കേരളത്തിലെ തിരഞ്ഞെടുപ്പ് ചൂട് ഇപ്പോൾ അതിന്റെ പാരമ്യത്തിൽ എത്തിനിൽക്കുകയാണ്. ചായക്കടകളിലും കവലകളിലുമെല്ലാം എങ്ങും വോട്ടെടുപ്പിന്റെ ചർച്ചകൾ മാത്രം. എന്നാൽ ഇത്തവണത്തെ നിയമസഭാ തിരഞ്ഞെടുപ്പിലെ ഏറ്റവും വലിയ പ്രത്യേകത എന്താണെന്ന് ചോദിച്ചാൽ, കേവലം പരമ്പരാഗത രാഷ്ട്രീയ നേതാക്കൾ തമ്മിലുള്ള പോരാട്ടം മാത്രമല്ല ഇവിടെ നടക്കുന്നത്. മറിച്ച്, സിനിമ-ടിവി മേഖലകളിൽ നിന്ന് കടന്നുവന്ന താരങ്ങൾ തമ്മിലുള്ള ചൂടേറിയ വാക്പോരുകൾ കൂടിയാണ് ഈ തിരഞ്ഞെടുപ്പിനെ കൂടുതൽ സംഭവബഹുലമാക്കുന്നത്.
ഇതിൽ ഏറ്റവും പുതിയതും ശ്രദ്ധേയവുമായ അധ്യായം തൃക്കാക്കരയിലെ എൻഡിഎ (NDA) സ്ഥാനാർത്ഥിയായ സംവിധായകൻ അഖിൽ മാരാരും, പാലക്കാട്ടെ യുഡിഎഫ് (UDF) സ്ഥാനാർത്ഥിയും നടനുമായ രമേഷ് പിഷാരടിയും തമ്മിലുള്ളതാണ്. രാഷ്ട്രീയമായ വാദപ്രതിവാദങ്ങൾക്കപ്പുറം, ഇരുവരും തമ്മിലുള്ള വ്യക്തിപരമായ ചില പ്രശ്നങ്ങളാണ് ഇപ്പോൾ മറനീക്കി പുറത്തുവന്നിരിക്കുന്നത്. പിഷാരടിയോട് തനിക്ക് വ്യക്തിപരമായി കടുത്ത ദേഷ്യമുണ്ടെന്നും, അതിന് പിന്നിൽ വർഷങ്ങൾക്ക് മുൻപ് പ്രവാസലോകത്ത് വെച്ച് നടന്ന ഒരു സംഭവമാണെന്നും യാതൊരു മറയുമില്ലാതെ തുറന്നുപറയുകയാണ് അഖിൽ മാരാർ.
കഥ തുടങ്ങുന്നത് അങ്ങ് അബുദാബിയിലാണ്. മുഖ്യമന്ത്രി പിണറായി വിജയനും, മലയാളത്തിന്റെ അഭിമാന താരങ്ങളായ മമ്മൂട്ടിയും മോഹൻലാലുമൊക്കെ അണിനിരന്ന വലിയൊരു സ്റ്റേജ് ഷോ അവിടെ നടക്കുകയായിരുന്നു. ആ വേദിയിൽ വെച്ച് മലയാളികളുടെ പ്രിയ നടൻ ജോജു ജോർജിന് കടുത്ത ഒരു അപമാനം നേരിടേണ്ടി വന്നു. പരിപാടിയിൽ പങ്കെടുക്കാൻ എത്തിയ ജോജുവിനെ സ്റ്റേജിൽ കയറ്റാതിരിക്കാൻ അണിയറയിൽ ചില കുതന്ത്രങ്ങൾ നടന്നു. ഇതിന് ചുക്കാൻ പിടിച്ചതും വൃത്തികെട്ട കളി കളിച്ചതും രമേഷ് പിഷാരടിയാണെന്നാണ് അഖിൽ മാരാർ ഗുരുതരമായ ആരോപണം ഉന്നയിക്കുന്നത്.
അന്ന് ആ വേദിയിൽ കയറാതെ ജോജു ജോർജ് ഇറങ്ങി പോയത് എന്തിനാണെന്നു നിങ്ങൾ ചോദിക്കണം എന്നും അഖിൽ മാധ്യമപ്രവർത്തകരോട് പറയുന്നുണ്ട് . ഒരു സഹപ്രവർത്തകനോട് പിഷാരടി അന്ന് കാണിച്ച ആ മോശം പ്രവൃത്തി തനിക്ക് ഇപ്പോഴും പൊറുക്കാൻ കഴിഞ്ഞിട്ടില്ലെന്ന് അഖിൽ വ്യക്തമാക്കുന്നു. അഖിലിന്റെ സിനിമാജീവിതത്തിലെ ആദ്യ ചിത്രമായ ‘ഒരു താത്വിക അവലോകന’ത്തിലെ നായകൻ ജോജു ജോർജ് ആയിരുന്നു. സ്വന്തം പ്രയത്നം കൊണ്ട് സിനിമയിൽ വളർന്നുവന്ന ജോജുവിനോടുള്ള ഈ അടുത്ത സൗഹൃദം കൂടിയാകാം അഖിലിന്റെ ഈ രൂക്ഷമായ പ്രതികരണത്തിന് പിന്നിലെ പ്രധാന കാരണം.
