വിശ്വാസമാണ് ഏതൊരു പ്രണയബന്ധത്തിന്റെയും അടിത്തറ. പങ്കാളികൾ പരസ്പരം സത്യസന്ധത പുലർത്തുമ്പോൾ ആ ബന്ധം ഒരു ആയുസ്സ് മുഴുവൻ നിലനിൽക്കും. എന്നാൽ, വഞ്ചനയുടെ ഒരു ചെറിയ കറ മതി കെട്ടിപ്പടുത്തതെല്ലാം തകരാൻ. വിശ്വാസം നഷ്ടപ്പെടുമ്പോൾ, ബന്ധങ്ങളും പെട്ടെന്ന് അവസാനിക്കുന്നു.
വിവാഹത്തിന് ദിവസങ്ങൾ മാത്രം ബാക്കിനിൽക്കെ, താൻ അതിക്രൂരമായി വഞ്ചിക്കപ്പെടുകയായിരുന്നു എന്ന് തിരിച്ചറിഞ്ഞ ഒരു യുവതിയുടെ ജീവിതത്തിലും സംഭവിച്ചത് ഇതാണ്. പക്ഷെ, ആ ചതിക്ക് അവർ നൽകിയ മറുപടി കേട്ടാൽ ആരും അമ്പരന്നുപോകും. ഒരു ദിവസമോ രണ്ടു ദിവസമോ അല്ല, നീണ്ട എട്ട് വർഷം നീണ്ടുനിന്ന ഒരു പ്രതികാരമാണ് അവർ നടപ്പിലാക്കിയത്. അതും, കാമുകന്റെ സ്വന്തം സഹോദരിയുടെ സഹായത്തോടെ!
കഥ തുടങ്ങുന്നു
തന്റെ ഭാവിവരൻ കഴിഞ്ഞ ആറുമാസമായി മറ്റൊരു സ്ത്രീയുമായി പ്രണയത്തിലായിരുന്നു എന്ന് മാത്രമല്ല, അവളോടൊപ്പം രാത്രികൾ ചിലവഴിക്കുകയും ചെയ്തിരുന്നു എന്ന് വിവാഹത്തിന് തൊട്ടുമുമ്പാണ് യുവതി അറിയുന്നത്. ഈ ഞെട്ടിക്കുന്ന സത്യം അറിഞ്ഞ നിമിഷം തന്നെ അവർ ആ വിവാഹത്തിൽ നിന്ന് പിന്മാറി. എന്നാൽ, ആ വേദനയിലും അപമാനത്തിലും നിന്നുകൊണ്ട് അവർ ഒരു തീരുമാനമെടുത്തു; തന്നെ ചതിച്ചയാൾക്ക് അത്ര എളുപ്പത്തിൽ ഒരു മാപ്പ് നൽകേണ്ടതില്ല.
‘ഇറ്റ്സ് എ ഗേൾ തിംഗ്’ (It’s A Girl Thing) എന്ന പോഡ്‌കാസ്റ്റിലൂടെയാണ് യുവതി തന്റെ പേര് വെളിപ്പെടുത്താതെ ഈ പ്രതികാരകഥ ലോകത്തോട് പറഞ്ഞത്. വളരെ ശാന്തമായി, എന്നാൽ കൃത്യമായ ആസൂത്രണത്തോടെ അവർ നടപ്പിലാക്കിയ ആ പദ്ധതിയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.
സഹോദരി കൂട്ടുനിന്ന ‘മധുര പ്രതികാരം’
പ്രതികാരം അതിബുദ്ധിപരവും എന്നാൽ വളരെ ലളിതവുമായിരുന്നു. വിവാഹം മുടങ്ങിയ ശേഷം, ശല്യക്കാരായ ആളുകളോ, അപരിചിതരോ, അല്ലെങ്കിൽ വഴിയിൽ വെച്ച് ശല്യപ്പെടുത്തുന്ന പുരുഷന്മാരോ ഒക്കെ യുവതിയോട് എപ്പോഴെങ്കിലും ഫോൺ നമ്പർ ചോദിച്ചാൽ, അവർ നൽകിയിരുന്നത് തന്റെ മുൻ കാമുകന്റെ നമ്പറായിരുന്നു.
ഫലം എന്തായിരിക്കുമെന്ന് ഊഹിക്കാമല്ലോ. യുവാവിന് വിശ്രമമില്ലാതെ അനാവശ്യ കോളുകളും മെസ്സേജുകളും വരാൻ തുടങ്ങി. ഈ ശല്യം സഹിക്കവയ്യാതെ എട്ട് വർഷത്തിനിടെ രണ്ടുതവണ അയാൾക്ക് തന്റെ ഫോൺ നമ്പർ മാറ്റേണ്ടി വന്നു.
എന്നാൽ ഇവിടെയാണ് കഥയിലെ ഏറ്റവും വലിയ ട്വിസ്റ്റ്. ഓരോ തവണ അയാൾ പുതിയ നമ്പർ എടുക്കുമ്പോഴും, ആ പുതിയ നമ്പർ യുവതിക്ക് രഹസ്യമായി അയച്ചുകൊടുത്തിരുന്നത് മറ്റാരുമല്ല, അയാളുടെ സ്വന്തം സഹോദരിയായിരുന്നു! തന്റെ സഹോദരൻ ചെയ്ത ചതിയോട് ആ സഹോദരിക്കും ഒട്ടും യോജിപ്പുണ്ടായിരുന്നില്ല. അങ്ങനെ, സഹോദരിയുടെ സഹായത്തോടെ എട്ട് വർഷം ആ ശല്യം തുടർന്നു. ഏറ്റവും രസകരമായ കാര്യം, ഇത്രയും വർഷമായിട്ടും തനിക്ക് ഈ ‘എട്ടിന്റെ പണി’ തന്നത് ആരാണെന്ന് ആ യുവാവിന് ഇന്നും അറിയില്ല എന്നതാണ്.
