ഹോട്ടൽ മുറിയിലെ സുരക്ഷിതത്വം ഇന്നൊരു വലിയ ചോദ്യചിഹ്നമായി മാറിയിരിക്കുകയാണ്. 2023-ലെ ഒരു രാത്രിയിൽ ഹോങ്കോംഗ് സ്വദേശിയായ എറിക് (യഥാർത്ഥ പേരല്ല) എന്ന യുവാവിന് നേരിട്ട അനുഭവം ആരുടെയും ഉറക്കം കെടുത്തുന്നതാണ്. പതിവുപോലെ സോഷ്യൽ മീഡിയയിൽ അശ്ലീല ദൃശ്യങ്ങൾക്കായി തിരയുകയായിരുന്നു എറിക്. പെട്ടെന്നാണ് ഒരു വീഡിയോയിൽ അയാളുടെ കണ്ണുടക്കിയത്. ആ മുറി, അവിടെ വെച്ചിരിക്കുന്ന ബാഗുകൾ… എല്ലാം പരിചിതം. വീഡിയോയിലേക്ക് സൂക്ഷിച്ചു നോക്കിയ എറിക് ഞെട്ടിത്തരിച്ചുപോയി. ആ വീഡിയോയിൽ ലൈംഗികബന്ധത്തിൽ ഏർപ്പെട്ടിരിക്കുന്നത് മറ്റാരുമല്ല, അത് താനും തന്റെ കാമുകിയുമായിരുന്നു!
മൂന്നാഴ്ച മുമ്പ് ദക്ഷിണ ചൈനയിലെ ഷെൻഷെനിലെ ഒരു ഹോട്ടലിൽ അവർ താമസിച്ചിരുന്നു. അവിടെ വെച്ച് തങ്ങളുടെ ഏറ്റവും സ്വകാര്യമായ നിമിഷങ്ങൾ ഒരു രഹസ്യക്യാമറ ഒപ്പിയെടുക്കുന്നുണ്ടെന്നും, അത് ആയിരക്കണക്കിന് അപരിചിതർക്ക് മുന്നിലേക്ക് ലൈവ് ആയി എത്തുന്നുണ്ടെന്നും അവർ അറിഞ്ഞിരുന്നില്ല. ചൈനയിലെ ‘സ്പൈ-ക്യാം പോൺ’ (Spy-cam porn) വ്യവസായത്തിന്റെ ഉപഭോക്താവായിരുന്ന എറിക് നിമിഷനേരം കൊണ്ട് അതിന്റെ ഇരയായി മാറുകയായിരുന്നു.
ടെലഗ്രാം വഴിയുള്ള കച്ചവടം
ബിബിസി വേൾഡ് സർവീസ് നടത്തിയ ഞെട്ടിക്കുന്ന അന്വേഷണത്തിലാണ് ഈ വൻ മാഫിയയുടെ ചുരുളഴിഞ്ഞത്. ചൈനയിൽ അശ്ലീല ദൃശ്യങ്ങളുടെ നിർമ്മാണവും വിതരണവും നിയമവിരുദ്ധമാണെങ്കിലും, കഴിഞ്ഞ ഒരു പതിറ്റാണ്ടായി ഈ രഹസ്യക്യാമറ ബിസിനസ്സ് തഴച്ചുവളരുകയാണ്. ടെലഗ്രാം (Telegram) ആപ്പാണ് ഇവരുടെ പ്രധാന വിപണി.
ഹോട്ടൽ മുറികളിലെ ദൃശ്യങ്ങൾ റെക്കോർഡ് ചെയ്യുക മാത്രമല്ല, അത് തത്സമയം (Livestreaming) സംപ്രേക്ഷണം ചെയ്യുക കൂടിയാണ് ഇവർ ചെയ്യുന്നത്. ഏകദേശം 18 മാസത്തോളം നീണ്ടുനിന്ന ബിബിസിയുടെ അന്വേഷണത്തിൽ, 180-ലധികം ഹോട്ടൽ മുറികളിൽ നിന്നുള്ള ദൃശ്യങ്ങൾ ലൈവ് സ്ട്രീം ചെയ്യുന്ന ആറ് വെബ്സൈറ്റുകളെക്കുറിച്ച് വിവരം ലഭിച്ചു. ആയിരക്കണക്കിന് ഹോട്ടൽ അതിഥികളാണ് തങ്ങളറിയാതെ ഈ ചതിക്കുഴിയിൽ വീണത്.
പണക്കൊഴുപ്പിന്റെ ലോകം
‘എകെഎ’ (AKA) എന്ന് പേരായ ഒരു ഏജന്റിലൂടെയാണ് ഈ ബിസിനസ്സ് നിയന്ത്രിക്കപ്പെടുന്നത്. ഉപഭോക്താക്കൾക്ക് മാസം ഏകദേശം 5,000 രൂപ (450 Yuan) നൽകിയാൽ ഈ ലൈവ് സ്ട്രീമിംഗ് സൈറ്റുകളിലേക്ക് പ്രവേശനം ലഭിക്കും. അതിഥികൾ മുറിയിൽ പ്രവേശിച്ച് കീ കാർഡ് ഇടുന്ന നിമിഷം മുതൽ ക്യാമറകൾ പ്രവർത്തിച്ചു തുടങ്ങും. കിടക്കയിലേക്ക് നേരിട്ട് ഫോക്കസ് ചെയ്യുന്ന രീതിയിലാണ് പല ക്യാമറകളും ഘടിപ്പിച്ചിരിക്കുന്നത്.
