മതങ്ങൾക്ക് അതീതമായി എല്ലാവർക്കും ഒരൊറ്റ നിയമം എന്ന ആശയം ഇന്ത്യയിൽ എക്കാലത്തും വലിയ ഭരണഘടനാപരമായ ചർച്ചകൾക്ക് വഴിവെച്ചിട്ടുള്ള ഒന്നാണ്. ഇപ്പോഴിതാ, ഉത്തരാഖണ്ഡിന് പിന്നാലെ ഗുജറാത്തിലും ഏക സിവിൽ കോഡ് (യു.സി.സി) നടപ്പിലാകുന്നു. ഏഴ് മണിക്കൂർ നീണ്ട മാരത്തൺ വാദപ്രതിവാദങ്ങൾക്കൊടുവിൽ, ഏറെ നിർണായകമായ ‘ഗുജറാത്ത് ഏക സിവിൽ കോഡ് ബിൽ- 2026’ സംസ്ഥാന നിയമസഭ ചൊവ്വാഴ്ച പാസാക്കി. പൗരന്മാരുടെ മതമോ ജാതിയോ നോക്കാതെ വിവാഹം, വിവാഹമോചനം, സ്വത്തവകാശം, ലിവ്-ഇൻ റിലേഷൻഷിപ്പുകൾ എന്നിവയ്ക്ക് ഇനി മുതൽ സംസ്ഥാനത്ത് ഒരൊറ്റ നിയമമായിരിക്കും ബാധകമാവുക.
പുതിയ നിയമം വ്യവസ്ഥ ചെയ്യുന്ന ശിക്ഷാനടപടികൾ ഏറെ കർശനമാണ്. നിർബന്ധിച്ചോ, ഭീഷണിപ്പെടുത്തിയോ, വഞ്ചനയിലൂടെയോ ഉള്ള വിവാഹങ്ങൾക്കും, ഒന്നിലധികം വിവാഹം കഴിക്കുന്നതിനും (പോളിഗമി/ബിഗമി) ഏഴ് വർഷം വരെ തടവുശിക്ഷ ലഭിക്കുമെന്നതാണ് ഏറ്റവും ശ്രദ്ധേയമായ മാറ്റം. കൂടാതെ, വിവാഹങ്ങളും ലിവ്-ഇൻ റിലേഷൻഷിപ്പുകളും നിയമപ്രകാരം രജിസ്റ്റർ ചെയ്യേണ്ടതും നിർബന്ധമാക്കിയിട്ടുണ്ട്.
വിവാഹം കഴിഞ്ഞ് 60 ദിവസത്തിനകം രജിസ്റ്റർ ചെയ്തില്ലെങ്കിൽ 10,000 രൂപ വരെ പിഴയൊടുക്കേണ്ടി വരും. ലിവ്-ഇൻ ബന്ധങ്ങൾ രജിസ്റ്റർ ചെയ്യാതിരുന്നാൽ മൂന്ന് മാസം വരെ തടവോ 10,000 രൂപ പിഴയോ ആണ് ശിക്ഷ. എന്നാൽ ഇത് ആരുടേയും സ്വാതന്ത്ര്യത്തിൽ കൈകടത്താനല്ലെന്നും, മറിച്ച് പെൺകുട്ടികളുടെ നിയമപരമായ സുരക്ഷ ഉറപ്പാക്കാനാണെന്നും സർക്കാർ വ്യക്തമാക്കുന്നു. ആൺമക്കൾക്കും പെൺമക്കൾക്കും സ്വത്തിൽ തുല്യ അവകാശം നൽകുന്നതിലൂടെ കാലങ്ങളായി നിലനിൽക്കുന്ന ലിംഗവിവേചനത്തിന് അറുതിവരുത്താനാകുമെന്നാണ് നിയമം ലക്ഷ്യമിടുന്നത്. ഗുജറാത്തിന് പുറത്ത് താമസിക്കുന്ന സംസ്ഥാനത്തെ സ്ഥിരതാമസക്കാർക്കും ഈ പുതിയ നിയമം ബാധകമായിരിക്കും.
ഭരണഘടനാ തത്വങ്ങളിൽ ഊന്നിയുള്ള ഈ നിയമം എല്ലാവർക്കും തുല്യനീതി ഉറപ്പാക്കുമെന്ന് ബിൽ സഭയിൽ അവതരിപ്പിച്ച മുഖ്യമന്ത്രി ഭൂപേന്ദ്ര പട്ടേൽ പറഞ്ഞു. “നമ്മുടെ വേദങ്ങൾ പറയുന്നത് പോലെ സത്യം ഒന്നാണെങ്കിൽ, മതങ്ങൾ പലതാണെങ്കിലും നീതി ഒന്നായിരിക്കണം,” അദ്ദേഹം സഭയിൽ വ്യക്തമാക്കി. ഭരണഘടനയുടെ ആർട്ടിക്കിൾ 14 ഉറപ്പുനൽകുന്ന നിയമത്തിന് മുന്നിലുള്ള തുല്യതയും, ആർട്ടിക്കിൾ 44 നിർദ്ദേശിക്കുന്ന ഏക സിവിൽ കോഡ് എന്ന ആശയവും മുൻനിർത്തിയാണ് ഈ ചരിത്രപരമായ നീക്കം. മതപരമായ ആചാരങ്ങളിലോ അനുഷ്ഠാനങ്ങളിലോ യാതൊരുവിധ ഇടപെടലുകളും പുതിയ നിയമം നടത്തില്ലെന്ന് മുഖ്യമന്ത്രി ഉറപ്പുനൽകി.
