മരണം പോലും അപമാനിക്കപ്പെട്ട സൗന്ദര്യറാണി: സിൽക്ക് സ്മിതയുടെ ഓർമ്മകൾ
ദക്ഷിണേന്ത്യൻ സിനിമാലോകത്തെ സൗന്ദര്യത്തിന്റെ പര്യായമായി തിളങ്ങിയ താരമാണ് സിൽക്ക് സ്മിത. എന്നാൽ, ജീവിതകാലം മുഴുവൻ ഒരുപാട് ദുരിതങ്ങൾ സഹിച്ച ഈ നടിക്ക്, മരണശേഷം പോലും അപമാനങ്ങൾ നേരിടേണ്ടി വന്നുവെന്ന് വെളിപ്പെടുത്തിയിരിക്കുകയാണ് തമിഴ് സിനിമാ പത്രപ്രവർത്തകനായ സബിത ജോസഫ്. ഒരു തമിഴ് യൂട്യൂബ് ചാനലിന് നൽകിയ അഭിമുഖത്തിലാണ് അദ്ദേഹം സിൽക്ക് സ്മിതയുടെ ദുരൂഹമായ മരണത്തെക്കുറിച്ചും, അതിനുശേഷമുണ്ടായ വേദനിപ്പിക്കുന്ന സംഭവങ്ങളെക്കുറിച്ചും പങ്കുവെച്ചത്.
ആന്ധ്രാപ്രദേശിലെ ദെന്ദുലൂരു എന്ന ഗ്രാമത്തിൽ വിജയലക്ഷ്മി എന്ന പേരിൽ ജനിച്ച സിൽക്ക് സ്മിത, സിനിമയിൽ ഒരു ടച്ച്-അപ്പ് ആർട്ടിസ്റ്റായാണ് തന്റെ കരിയർ ആരംഭിക്കുന്നത്. പിന്നീട് ചെറിയ വേഷങ്ങളിലൂടെയാണ് അഭിനയരംഗത്തേക്ക് കടന്നുവന്നത്. ചലച്ചിത്രലോകത്തെ വഴിത്തിരിവായത് നടനും സംവിധായകനുമായ വിനു ചക്രവർത്തി എ.വി.എം സ്റ്റുഡിയോസിന് സമീപമുള്ള ഫ്ലോർ മില്ലിൽ വെച്ച് അവരെ കണ്ടുമുട്ടിയതോടെയാണ്.
1980-ൽ പുറത്തിറങ്ങിയ ‘വണ്ടിച്ചക്രം’ എന്ന ചിത്രത്തിലെ ‘സിൽക്ക്’ എന്ന കഥാപാത്രം സ്മിതയുടെ ജീവിതം മാറ്റിമറിച്ചു. അതോടെ അവർ സിനിമാലോകത്ത് സിൽക്ക് സ്മിത എന്ന പേരിൽ അറിയപ്പെട്ടു, ദക്ഷിണേന്ത്യൻ സിനിമയിലെ *’സൗന്ദര്യറാണി’*യായി മാറി.
മരണശേഷവും അപമാനം
1996-ൽ തന്റെ 36-ാം വയസ്സിൽ സിൽക്ക് സ്മിത ആത്മഹത്യ ചെയ്യുകയായിരുന്നു. സ്മിതയുടെ മരണത്തെക്കുറിച്ച് കേട്ടറിഞ്ഞ് വീട്ടിലെത്തിയ സബിത ജോസഫ് അന്ന് കണ്ട കാഴ്ചകൾ ഹൃദയഭേദകമായിരുന്നു. സാരിയിൽ തൂങ്ങിമരിച്ച നിലയിലായിരുന്നു സ്മിതയുടെ മൃതദേഹം.
”സ്മിതയുടെ ആത്മഹത്യാവാർത്ത അറിഞ്ഞ് ഞാൻ അവരുടെ വീട്ടിലെത്തി. സാരിയിൽ തൂങ്ങിമരിച്ച നിലയിലായിരുന്നു സ്മിത. മരിച്ചിട്ടും അവരുടെ മുഖം അതുപോലെ സുന്ദരമായിരുന്നു. സാധാരണയായി തൂങ്ങിമരിക്കുമ്പോൾ നാക്ക് പുറത്തേക്ക് വരാറുണ്ട്. എന്നാൽ സ്മിതയുടെ കാര്യത്തിൽ അങ്ങനെയുണ്ടായില്ല. പണമുണ്ടെങ്കിൽ മരണത്തെ പോലും ആത്മഹത്യയാക്കി മാറ്റാൻ കഴിയും,” സബിത ജോസഫ് പറയുന്നു. സ്മിതയുടെ മരണം സംബന്ധിച്ച ദുരൂഹതകളിലേക്കാണ് ഈ വാക്കുകൾ വിരൽചൂണ്ടുന്നത്.
മൃതദേഹം പോസ്റ്റ്‌മോർട്ടത്തിനായി രാജീവ് ഗാന്ധി ഹോസ്പിറ്റലിലേക്ക് മാറ്റിയപ്പോഴുള്ള അനുഭവമാണ് അദ്ദേഹത്തെ ഏറെ വേദനിപ്പിച്ചത്.
”മൃതദേഹം ഒരു തുണികൊണ്ടുപോലും മൂടാതെയായിരുന്നു ആശുപത്രിയിലെത്തിച്ചത്. ‘ഇതൊരു വലിയ നടിയല്ലേ, ഇവരോട് ഇങ്ങനെ പെരുമാറരുത്, ഒരു തുണ്ടം തുണിയെങ്കിലും ഇട്ട് മൃതദേഹം മൂടണം’ എന്ന് ഞാൻ അവിടെയുള്ളവരോട് പറഞ്ഞു. അപ്പോൾ അവിടെയുണ്ടായിരുന്ന ചില വി.ഐ.പിമാർക്ക് അവരുടെ ശരീരത്തിൽ തൊടാനായിരുന്നു ആഗ്രഹം. സിനിമ കാണാൻ ബ്ലാക്ക് ടിക്കറ്റ് എടുക്കുന്നതുപോലെ ഒരു അവസരമായിട്ടാണ് അവർ അതിനെ കണ്ടത്,” സബിത ജോസഫ് വെളിപ്പെടുത്തി.
ജീവിതകാലം മുഴുവൻ വെള്ളിത്തിരയിൽ ആരാധകരെ സൃഷ്ടിച്ച ഒരു താരത്തിന്, മരണശേഷം പോലും അന്തസ്സോടെ യാത്രയാകാൻ സാധിച്ചില്ലെന്ന ഞെട്ടിക്കുന്ന സത്യമാണ് ഈ വെളിപ്പെടുത്തലുകളിലൂടെ പുറത്തുവരുന്നത്. സിൽക്ക് സ്മിതയുടെ മരണകാരണം ഇന്നും ഒരു ദുരൂഹമായി അവശേഷിക്കുന്നു.
