വംശീയ അധിക്ഷേപങ്ങൾക്ക് ഇരയാകുന്ന ആ മുഖത്തിന് പിന്നിലൊരു നോവിന്റെ കഥയുണ്ട്; ആരാണ് രാജേന്ദ്ര പഞ്ചാൽ?

സോഷ്യൽ മീഡിയയിൽ ഇന്ത്യക്കാരെ പരിഹസിക്കാനും വംശീയമായി അധിക്ഷേപിക്കാനും വിദേശ ട്രോൾ അക്കൗണ്ടുകൾ സ്ഥിരമായി ഉപയോഗിക്കുന്ന ഒരു മുഖമുണ്ട്. ഇന്ത്യക്കാരുടെ ശരാശരി രൂപം ഇതാണെന്ന് വരുത്തിത്തീർക്കാൻ അവർ വ്യാപകമായി പ്രചരിപ്പിക്കുന്ന ആ ചിത്രത്തിന് പിന്നിൽ കടുത്ത ജീവിതനൊമ്പരങ്ങളുടെയും അതിജീവനത്തിന്റെയും ഒരു വലിയ കഥയുണ്ട്. പൂനെ സ്വദേശിയായ രാജേന്ദ്ര പഞ്ചാൽ എന്ന മനുഷ്യനാണ് ലോകമറിയാതെ സൈബർ ഇടങ്ങളിലെ വംശീയ വിദ്വേഷത്തിന് ഇരയാകുന്നത്.

ആരാണ് രാജേന്ദ്ര പഞ്ചാൽ? എന്തുകൊണ്ടാണ് അദ്ദേഹത്തിന്റെ മുഖത്തിന് ഇങ്ങനെയൊരു പ്രത്യേകത വന്നത്?

ഒരു വയസ്സിൽ സംഭവിച്ച ദുരന്തം

ജന്മനാൽ ഉള്ള വൈകല്യമായിരുന്നില്ല രാജേന്ദ്രന്റേത്. വെറും ഒരു വയസ്സ് മാത്രം പ്രായമുള്ളപ്പോൾ നടക്കാൻ പഠിക്കുന്നതിനിടെ മുഖം ഇടിച്ചു വീണതാണ് രാജേന്ദ്രന്റെ ജീവിതം മാറ്റിമറിച്ചത്. ആ വീഴ്ചയിൽ താടിയെല്ലിന് ഗുരുതരമായ പരിക്കേറ്റു. നിർധനരായ മാതാപിതാക്കൾക്ക് സാമ്പത്തിക ബുദ്ധിമുട്ട് കാരണം കുഞ്ഞിന് മതിയായ ചികിത്സ നൽകാൻ കഴിഞ്ഞില്ല. ഇതോടെ, താടിയെല്ലുകൾ യഥാസ്ഥാനത്ത് ഉറയ്ക്കാതെ വരികയും വായ 1.5 സെന്റീമീറ്ററിൽ കൂടുതൽ തുറക്കാൻ കഴിയാത്ത അവസ്ഥയിലേക്ക് (TMJ Ankylosis) രാജേന്ദ്രൻ മാറുകയും ചെയ്തു.

38 വർഷത്തെ നരകയാതന

ഏതാണ്ട് 38 വർഷത്തോളം കടുത്ത വേദനയും പരിമിതികളും സഹിച്ചാണ് രാജേന്ദ്ര ജീവിച്ചത്. വായ തുറക്കാൻ കഴിയാത്തതിനാൽ ഖരരൂപത്തിലുള്ള ആഹാരം കഴിക്കാൻ അദ്ദേഹത്തിന് സാധിച്ചിരുന്നില്ല. ദ്രാവകരൂപത്തിലുള്ളതും പകുതി വേവിച്ചതുമായ ഭക്ഷണമായിരുന്നു ഏക ആശ്രയം. ഇത് അദ്ദേഹത്തെ പോഷകാഹാരക്കുറവിലേക്കും മറ്റ് ആരോഗ്യപ്രശ്നങ്ങളിലേക്കും നയിച്ചു. സംസാരിക്കാൻ പോലും അദ്ദേഹം ഏറെ ബുദ്ധിമുട്ടിയിരുന്നു.

