യുവതികളുമായി പ്രണയാതുരമായ സംഭാഷണങ്ങളിൽ ഏർപ്പെടുന്നുവെന്നും, ചുംബന ഇമോജികൾക്ക് മറുപടി നൽകുന്നുവെന്നുമുള്ള തെറ്റിദ്ധാരണകൾക്കെതിരെ പ്രതികരണവുമായി നടൻ ആർ. മാധവൻ. സോഷ്യൽ മീഡിയയിലെ തെറ്റായ പ്രചാരണങ്ങൾക്കെതിരെ അദ്ദേഹം ശക്തമായി പ്രതികരിച്ചു.
ചെന്നൈയിൽ നടന്ന ‘പേരന്റ് ജീനി ഇൻക്’ എന്ന ആപ്പിൻ്റെ ലോഞ്ചിംഗിലാണ് മാധവൻ തൻ്റെ പ്രതികരണം അറിയിച്ചത്. കുട്ടികളുടെ സുരക്ഷ ലക്ഷ്യമിട്ടുള്ള ഈ ലൊക്കേഷൻ അടിസ്ഥാനമാക്കിയുള്ള ആപ്പിൻ്റെ നിക്ഷേപകനും തന്ത്രപരമായ പങ്കാളിയുമാണ് അദ്ദേഹം.
സോഷ്യൽ മീഡിയയിൽ താൻ നേരിടുന്ന പ്രശ്നങ്ങളെക്കുറിച്ച് മാധവൻ സംസാരിക്കുന്ന വീഡിയോ റെഡിറ്റിൽ പ്രചരിക്കുന്നുണ്ട്. “സോഷ്യൽ മീഡിയ ഉപയോഗിക്കുമ്പോൾ കുട്ടികളുടെ സുരക്ഷ ഉറപ്പാക്കാൻ ഈ ആപ്പ് സഹായിക്കും. ഒരു ഉദാഹരണം പറയാം. ഇൻസ്റ്റാഗ്രാമിലും സോഷ്യൽ മീഡിയയിലും നിരവധി പേർ എനിക്ക് മെസ്സേജ് അയക്കാറുണ്ട്. ഒരു യുവതി എനിക്ക് അയച്ച മെസ്സേജ് ഇങ്ങനെയായിരുന്നു. ‘ഞാൻ ഈ സിനിമ കണ്ടു. എനിക്ക് ഒരുപാട് ഇഷ്ടപ്പെട്ടു. നിങ്ങൾ മികച്ച നടനാണ്. നിങ്ങൾ എന്നെ പ്രചോദിപ്പിക്കുന്നു.’ മെസ്സേജിൻ്റെ അവസാനം നിരവധി ഹൃദയങ്ങളും ചുംബന ഇമോജികളും ഉണ്ടായിരുന്നു,” മാധവൻ പറഞ്ഞു.
“ഇത്രയധികം വിശദമായി സംസാരിക്കുന്ന ഒരു ആരാധകന് മറുപടി നൽകാൻ ഞാൻ നിർബന്ധിതനാകുന്നു. ഞാൻ എപ്പോഴും നന്ദി പറയുകയും ദൈവം അനുഗ്രഹിക്കട്ടെ എന്ന് പറയുകയും ചെയ്യും. അവൾ എൻ്റെ മറുപടിയുടെ സ്ക്രീൻഷോട്ട് എടുത്ത് ഇൻസ്റ്റാഗ്രാമിൽ പോസ്റ്റ് ചെയ്യും. ആളുകൾ എന്താണ് കാണുന്നത്? ഹൃദയങ്ങളും ചുംബനങ്ങളും സ്നേഹത്തിൻ്റെ ചിഹ്നങ്ങളും. മാഡി യുവതികളുമായി സംസാരിക്കുന്നുവെന്ന് ആളുകൾ കരുതും. എൻ്റെ ഉദ്ദേശം അതായിരുന്നില്ല. അവളുടെ മെസ്സേജിന് മറുപടി നൽകുക മാത്രമായിരുന്നു. എന്നാൽ ചെറിയ കാര്യങ്ങൾ മാത്രം കാണുമ്പോൾ ‘മാഡി യുവതികളുമായി സംസാരിക്കുന്നു’ എന്ന് ആളുകൾ തെറ്റിദ്ധരിക്കും. എനിക്ക് പോലും സോഷ്യൽ മീഡിയയിൽ ഒരു മെസ്സേജ് ഇടുമ്പോൾ ഇങ്ങനെ ഓരോ കാര്യങ്ങളും ശ്രദ്ധിക്കേണ്ടി വരുന്നു. എൻ്റെ അനുഭവപരിചയമില്ലാത്ത ഒരാൾക്ക് എത്ര ബുദ്ധിമുട്ടുണ്ടാകുമെന്ന് ആലോചിച്ചു നോക്കൂ,” മാധവൻ കൂട്ടിച്ചേർത്തു.
അടുത്തിടെ പുറത്തിറങ്ങിയ ‘ഹിസാബ് ബരാബർ’ എന്ന ചിത്രത്തിലാണ് മാധവൻ അവസാനമായി അഭിനയിച്ചത്. ബാങ്ക് തട്ടിപ്പുകളെക്കുറിച്ചുള്ള കഥയാണ് ചിത്രം പറയുന്നത്. ‘അതിർഷടശാലി’, ‘ടെസ്റ്റ്’ എന്നീ തമിഴ് ചിത്രങ്ങളിലും ‘അമേരിക്കി പണ്ഡിറ്റ്’, ‘ദേ ദേ പ്യാർ ദേ 2’, ‘കേസരി ചാപ്റ്റർ 2’, ‘ധുരന്ധർ’ എന്നീ ഹിന്ദി ചിത്രങ്ങളിലും മാധവൻ അഭിനയിക്കുന്നുണ്ട്.