ബിബിസിയുടെ കണക്കനുസരിച്ച്, കഴിഞ്ഞ ഏപ്രിൽ മുതൽ മാത്രം ‘എകെഎ’ എന്ന ഏജന്റ് സമ്പാദിച്ചത് ഏകദേശം 18 ലക്ഷം രൂപയാണ് (22,000 ഡോളർ). ചൈനയിലെ ശരാശരി വാർഷിക വരുമാനത്തേക്കാൾ എത്രയോ മടങ്ങാണിത്. കാണികൾ ഈ ദൃശ്യങ്ങൾ കാണുക മാത്രമല്ല, അതിഥികളുടെ ശരീരത്തെക്കുറിച്ചും സ്വകാര്യ നിമിഷങ്ങളെക്കുറിച്ചും ടെലഗ്രാം ഗ്രൂപ്പുകളിൽ അശ്ലീല കമന്റുകൾ പാസാക്കുകയും ചെയ്യുന്നു.
കണ്ടുപിടിക്കാൻ ബുദ്ധിമുട്ട്
സാങ്കേതികവിദ്യയുടെ വളർച്ച ഇത്തരം കുറ്റകൃത്യങ്ങളെ കൂടുതൽ സങ്കീർണ്ണമാക്കിയിരിക്കുകയാണ്. എയർ കണ്ടീഷണർ വെന്റിലേറ്ററുകൾ, പ്ലഗ് സോക്കറ്റുകൾ എന്നിവയ്ക്കുള്ളിലാണ് സൂക്ഷ്മമായ ക്യാമറകൾ ഒളിപ്പിക്കുന്നത്. ഓൺലൈനിൽ ലഭ്യമായ ‘ഹിഡൻ ക്യാമറ ഡിറ്റക്ടറുകൾ’ ഉപയോഗിച്ചാൽ പോലും ഇവ കണ്ടെത്തുക പ്രയാസമാണെന്ന് ബിബിസി സംഘം സാക്ഷ്യപ്പെടുത്തുന്നു. ഒരു ഹോട്ടലിലെ ക്യാമറ കണ്ടെത്തി നശിപ്പിച്ചാൽ, മണിക്കൂറുകൾക്കുള്ളിൽ മറ്റൊരു ഹോട്ടലിൽ പുതിയ ക്യാമറ സ്ഥാപിച്ചാണ് ഈ സംഘം പ്രവർത്തിക്കുന്നത്.
ഇന്ത്യയിലും ജാഗ്രത വേണം
ഇത് ചൈനയുടെ മാത്രം പ്രശ്നമല്ല. ദക്ഷിണ കൊറിയയിൽ ‘മോൾക’ (Molka) എന്ന പേരിലാണ് ഈ പ്രശ്നം അറിയപ്പെടുന്നത്. ഇന്ത്യയിലും ഇത്തരം സംഭവങ്ങൾ ഒറ്റപ്പെട്ടതമല്ല. വസ്ത്രം മാറുന്ന മുറികളിലും, ടൂറിസ്റ്റ് ഹോമുകളിലും ക്യാമറ കണ്ടെത്തിയ വാർത്തകൾ നമ്മുടെ നാട്ടിലും റിപ്പോർട്ട് ചെയ്യപ്പെട്ടിട്ടുണ്ട്.
യാത്രകൾ പോകുമ്പോൾ ഹോട്ടൽ മുറികളിൽ കയറിയ ഉടൻ ലൈറ്റുകൾ അണച്ച് മൊബൈൽ ടോർച്ച് ഉപയോഗിച്ച് കണ്ണാടികളിലും, ഇലക്ട്രോണിക് ഉപകരണങ്ങളിലും, സ്മോക്ക് ഡിറ്റക്ടറുകളിലും പരിശോധന നടത്തുന്നത് ഉചിതമായിരിക്കും. അസ്വാഭാവികമായി എന്തെങ്കിലും തിളക്കം കണ്ടാൽ ശ്രദ്ധിക്കുക.
തകർന്ന ജീവിതങ്ങൾ
തന്റെ കാമുകിയായ എമിലിയോട് (യഥാർത്ഥ പേരല്ല) എറിക് ഈ വിവരം പറഞ്ഞപ്പോൾ അവളത് വിശ്വസിച്ചില്ല. എന്നാൽ ആ ദൃശ്യങ്ങൾ നേരിൽ കണ്ടപ്പോൾ അവൾ തകർന്നുപോയി. സഹപ്രവർത്തകരോ കുടുംബാംഗങ്ങളോ ഇത് കാണുമോ എന്ന ഭയത്താൽ ആഴ്ചകളോളം അവർ പരസ്പരം മിണ്ടാൻ പോലും കൂട്ടാക്കിയില്ല. ഇന്ന്, പുറത്തിറങ്ങുമ്പോൾ ആരെങ്കിലും തിരിച്ചറിയുമോ എന്ന ഭയത്താൽ മുഖം മറയ്ക്കുന്ന തൊപ്പികൾ ധരിച്ചാണ് ഇവർ നടക്കുന്നത്. ഹോട്ടലുകളിൽ താമസിക്കാൻ പോലും ഇവർക്കിന്ന് ഭയമാണ്.
നാം സുരക്ഷിതരാണെന്ന് കരുതുന്ന അടച്ചിട്ട മുറികൾക്കുള്ളിൽ പോലും ഒളിഞ്ഞിരിക്കുന്ന കണ്ണുകളുണ്ടാകാമെന്ന ഭയാനകമായ യാഥാർത്ഥ്യമാണ് ഈ സംഭവം ഓർമ്മിപ്പിക്കുന്നത്. സ്വകാര്യത എന്നത് ഡിജിറ്റൽ യുഗത്തിൽ വെറുമൊരു സങ്കൽപ്പമായി മാറിക്കൊണ്ടിരിക്കുകയാണ്.
