എന്തുകൊണ്ടാണ് തങ്ങൾ ഇരുവർക്കും ഒരു കാമുകൻ മതി എന്ന് തീരുമാനിച്ചത്; ഇരട്ട സഹോദരിമാരുടെ ആരെയും അമ്പരപ്പിക്കുന്ന വെളിപ്പെടുത്തൽ

ഒരു വ്യക്തിക്ക് സ്വന്തമായി ഒരു ജീവിതവും പങ്കാളിയും ഉണ്ടായിരിക്കുക എന്നത് തികച്ചും സ്വാഭാവികമായ കാര്യമാണ്. എന്നാൽ തങ്ങളുടെ ജീവിതത്തിലെ സകല കാര്യങ്ങളും, എന്തിന് ഒരു കാമുകനെ വരെ പരസ്പരം പങ്കിടുന്ന ഇരട്ട സഹോദരിമാരെക്കുറിച്ച് നിങ്ങൾ കേട്ടിട്ടുണ്ടോ? ലോകത്തിലെ ഏറ്റവും സമാനതകളുള്ള ഇരട്ട സഹോദരിമാർ (Identical twins) എന്ന വിശേഷണമുള്ള ഓസ്ട്രേലിയയിലെ പെർത്തിൽ നിന്നുള്ള അന്ന, ലൂസി ഡെസിൻക്യൂ (Anna and Lucy DeCinque) എന്ന സഹോദരിമാരാണ് തങ്ങളുടെ അത്യന്തം വിചിത്രമായ ജീവിതശൈലിയിലൂടെ വീണ്ടും ലോകശ്രദ്ധ ആകർഷിക്കുന്നത്.

പരസ്പരം പിരിഞ്ഞിരിക്കാൻ കഴിയാത്തവിധം അത്രയധികം മാനസികവും ശാരീരികവുമായ അടുപ്പമുള്ളവരാണ് ഇവർ. ഒരേ വസ്ത്രങ്ങൾ ധരിക്കുക, ഒരേ അളവിൽ ഭക്ഷണം കഴിക്കുക എന്നതിലുപരി, തങ്ങൾ രണ്ടുപേരും യഥാർത്ഥത്തിൽ ഒറ്റ വ്യക്തിയാണെന്നാണ് ഈ സഹോദരിമാർ വിശ്വസിക്കുന്നത്. ശരീരഭാരത്തിൽ പോലും ഒരൽപ്പം വ്യത്യാസം വരാൻ ഇവർ സമ്മതിക്കാറില്ല. തങ്ങൾക്കിടയിൽ ചെറിയൊരു അകലം പോലും ഉണ്ടാകാൻ ഇവർ തയ്യാറല്ല എന്നതാണ് സത്യം. ബാത്റൂമിൽ പോകുമ്പോഴും കുളിക്കുമ്പോഴും എന്തിന് എവിടേക്ക് യാത്ര ചെയ്യുമ്പോഴും ഇവർ ഒരുമിച്ചാണ് ഉണ്ടാകാറുള്ളത്. പരസ്പരം പിരിഞ്ഞിരിക്കുമ്പോൾ ഉണ്ടാകുന്ന കടുത്ത ‘സെപ്പറേഷൻ ആങ്സൈറ്റി’ (separation anxiety) മൂലം തങ്ങൾക്ക് തനിച്ചൊരു ജീവിതമില്ലെന്നാണ് ഇവർ ആവർത്തിച്ചു വ്യക്തമാക്കുന്നത്.