പ്രതികാരത്തിന്റെ മനഃശാസ്ത്രം
സോഷ്യൽ മീഡിയയിൽ ഈ കഥ വൈറലായതോടെ, യുവതിയുടെ ക്ഷമയോടെയുള്ള പ്രതികാരത്തെ അഭിനന്ദിച്ചുകൊണ്ട് നിരവധി പേർ രംഗത്തെത്തി. വഞ്ചിക്കപ്പെടുമ്പോൾ ആളുകൾ എന്തുകൊണ്ട് പ്രതികാരത്തിലേക്ക് തിരിയുന്നു എന്നതിന് മനഃശാസ്ത്രപരമായ പല കാരണങ്ങളുമുണ്ട്. ‘റിവഞ്ച് സൈക്കോളജി’ (Revenge Psychology) അനുസരിച്ച്, ചതിക്കപ്പെടുമ്പോൾ ഉണ്ടാകുന്ന അതിയായ വേദനയും നിസ്സഹായതയുമാണ് പലപ്പോഴും അക്രമരഹിതമായ ഇത്തരം പ്രതികാരങ്ങൾക്ക് പ്രേരിപ്പിക്കുന്നത്. തനിക്ക് നീതി ലഭിച്ചു എന്നൊരു താൽക്കാലിക സംതൃപ്തി നൽകാൻ ഇതിലൂടെ കഴിഞ്ഞേക്കാം. എന്നാൽ, ബന്ധങ്ങളിൽ വിദഗ്ദ്ധരായവർ (Relationship experts) പറയുന്നത്, പ്രതികാരം ചെയ്യുന്നത് ആ മുറിവ് ഉണങ്ങാതെ സൂക്ഷിക്കുമെന്നും, ജീവിതത്തിൽ മുന്നോട്ട് പോകാൻ (move on) അത് തടസ്സമാകുമെന്നുമാണ്.
‘എരിവുള്ള’ മറ്റൊരു പ്രതികാരം
വിചിത്രമായ പ്രതികാരങ്ങളുടെ കഥ ഇവിടെ തീരുന്നില്ല. രക്തത്തിൽ അർബുദം (Blood Cancer) ബാധിച്ച് കീമോതെറാപ്പിയിലൂടെ കടന്നുപോകുമ്പോൾ, തന്റെ ഭർത്താവ് മറ്റൊരു സ്ത്രീയുമായി ബന്ധത്തിലാണെന്ന് കണ്ടെത്തിയ ഒരു യുവതിയുടെ കഥയും അടുത്തിടെ ചർച്ചയായിരുന്നു.
രോഗം ഭേദമായ ശേഷം അവർ വിവാഹമോചനം നേടി. പക്ഷെ അതിനുമുമ്പ് അവർ ഒരു ‘എരിവുള്ള’ പാഠം അയാളെ പഠിപ്പിച്ചു. ഭർത്താവ് ഒരു സൈക്ലിംഗ് പ്രേമിയായിരുന്നു, സൈക്ലിംഗ് ഷോർട്ട്‌സിനടിയിൽ അടിവസ്ത്രം ധരിക്കുന്ന ശീലവും അയാൾക്കില്ലായിരുന്നു. ഇത് കൃത്യമായി അറിയാമായിരുന്ന ഭാര്യ, അയാളുടെ എല്ലാ സൈക്ലിംഗ് ഗിയറുകളുടെയും ഉള്ളിൽ എരിവുള്ള മുളക് അരച്ചുതേച്ചു.
അതുകൊണ്ട് മാത്രം നിർത്തിയില്ല. ടോയ്‌ലറ്റിൽ മൂത്രമൊഴിച്ച ശേഷം, അതിൽ ഭർത്താവിന്റെ ടൂത്ത് ബ്രഷ് മുക്കിവെക്കാനും അവർ മടിച്ചില്ല. എല്ലാ പ്രഭാതത്തിലും തന്റെ നിശബ്ദമായ കോപത്തിന്റെ ഒരു ‘ഡോസ്’ അയാൾക്ക് ലഭിക്കുന്നുണ്ടെന്ന് അവർ ഉറപ്പാക്കി.
ഇത്തരം പ്രതികാരകഥകൾ കേൾക്കുമ്പോൾ കൗതുകം തോന്നാമെങ്കിലും, അത് അടിവരയിടുന്നത് തകർന്ന വിശ്വാസത്തിന്റെയും ആഴത്തിലുള്ള വൈകാരിക മുറിവുകളുടെയും ചിത്രമാണ്. ഇതിനെ തക്കതായ ശിക്ഷ എന്നാണോ, അതോ ആഴത്തിലുള്ള നിരാശയുടെ പ്രതിഫലനം എന്നാണോ വിളിക്കേണ്ടത്? അത് വായനക്കാർക്ക് തീരുമാനിക്കാം.