ജീവിതം തിരിച്ചുപിടിച്ച ശസ്ത്രക്രിയ

2017-ൽ പൂനെയിലെ എം.എ. രംഗൂൺവാല കോളേജ് ഓഫ് ഡെന്റൽ സയൻസസ് ആൻഡ് റിസർച്ച് സെന്ററിൽ വെച്ച് നടന്ന ശസ്ത്രക്രിയ രാജേന്ദ്രന്റെ ജീവിതത്തിൽ വഴിത്തിരിവായി. മാക്സിലോഫേഷ്യൽ സർജനായ ഡോ. സമീർ ഗാർഡെയാണ് സൗജന്യമായി ഈ സങ്കീർണ്ണ ശസ്ത്രക്രിയ നിർവഹിച്ചത്.

“ഇതൊരു അപൂർവ്വ കേസാണെന്ന്” ഡോ. ഗാർഡെ അന്ന് പറഞ്ഞിരുന്നു. സാധാരണഗതിയിൽ കുട്ടിക്കാലത്ത് തന്നെ ഇത്തരം പ്രശ്നങ്ങൾ കണ്ടെത്തി ചികിത്സിക്കാറാണ് പതിവ്. എന്നാൽ 38 വർഷത്തോളം ഈ അവസ്ഥയിൽ തുടർന്നത് ചികിത്സ ഏറെ സങ്കീർണ്ണമാക്കി. നാല് മണിക്കൂറിലധികം നീണ്ട ശസ്ത്രക്രിയയ്ക്കൊടുവിൽ, ഒട്ടിപ്പിടിച്ച തലയോട്ടിയിലെ എല്ലുകൾ വേർപെടുത്തുകയും വായ 45 മില്ലീമീറ്റർ വരെ തുറക്കാൻ കഴിയുന്ന അവസ്ഥയിലേക്ക് എത്തിക്കുകയും ചെയ്തു.

തുടരുന്ന വംശീയ അധിക്ഷേപങ്ങൾ

ഒരു മനുഷ്യൻ തന്റെ ശാരീരിക പരിമിതികളെ അതിജീവിച്ച് ജീവിതത്തിലേക്ക് തിരികെ വന്നതിന്റെ ഈ കഥയൊന്നും അറിയാതെയാണ് പാശ്ചാത്യ അക്കൗണ്ടുകൾ ഉൾപ്പെടെയുള്ളവർ രാജേന്ദ്രയുടെ പഴയ ചിത്രം ഉപയോഗിച്ച് വംശീയ അധിക്ഷേപം നടത്തുന്നത്. ഇന്ത്യക്കാരെ ഒന്നടങ്കം അപമാനിക്കാൻ ഒരു പാവം മനുഷ്യന്റെ നിസ്സഹായതയെ ആയുധമാക്കുകയാണ് ഇവർ ചെയ്യുന്നത്.

അടുത്തിടെ, അമേരിക്കൻ ക്രിപ്‌റ്റോകറൻസി പ്ലാറ്റ്‌ഫോമായ പോളിമാർക്കറ്റ് (Polymarket) ഇന്ത്യക്കാരെയും മറ്റ് ചില രാജ്യക്കാരെയും ലക്ഷ്യമിട്ട് വംശീയ പരാമർശങ്ങൾ നടത്തിയത് വലിയ വിവാദമായിരുന്നു. ഇന്ത്യ, നൈജീരിയ തുടങ്ങിയ രാജ്യങ്ങളിൽ നിന്നുള്ള ഉപയോക്താക്കളെ അപമാനിക്കുന്ന തരത്തിലായിരുന്നു അവരുടെ പോസ്റ്റ്. സംഭവം വിവാദമായതോടെ കമ്പനിയുടെ ചീഫ് ലീഗൽ ഓഫീസർ നീൽ കുമാർ പരസ്യമായി മാപ്പ് പറയുകയും കമ്പനി പൂർണ്ണ ഉത്തരവാദിത്തം ഏറ്റെടുക്കുന്നതായി അറിയിക്കുകയും ചെയ്തിരുന്നു.

സോഷ്യൽ മീഡിയയിൽ പ്രചരിക്കുന്ന ഓരോ ട്രോൾ ചിത്രത്തിന് പിന്നിലും രാജേന്ദ്ര പഞ്ചാലിനെപ്പോലെ, പറയാൻ ബാക്കിവെച്ച കണ്ണീരിന്റെയും വേദനയുടെയും കഥകൾ ഉണ്ടാകാം എന്ന ഓർമ്മപ്പെടുത്തൽ കൂടിയാണ് ഈ സംഭവം. വംശീയതയുടെ പേരിൽ വേട്ടയാടപ്പെടുന്നവർ യഥാർത്ഥത്തിൽ ജീവിതത്തിലെ പോരാളികളാണെന്ന് ലോകം തിരിച്ചറിയേണ്ടതുണ്ട്.