ഓരോ വിജയത്തിന് പിന്നിലും ഒരു സ്ത്രീ ഉണ്ടാകുമെന്ന് പറയാറുണ്ട്. എന്നാൽ ഇന്ത്യൻ സിനിമയെ ഞെട്ടിച്ച ‘കാന്താര’യുടെ കാര്യത്തിൽ, ആ വിജയത്തിന് പിന്നിലല്ല, ഒപ്പത്തിനൊപ്പം തന്നെ ഒരു സ്ത്രീശക്തിയുണ്ടായിരുന്നു. സിനിമയുടെ എഴുത്തും സംവിധാനവും അഭിനയവുമായി റിഷഭ് ഷെട്ടി എന്ന ഒറ്റയാൾ പട്ടാളം നിറഞ്ഞാടിയപ്പോൾ, അദ്ദേഹത്തിന് താങ്ങും തണലുമായ, സിനിമയുടെ ആത്മാവ് ചോർന്നുപോകാതെ കാത്ത ആ ശക്തിയാണ് ഭാര്യ പ്രഗതി ഷെട്ടി. ‘കാന്താര’യുടെ രണ്ടാം ഭാഗമായ ‘കാന്താര: ചാപ്റ്റർ 1’ വരുമ്പോൾ,പ്രഗതിയെ കൂടുതൽ അറിയേണ്ടതുണ്ട്.
പ്രഗതിയുടെ രണ്ട് ലോകങ്ങൾ
‘കാന്താര’യുടെ ചിത്രീകരണ സമയത്ത് പ്രഗതിക്ക് രണ്ട് റോളുകളുണ്ടായിരുന്നു. ഒന്ന്, സിനിമയുടെ വസ്ത്രാലങ്കാരം നിർവ്വഹിക്കുന്ന ഒരു ക്രിയേറ്റീവ് പ്രൊഫഷണലിന്റെ റോൾ. രണ്ട്, വീട്ടിലെ കാര്യങ്ങളെല്ലാം നോക്കിനടത്തുന്ന, ഭർത്താവിന് പൂർണ്ണ പിന്തുണ നൽകുന്ന ഭാര്യയുടെയും അമ്മയുടെയും റോൾ. റിഷഭ് ഷെട്ടി ദിവസവും 3-4 മണിക്കൂർ മാത്രം ഉറങ്ങി സിനിമയ്ക്കായി ഉഴിഞ്ഞുവെച്ചപ്പോൾ, രണ്ട് പിഞ്ചുകുഞ്ഞുങ്ങളെയും വീടിനെയും ഒരു കുറവും വരുത്താതെ നോക്കിയത് പ്രഗതിയായിരുന്നു.
വടക്കൻ മലബാറിലെ തെയ്യക്കോലങ്ങളെ ഓർമ്മിപ്പിക്കുന്ന തുളുനാട്ടിലെ ‘ദൈവക്കോല’ങ്ങളുടെ വസ്ത്രാലങ്കാരം ഒരുക്കുക എന്നത് വലിയൊരു വെല്ലുവിളിയായിരുന്നു. സിനിമയുടെ തനിമയും സംസ്കാരവും ഒട്ടും ചോർന്നുപോകാതെ, ഓരോ കഥാപാത്രത്തിനും ചേർന്ന വസ്ത്രങ്ങൾ ഒരുക്കിയത് പ്രഗതിയുടെ മേൽനോട്ടത്തിലാണ്. ‘കാന്താര’ തനിക്കൊരു സർവ്വകലാശാല പോലെയായിരുന്നുവെന്നും, വലിയൊരു പ്രോജക്റ്റിന്റെ സമ്മർദ്ദങ്ങളെ എങ്ങനെ കൈകാര്യം ചെയ്യണമെന്ന് താൻ പഠിച്ചത് അവിടെ നിന്നാണെന്നും പ്രഗതി പറയുന്നു.
സോഫ്റ്റ്വെയറിൽ നിന്ന് സാൻഡൽവുഡിലേക്ക്
കർണാടകയിലെ ഉഡുപ്പി ജില്ലയിലെ മന്ദാർത്തി എന്ന ഗ്രാമത്തിൽ നിന്നാണ് പ്രഗതിയുടെ വരവ്. ഷിവമോഗ്ഗയിലെ സഹ്യാദ്രി കോളേജിൽ നിന്ന് എൻജിനീയറിങ് ബിരുദം നേടിയ ശേഷം, ബെംഗളൂരുവിൽ ഒരു സോഫ്റ്റ്വെയർ എൻജിനീയറായി ജോലി ചെയ്യുകയായിരുന്നു. എന്നാൽ, കലയോടും ഡിസൈനിങ്ങിനോടുമുള്ള അടങ്ങാത്ത ആഗ്രഹമാണ് പ്രഗതിയെ ഒടുവിൽ സിനിമയുടെ ലോകത്തേക്ക് എത്തിച്ചത്. റിഷഭ് ഷെട്ടിയുടെ തന്നെ ‘ബെൽ ബോട്ടം’ (2019) എന്ന സിനിമയിലൂടെയാണ് പ്രഗതി വസ്ത്രാലങ്കാര രംഗത്ത് സജീവമാകുന്നത്.
View this post on Instagram
ഒരു പ്രണയകഥ
സിനിമയേക്കാൾ മനോഹരമാണ് റിഷഭിന്റെയും പ്രഗതിയുടെയും പ്രണയകഥ. ഒരു സിനിമാ പരിപാടിക്കിടയിൽ കണ്ടുമുട്ടിയ ഇരുവരും പിന്നീട് ഫേസ്ബുക്കിലൂടെയാണ് സൗഹൃദം സ്ഥാപിക്കുന്നത്. ആ സംസാരം പതിയെ പ്രണയത്തിലേക്ക് വഴിമാറി. എന്നാൽ, ഇവരുടെ വിവാഹത്തിന് പ്രഗതിയുടെ വീട്ടുകാർക്ക് തുടക്കത്തിൽ ചില ആശങ്കകളുണ്ടായിരുന്നു. സിനിമയിൽ അന്ന് അത്ര ഉറച്ച സ്ഥാനമില്ലാതിരുന്ന റിഷഭിന്റെ കയ്യിൽ മകളുടെ ഭാവി സുരക്ഷിതമാകുമോ എന്നായിരുന്നു അവരുടെ ഭയം. എന്നാൽ, എല്ലാ എതിർപ്പുകളെയും മറികടന്ന് 2017-ൽ ഇരുവരും വിവാഹിതരായി. ഇന്ന് അവർക്ക് രണ്ട് മക്കളുണ്ട്, 2019-ൽ ജനിച്ച മകൻ റൻവിത്തും 2022-ൽ ജനിച്ച മകൾ രാധ്യയും.
ഇന്ന് കന്നഡ സിനിമയിലെ ‘പവർ കപ്പിൾ’ എന്നാണ് ഇരുവരും അറിയപ്പെടുന്നത്. റിഷഭ് ഷെട്ടി ക്യാമറയ്ക്ക് മുന്നിൽ താരമായി തിളങ്ങുമ്പോൾ, പ്രഗതി ക്യാമറയ്ക്ക് പിന്നിൽ സിനിമയുടെ വിജയത്തിന് ചുക്കാൻ പിടിക്കുന്നു. ‘കാന്താര: ചാപ്റ്റർ 1’ ലൂടെ പ്രഗതി എന്ന കലാകാരിയെ ലോകം കൂടുതൽ അറിയാൻ പോവുകയാണ്.
