“ഈശ്വരാ, ഇയാൾ നമ്മുടെ വീട്ടിലും ഡ്രൈവർ ആയിരുന്നില്ലേ” പൾസർ സുനി തൻ്റെ ഡ്രൈവർ ആയിരുന്നു എന്നും അയാളെ പറഞ്ഞു വിടാനുണ്ടായ സാഹചര്യത്തെ കുറിച്ചും സീരിയൽ താരം ആൻ പറഞ്ഞത് ഇങ്ങനെ ,ഒപ്പം കല്യാണ രാമനിലെ ആ മുഖം സുനിയോ ?

നടിയെ ആക്രമിച്ച കേസിൽ നിർണായകമായ വിധി വന്നതിന് പിന്നാലെ, കേസിലെ ഒന്നാം പ്രതിയായ പൾസർ സുനിയെക്കുറിച്ചുള്ള ഞെട്ടിക്കുന്ന വെളിപ്പെടുത്തലുകൾ വീണ്ടും ചർച്ചയാവുകയാണ്. കുറ്റക്കാരനെന്ന് കണ്ടെത്തി 20 വർഷത്തെ തടവുശിക്ഷ ലഭിച്ച സുനിയുടെ ക്രിമിനൽ പശ്ചാത്തലം പല സിനിമാതാരങ്ങൾക്കും നേരത്തെ തന്നെ അറിയാമായിരുന്നു എന്ന സൂചനകളാണ് പുറത്തുവരുന്നത്. ഇപ്പോഴിതാ, തന്റെ വീട്ടിലും സുനി ഡ്രൈവറായി ജോലി ചെയ്തിരുന്നുവെന്ന നടി ആൻ മരിയയുടെ വാക്കുകൾ കേട്ട് അമ്പരന്നിരിക്കുകയാണ് സോഷ്യൽ മീഡിയ.

ആ മുഖം ടിവിയിൽ കണ്ടപ്പോൾ ഭയം തോന്നി”

നടിയെ ആക്രമിച്ച വാർത്ത പുറത്തുവന്നപ്പോൾ പ്രതിസ്ഥാനത്ത് കണ്ട മുഖം തന്നെ ഭയപ്പെടുത്തിയെന്ന് ആൻ മരിയ പറയുന്നു. മാധ്യമങ്ങളിൽ പൾസർ സുനിയുടെ ചിത്രം കണ്ടപ്പോഴാണ്, “ഈശ്വരാ, ഇയാൾ നമ്മുടെ വീട്ടിലും ഡ്രൈവർ ആയിരുന്നില്ലേ” എന്ന് താൻ ഞെട്ടലോടെ ഓർത്തതെന്ന് നടി വെളിപ്പെടുത്തി. ഒരു ഏജൻസി വഴിയാണ് സുനി ആൻ മരിയയുടെ വീട്ടിൽ ജോലിക്കെത്തുന്നത്. സുനി എന്ന പേര് മാത്രമേ അന്ന് അറിയുമായിരുന്നുള്ളൂ.

എന്നാൽ, വെറും കുറച്ചുദിവസങ്ങൾ കൊണ്ട് തന്നെ ഇയാളുടെ പെരുമാറ്റത്തിൽ അസ്വാഭാവികതകൾ ആൻ മരിയയ്ക്ക് അനുഭവപ്പെട്ടു. സ്വഭാവം ഒട്ടും ശരിയല്ലെന്ന് തോന്നിയതോടെ ഒട്ടും വൈകാതെ തന്നെ ദേഷ്യപ്പെട്ട് അയാളെ പറഞ്ഞുവിടുകയായിരുന്നു. “അന്ന് ശകാരിച്ചാണ് പറഞ്ഞുവിട്ടത്. അടികൊടുക്കേണ്ട സാഹചര്യമൊന്നും ഉണ്ടായില്ലെങ്കിലും, കാര്യങ്ങൾ കൈവിട്ടുപോകുമെന്ന് തോന്നിയപ്പോൾ തന്നെ ഒഴിവാക്കി,” ആൻ മരിയ പറഞ്ഞു. പിന്നീട് ഇയാളുടെ ക്രിമിനൽ ചരിത്രം വാർത്തകളിലൂടെ അറിഞ്ഞപ്പോൾ, സ്വന്തം വീട്ടിൽ ഇങ്ങനെയൊരാൾ ജോലിക്ക് നിന്നല്ലോ എന്നോർത്ത് വലിയ ഭയം തോന്നിയെന്നും നടി കൂട്ടിച്ചേർത്തു.

