മലയാള സിനിമയുടെ ചരിത്രത്തിലെ എക്കാലത്തെയും വലിയ വിജയങ്ങളിലൊന്നായ ‘മണിച്ചിത്രത്താഴി’ന്റെ ചിത്രീകരണത്തിനിടെ നടൻ മോഹൻലാലിന്റെ അഭിനയ മികവ് കണ്ട് താൻ അക്ഷരാർത്ഥത്തിൽ അമ്പരന്നുപോയെന്ന് വെളിപ്പെടുത്തി സംവിധായകൻ ഫാസിൽ തന്നോട് പറഞ്ഞതായി സംവിധായകൻ സത്യൻ അന്തിക്കാട് പറയുന്നു . നീണ്ട സംഭാഷണങ്ങളുള്ള ഒരു രംഗം ചിത്രീകരിക്കുന്നതിനിടെ മോഹൻലാൽ എന്ന നടന്റെ അഭിനയ പ്രതിഭയുടെ ആഴം തനിക്ക് നേരിട്ട് ബോധ്യപ്പെട്ടുവെന്നും, ആ അനുഭവമാണ് സിനിമയുടെ വിജയത്തിൽ നിർണായകമായതെന്നും അദ്ദേഹം തന്നോട് പറഞ്ഞിരുന്നതായി ഒരു അഭിമുഖത്തിൽ സത്യൻ അന്തിക്കാട് ഓർത്തെടുത്തു.
അപ്രതീക്ഷിത നിമിഷങ്ങൾ
സിനിമയിലെ ഒരു സുപ്രധാന രംഗത്തിന്റെ ചിത്രീകരണം നടക്കുന്ന സന്ദർഭമായിരുന്നു അത്. ഏറെ നീളമുള്ള സംഭാഷണങ്ങൾ മോഹൻലാലിന്റെ കഥാപാത്രമായ ഡോ. സണ്ണിക്ക് ആ രംഗത്തിൽ പറയണമായിരുന്നു. ” ഗംഗയോ നകുലനോ ആരെങ്കിലുമേ ഉണ്ടാകു ഗംഗയെ …” ആ രംഗമാണ് എടുക്കുന്നത്. ഷോട്ട് എടുത്തപ്പോൾ, സംഭാഷണങ്ങൾക്കിടയിൽ മോഹൻലാൽ അല്പം കൂടുതൽ സമയമെടുക്കുന്നതായി ഫാസിലിന് തോന്നി. ഡയലോഗുകൾക്കിടയിലെ ഈ നിശ്ശബ്ദത രംഗത്തിന്റെ സ്വാഭാവികതയെ ബാധിക്കുമോ എന്ന് അദ്ദേഹം സംശയിച്ചു. ഡയലോഗുകൾക്കിടയിൽ ഒരു വലിച്ചിൽ അനുഭവപ്പെട്ടു.
“ഷോട്ട് കഴിഞ്ഞ് ഞാൻ ലാലിന്റെ അടുത്തേക്ക് ചെന്നു. എന്നിട്ടു പറഞ്ഞു ഈ സീൻ നമ്മുക്ക് ഒന്നുകൂടി എടുക്കണം എന്ന് അപ്പോൾ ലാൽ ചോദിച്ചു എന്തായിരുന്നു മിസ്റ്റേക്ക് എന്ന് . എനിക്ക് ചെറിയൊരു സംശയമുണ്ടെന്നും, ഡയലോഗുകൾക്കിടയിൽ അല്പം ലാഗ് വന്നതായി തോന്നുന്നുവെന്നും പറഞ്ഞു. നമുക്ക് ഒരു ടേക്ക് കൂടി പോയാലോ എന്നും അദ്ദേഹം ചോദിച്ചു ,” ഫാസിൽ ആ നിമിഷം ഓർത്തെടുക്കുന്നു. എന്നാൽ, മോഹൻലാലിന്റെ മറുപടി തികച്ചും അപ്രതീക്ഷിതമായിരുന്നു.