എന്നാൽ, ബില്ലിനെതിരെ ശക്തമായ പ്രതിഷേധമാണ് പ്രതിപക്ഷമായ കോൺഗ്രസും ആം ആദ്മി പാർട്ടിയും ഉയർത്തിയത്. ബിൽ ഭരണഘടനാ വിരുദ്ധമാണെന്നും, തികച്ചും മുസ്ലീം വിരുദ്ധമാണെന്നും ആരോപിച്ച് പ്രതിപക്ഷം സഭയിൽ ശബ്ദമുയർത്തി. ബിൽ സെലക്ട് കമ്മിറ്റിക്ക് വിടണമെന്ന അവരുടെ ആവശ്യം തള്ളിക്കളഞ്ഞ സഭ, ശബ്ദവോട്ടോടെയാണ് ബിൽ പാസാക്കിയത്. അതേസമയം, പട്ടികവർഗ (ST) വിഭാഗങ്ങളെയും ഭരണഘടനാപരമായ പരിരക്ഷയുള്ള മറ്റ് ചില പ്രത്യേക ഗോത്ര വിഭാഗങ്ങളെയും ഈ നിയമത്തിന്റെ പരിധിയിൽ നിന്ന് പൂർണ്ണമായും ഒഴിവാക്കിയിട്ടുണ്ട്.
ഫെബ്രുവരിയിൽ ഏക സിവിൽ കോഡ് പാസാക്കിയ ഉത്തരാഖണ്ഡാണ് രാജ്യത്ത് ഈ നിയമം കൊണ്ടുവന്ന ആദ്യ സംസ്ഥാനം. ഉത്തരാഖണ്ഡിന്റെ മാതൃക പിന്തുടർന്ന് തന്നെയാണ് ബി.ജെ.പി ഭരിക്കുന്ന ഗുജറാത്തും ഇപ്പോൾ മാറ്റങ്ങൾക്ക് തുടക്കമിടുന്നത്. കോൺഗ്രസ് ഇതിനെ എതിർക്കുന്നത് അവരുടെ സ്ഥിരമായ സ്ത്രീവിരുദ്ധ മനോഭാവം കൊണ്ടാണെന്ന് ഉപമുഖ്യമന്ത്രി ഹർഷ് സംഘവി സഭയിൽ വിമർശിച്ചു. മുൻപ് ഡോ. ബി.ആർ. അംബേദ്കർ സ്ത്രീകൾക്ക് തുല്യാവകാശം നൽകുന്ന നിയമം കൊണ്ടുവന്നപ്പോൾ അന്ന് കോൺഗ്രസ് പറഞ്ഞത് ‘ഇതിന് സമയമായിട്ടില്ല’ എന്നായിരുന്നുവെന്നും അദ്ദേഹം ഓർമ്മിപ്പിച്ചു.
പ്രതിപക്ഷത്തിന്റെ ആശങ്കകൾ മറുവശത്ത് ശക്തമായി തുടരുകയാണ്. 2027-ലെ നിയമസഭാ തിരഞ്ഞെടുപ്പ് മുന്നിൽക്കണ്ടുള്ള സർക്കാരിന്റെ തിടുക്കപ്പെട്ടുള്ള രാഷ്ട്രീയ നാടകമാണിതെന്ന് മുതിർന്ന കോൺഗ്രസ് നേതാവ് ശൈലേഷ് പർമർ ആരോപിച്ചു. തങ്ങളുടെ ശരീയത്ത് നിയമങ്ങൾക്കും ഖുറാൻ വചനങ്ങള്ക്കും എതിരാണ് ഈ ബില്ലെന്നും, ഇതിനെതിരെ കോടതിയെ സമീപിക്കുമെന്നും കോൺഗ്രസ് എം.എൽ.എ ഇമ്രാൻ ഖേഡാവാല തുറന്നടിച്ചു. യാതൊരു ആവശ്യവും ഉന്നയിക്കാതെയാണ് ന്യൂനപക്ഷ സമുദായത്തിന് മേൽ സർക്കാർ ഇത്തരം നിയമങ്ങൾ അടിച്ചേൽപ്പിക്കുന്നതെന്നും അദ്ദേഹം ആരോപിച്ചു.
അനുകൂലിച്ചും പ്രതികൂലിച്ചുമുള്ള വാദപ്രതിവാദങ്ങൾ തുടരുമ്പോഴും, സ്വത്തവകാശത്തിലും വിവാഹമോചന നിയമങ്ങളിലും സ്ത്രീ-പുരുഷ സമത്വം ഉറപ്പാക്കാൻ ഗുജറാത്ത് നടത്തുന്ന ഈ നിയമനിർമ്മാണം ഇന്ത്യൻ നിയമചരിത്രത്തിലെ തന്നെ നിർണായകമായ ഒരു ചുവടുവെപ്പാണ്
