർഭാഗ്യകരമായ സംഭവമാണ്. ചെന്നൈയിലെ ഒരു ഒഡിയ അസോസിയേഷന്റെ ഒരു ചടങ്ങിൽ പുതിയ സിനിമയുടെ പ്രഖ്യാപനത്തിനായി സഹനടൻ ബാബുഷന്റെ കൂടെ പോവുകയായിരുന്നു ഞാൻ. ഞങ്ങൾ ഇതേ സ്ഥലത്തേക്ക് പോകുന്നതിനാൽ ബാബുഷാൻ എന്നെ കൂട്ടിക്കൊണ്ടുവരാൻ വന്നിരുന്നു. എന്നാൽ, അദ്ദേഹത്തിന്റെ ഭാര്യയും അമ്മായിയപ്പനും ചില ഗുണ്ടകളും സ്ഥലത്തെത്തി കാറിൽ കയറി. അവന്റെ അമ്മായിയപ്പൻ എന്നെ ശാരീരികമായി ഉപദ്രവിച്ചു. അവന്റെ ഗുണ്ടകൾ എന്നെയും മർദിച്ചു. അവർ ബാബുഷാനെ പോലും കൈകാര്യം ചെയ്തു,” പ്രകൃതി ഒടിവിയോട് പറഞ്ഞു.
“അവരുടെ കുടുംബ കാര്യത്തിലേക്ക് എന്നെ നിർബന്ധമായും വലിച്ചിഴക്കുകയാണ്. ഞങ്ങൾ സുഹൃത്തുക്കൾ മാത്രമാണ്. ഞങ്ങളുടെ ബന്ധം ആരാധകർക്ക് പോലും അറിയാം, എനിക്ക് ആരെയും പേടിയില്ല. എന്റെ ധീരവും നേരായതുമായ പ്രസ്താവനകൾക്കായി ഞാൻ പലപ്പോഴും വിവാദത്തിലേക്ക് വലിച്ചിഴക്കപ്പെടുന്നു,” നടി കൂട്ടിച്ചേർത്തു.