കഥാപാത്രമായി മാറിയ നടൻ
ഫാസിലിന്റെ ചോദ്യത്തിന് മറുപടിയായി മോഹൻലാൽ പറഞ്ഞത് ഇങ്ങനെയായിരുന്നു: “നമുക്ക് എടുക്കാം എനിക്ക് പാച്ചിക്ക ആക്ഷൻ ‘ പറഞ്ഞതും, പിന്നീട് ‘കട്ട്’ പറഞ്ഞപ്പോൾ ആണ് ഞാൻ അതിൽ നിന്ന് മാറിയത് അതിനു ഇടയ്ക്ക് ചിലപ്പോൾ വലിഞ്ഞു പോയിട്ടുണ്ടാകാം .. അത് കേട്ടപ്പോൾ പെട്ടന്ന് ഫാസിൽ പറഞ്ഞു വേണ്ട ഒന്നുകൂടി എടുക്കണ്ട എന്ന്.
ഈ മറുപടി കേട്ടതോടെ, റീടേക്ക് എന്ന തന്റെ തീരുമാനം ഫാസിൽ ഉപേക്ഷിച്ചു. പിന്നീട്, എഡിറ്റിംഗ് ടേബിളിൽ ആ രംഗം കണ്ടപ്പോഴാണ് മോഹൻലാൽ എന്ന നടന്റെ അഭിനയത്തിന്റെ മാന്ത്രികത താൻ ശരിക്കും തിരിച്ചറിഞ്ഞതെന്ന് ഫാസിൽ കൂട്ടിച്ചേർത്തു. ഓരോ നിമിഷവും അയാൾ അഭിനയിക്കുകയായിരുന്നു എന്ന് ഫാസിൽ തന്നോട് പറഞ്ഞതായി സത്യൻ അന്തിക്കാട് പറയുന്നു. ഒരു നടൻ കഥാപാത്രവുമായി അത്രയേറെ താദാത്മ്യം പ്രാപിക്കുന്ന നിമിഷത്തിൽ ഒരു സംവിധായകൻ ഇടപെടുന്നത് ശരിയല്ലെന്ന് തനിക്ക് തോന്നിയെന്ന് അദ്ദേഹം പറയുന്നു.
“അവിടെ ലാൽ ഡയലോഗ് പറയുകയായിരുന്നില്ല, അഭിനയിക്കുകയായിരുന്നു. ഓരോ വാക്കിനും, ഓരോ നോട്ടത്തിനും ഇടയിലുള്ള സൂക്ഷ്മമായ ഭാവങ്ങളെപ്പോലും അദ്ദേഹം അവിസ്മരണീയമാക്കി. ആ നിശ്ശബ്ദതകൾ പോലും അർത്ഥവത്തായിരുന്നു. അതാണ് മോഹൻലാൽ എന്ന നടന്റെ മാജിക്,” ഫാസിൽ പറയുന്നു. ഒരു നടൻ വെറും സംഭാഷണങ്ങൾ പറയുന്നതിനപ്പുറം, കഥാപാത്രത്തിന്റെ ഓരോ നിമിഷവും ജീവിച്ചു കാണിക്കുമ്പോഴാണ് ഒരു രംഗം പൂർണതയിൽ എത്തുന്നതെന്നും, മണിച്ചിത്രത്താഴിന്റെ വിജയത്തിന് പിന്നിലെ പ്രധാന ഘടകങ്ങളിലൊന്ന് മോഹൻലാലിന്റെ ഈ സമർപ്പണമാണെന്നും അദ്ദേഹം അടിവരയിട്ടു പറഞ്ഞു.
മലയാള സിനിമയുടെ ചരിത്രത്തിലെ ഒരു നാഴികക്കല്ലായി മാറിയ ‘മണിച്ചിത്രത്താഴി’ന്റെ അണിയറയിലെ ഇത്തരം അനുഭവങ്ങൾ, ആ സിനിമയെയും അതിലെ അഭിനേതാക്കളുടെ പ്രതിഭയെയും വീണ്ടും ഓർമ്മിപ്പിക്കുന്നതാണ്.