മുകേഷും ഒഴിവാക്കിയിരുന്നു

ആൻ മരിയ മാത്രമല്ല, നടനും എംഎൽഎയുമായ മുകേഷും സമാനമായ അനുഭവം പങ്കുവെച്ചിരുന്നു. മുകേഷിന്റെ ഡ്രൈവറായി ജോലി ചെയ്യുമ്പോഴും മോശം പെരുമാറ്റത്തിന്റെ പേരിൽ സുനിയെ ജോലിയിൽ നിന്ന് പിരിച്ചുവിടുകയായിരുന്നു. സിനിമാ ലൊക്കേഷനുകളിലും പ്രൊഡക്ഷൻ കമ്പനികളിലുമെല്ലാം ഡ്രൈവറായി ജോലി ചെയ്ത സുനിക്ക് പല പ്രമുഖരുമായും അടുത്ത ബന്ധമുണ്ടായിരുന്നു എന്നത് വ്യക്തമാണ്.

ഉത്തരം കിട്ടാത്ത ചോദ്യങ്ങൾ

നടിയെ ആക്രമിക്കാൻ പോകുന്നതിന് തൊട്ടുമുമ്പ് സുനി ‘ശ്രീലക്ഷ്മി’ എന്ന പേരുള്ള ഒരു സ്ത്രീയുമായി ഫോണിൽ സംസാരിച്ചിരുന്നു. “നല്ലൊരു കാര്യം ചെയ്യാൻ പോവുകയാണ്” എന്നായിരുന്നു ഇയാൾ ഫോണിൽ പറഞ്ഞത്. എന്നാൽ ആരാണ് ഈ ശ്രീലക്ഷ്മി? ഇവരെ എന്തുകൊണ്ട് പോലീസ് സാക്ഷിപ്പട്ടികയിൽ ചേർത്തില്ല? തുടങ്ങിയ ചോദ്യങ്ങൾ ഇപ്പോഴും ബാക്കിയാണ്. അതുപോലെ തന്നെ സുനി തുടക്കത്തിൽ വെളിപ്പെടുത്തിയ ആ ‘മാഡം’ ആരാണെന്നതും ഇതുവരെ കണ്ടെത്താനായിട്ടില്ല. ഇക്കാര്യത്തിൽ കോടതിയും അന്വേഷണ സംഘത്തെ വിമർശിച്ചിരുന്നു.

കല്യാണരാമനിലെ ആ മുഖം സുനിയോ?

ഇതിനിടെ, ദിലീപ് നായകനായ ‘കല്യാണരാമൻ’ എന്ന സിനിമയിലെ ഒരു രംഗത്തിൽ പൾസർ സുനി അഭിനയിച്ചിട്ടുണ്ടെന്ന തരത്തിലുള്ള പ്രചാരണങ്ങളും സോഷ്യൽ മീഡിയയിൽ സജീവമാണ്. ആൾക്കൂട്ടത്തിനിടയിൽ നിൽക്കുന്ന ഒരാൾ സുനിയാണെന്നും, ദിലീപിന് ഇയാളെ വർഷങ്ങൾക്ക് മുൻപേ അറിയാമെന്നതിന് ഇത് തെളിവാണെന്നുമാണ് ഒരു വിഭാഗം വാദിക്കുന്നത്. എന്നാല്‍ ഇത് സുനിയായിരുന്നില്ല കൂടാതെ ദിലീപും സുനിയും ഒന്നിച്ചുനിൽക്കുന്ന ഒരു ഫോട്ടോയും പ്രചരിക്കുന്നുണ്ട്. എന്നാൽ ഇത് ഫോട്ടോഷോപ്പ് ചെയ്ത വ്യാജ ചിത്രമാണെന്നാണ് രാഹുൽ ഈശ്വർ ഉൾപ്പെടെയുള്ളവർ വാദിക്കുന്നത്. കോടതിയും അതിനെ അങ്ങനെ തന്നെയാണ് കാണുന്നത്.

എന്തായാലും, 20 വർഷത്തെ തടവുശിക്ഷ ലഭിച്ചപ്പോൾ “എനിക്ക് പ്രായമായ അമ്മയുണ്ട്, ഇളവ് വേണം” എന്ന് സുനി കോടതിയോട് അപേക്ഷിച്ചിരുന്നു. എന്നാൽ ഇത്രയും ക്രൂരമായ കുറ്റകൃത്യം ചെയ്യുമ്പോൾ ആ അമ്മയുടെ മുഖം ഓർമ്മ വന്നില്ലേ എന്നാണ് ജനങ്ങൾ തിരിച്ചുചോദിക്കുന്നത്. വിധി വന്നശേഷവും സുനിയെ ചുറ്റിപ്പറ്റിയുള്ള ദുരൂഹതകൾ അവസാനിക്കുന്നില്ലെന്ന് വ്യക്തം.