ഈ അപൂർവ്വ കൂട്ടുകെട്ടിന്റെ ഏറ്റവും ചർച്ച ചെയ്യപ്പെട്ട വിഷയം, ഇവർ രണ്ടുപേരും ചേർന്ന് ബെൻ ബൈർൺ (Ben Byrne) എന്ന ഇലക്ട്രീഷ്യനായ യുവാവിനെ ഒരേസമയം കാമുകനായി പങ്കിട്ടെടുക്കുന്നു എന്നതാണ്. കഴിഞ്ഞ പത്ത വർഷത്തിലേറെയായി ഇവർ മൂവരും ഒരേ വീട്ടിൽ, ഒരേ കിടക്കയിലാണ് ജീവിക്കുന്നത്. തങ്ങളുടെ മുൻകാല ബന്ധങ്ങളെല്ലാം പരാജയപ്പെടാൻ കാരണം പങ്കാളികൾക്ക് തങ്ങളുടെ ഈ പ്രത്യേകത ഉൾക്കൊള്ളാൻ കഴിയാത്തതുകൊണ്ടാണെന്ന് ഇവർ പറയുന്നു. എന്നാൽ ബെൻ തങ്ങളുടെ ഈ അസാധാരണമായ ബന്ധത്തെ യാതൊരുവിധ മുൻവിധികളോ അസൂയയോ ഇല്ലാതെ അംഗീകരിക്കുകയായിരുന്നു.

ടി.എൽ.സി (TLC) ചാനലിലെ ‘എക്സ്ട്രീം സിസ്റ്റേഴ്സ്’ (Extreme Sisters) എന്ന റിയാലിറ്റി ഷോയിലൂടെയാണ് ഇവർ ലോകമെമ്പാടുമുള്ള പ്രേഷകരുടെ ഇടയിൽ കൂടുതൽ ശ്രദ്ധ നേടിയത്. സമൂഹത്തിന്റെ ഭാഗത്തുനിന്ന് കടുത്ത വിമർശനങ്ങളും പരിഹാസങ്ങളും നിരന്തരം നേരിടേണ്ടി വന്നിട്ടുണ്ടെങ്കിലും, തങ്ങളുടെ ജീവിതരീതിയിൽ ഇവർക്ക് യാതൊരുവിധ കുറ്റബോധവുമില്ല. തങ്ങളെ വിമർശിക്കുന്നവരുടെ വാക്കുകൾക്ക് വില കൽപ്പക്കാതെ, തങ്ങൾക്ക് മാനസിക സന്തോഷം നൽകുന്ന ഈ വഴിയിലൂടെ മുന്നോട്ട് പോകാനാണ് ഇവർ തീരുമാനിച്ചിരിക്കുന്നത്. ഇതോടൊപ്പം, ഭാവിയിൽ ഒരേ സമയത്ത് ഗർഭം ധരിക്കണമെന്നും, തങ്ങളുടെ ശരീരഘടനയിൽ പോലും യാതൊരു മാറ്റവും വരാതിരിക്കാൻ ഐ.വി.എഫ് (IVF) ചികിത്സയിലൂടെ ഒരേസമയം കുഞ്ഞുങ്ങൾക്ക് ജന്മം നൽകണമെന്നുമാണ് ഈ സഹോദരിമാരുടെ മറ്റൊരു വിചിത്രമായ ആഗ്രഹം.

പരമ്പരാഗതമായ സാമൂഹിക സങ്കൽപ്പങ്ങളെയും സദാചാര നിയമങ്ങളെയും പൂർണ്ണമായും ചോദ്യം ചെയ്യുന്നതാണ് ഈ ഓസ്ട്രേലിയൻ സഹോദരിമാരുടെ ജീവിതം. മനുഷ്യബന്ധങ്ങളുടെ വൈവിധ്യങ്ങളും സങ്കീർണ്ണതകളും എത്രത്തോളം വിപുലമാണെന്ന് ഓർമ്മിപ്പിക്കുന്നതാണ് ഈ വാർത്ത. സമൂഹത്തിന്റെ യാതൊരുവിധ അളവുകോലുകൾക്കും വഴങ്ങാതെ സ്വന്തം സന്തോഷം മാത്രം മുൻനിർത്തി ജീവിക്കുന്ന ഇവരുടെ ശൈലിയെ അനുകൂലിച്ചും പ്രതികൂലിച്ചും ഇന്റർനെറ്റിൽ വലിയ ചർച്ചകളാണ് നടക്കുന്നത്.