പാലക്കാട് മണ്ഡലത്തിൽ പോയി മത്സരിച്ച് തോൽക്കാൻ നിൽക്കുന്ന പിഷാരടിയെ താൻ എന്തിനാണ് വെറുതെ പരിഹസിക്കുന്നതെന്നാണ് അഖിൽ ചോദിക്കുന്നത്. യോഗ്യതയുള്ളവർ ആരാണെന്ന് ജനങ്ങൾ തന്നെ തീരുമാനിക്കട്ടെ എന്നും അദ്ദേഹം കൂട്ടിച്ചേർത്തു. ബിഗ് ബോസ് മലയാളം സീസൺ 5-ന്റെ കിരീടം ചൂടിയ അഖിൽ മാരാർക്ക് തന്റെ രാഷ്ട്രീയ പ്രവേശത്തെക്കുറിച്ച് പറയാനുള്ളത് മറ്റൊരു കൗതുകകരമായ കാര്യമാണ്. ബിഗ് ബോസ് പോലുള്ള റിയാലിറ്റി ഷോകളിൽ നൂറ് ദിവസം അടച്ചുപൂട്ടി കിടന്ന് മത്സരിക്കുന്നതിനേക്കാൾ എത്രയോ എളുപ്പമാണ് തനിക്ക് ജനങ്ങൾക്കിടയിലുള്ള രാഷ്ട്രീയമെന്ന് അദ്ദേഹം പറയുന്നു. ബിഗ് ബോസ് വീട്ടിൽ തന്റെ കടുത്ത എതിരാളിയായിരുന്ന ഡോ. റോബിൻ രാധാകൃഷ്ണനുമായി ഇപ്പോൾ യാതൊരു പ്രശ്നവുമില്ലെന്നും അദ്ദേഹം വ്യക്തമാക്കി. ഷോ കഴിഞ്ഞപ്പോൾ അവിടെയുണ്ടായിരുന്ന ശത്രുതയും കഴിഞ്ഞു. ഇരുവരും പിന്നീട് ദുബായിൽ ഒരു പരിപാടിയിൽ ഒന്നിച്ച് സന്തോഷത്തോടെ പങ്കെടുക്കുകയും ചെയ്തിരുന്നു.
പലരും സിനിമയിൽ വലിയ താരമായി തിളങ്ങി നിൽക്കുമ്പോൾ രാഷ്ട്രീയത്തിലേക്ക് വരുമ്പോൾ, അഖിലിന്റെ ചിന്താഗതി നേരെ തിരിച്ചാണ്. തനിക്ക് രാഷ്ട്രീയത്തിൽ വരാനും, സമൂഹത്തോട് ആശയങ്ങൾ സംവദിക്കാനുമുള്ള ഒരു മികച്ച മാധ്യമം മാത്രമായിരുന്നു സിനിമ. ഒരു സംവിധായകൻ എന്ന നിലയിൽ അത്യാവശ്യം ശ്രദ്ധിക്കപ്പെട്ടതുകൊണ്ടാണ് തനിക്കിപ്പോൾ ജനങ്ങളെ സേവിക്കാൻ ഒരവസരം ലഭിച്ചത്. തിരഞ്ഞെടുപ്പ് കഴിഞ്ഞാൽ ഉടനെ സിനിമയിലേക്ക് മടങ്ങാൻ തനിക്ക് യാതൊരു ഉദ്ദേശവുമില്ല. സമൂഹത്തോട് ഉറക്കെ പറയേണ്ട ഗൗരവമുള്ള രാഷ്ട്രീയ വിഷയങ്ങൾ ഉണ്ടെങ്കിൽ മാത്രമേ ഇനി ക്യാമറയ്ക്ക് പിന്നിലേക്ക് താൻ പോകുകയുള്ളൂവെന്ന് അദ്ദേഹം ഉറപ്പിച്ചു പറയുന്നു. തൃക്കാക്കരയിൽ മാറാത്തതൊക്കെ മാരാര് മാറ്റും എന്ന ആത്മവിശ്വാസത്തിലാണ് അദ്ദേഹം.
ഇന്നത്തെ കാലത്ത് തിരഞ്ഞെടുപ്പിൽ ജയിക്കാൻ കോടികൾ മുടക്കി പി.ആർ (PR) ഏജൻസികളെ വെക്കുന്നതാണ് പലരുടെയും പതിവ് രീതി. എന്നാൽ തന്നെ സമീപിച്ച പല വമ്പൻ പി.ആർ കമ്പനികളെയും താൻ സ്നേഹത്തോടെ തിരിച്ചയച്ചുവെന്ന് അഖിൽ വെളിപ്പെടുത്തുന്നു. സാധാരണക്കാരായ ജനങ്ങൾക്ക് കൃത്യമായ രാഷ്ട്രീയ ബോധമുണ്ടെന്നും, അവരെ സ്വാധീനിക്കാൻ ഇത്തരം കൃത്രിമമായ പി.ആർ വർക്കുകളുടെ യാതൊരു ആവശ്യവുമില്ലെന്നുമാണ് അദ്ദേഹത്തിന്റെ ഉറച്ച വിശ്വാസം.
ഏതായാലും, അഖിൽ മാരാരും രമേഷ് പിഷാരടിയും തമ്മിലുള്ള ഈ വാക്പോര് തിരഞ്ഞെടുപ്പ് ഗോദയിൽ വലിയ ചർച്ചയായി മാറിയിട്ടുണ്ട്. ഒരുകാലത്ത് റിയാലിറ്റി ഷോയിൽ തന്ത്രങ്ങൾ മെനഞ്ഞ അഖിൽ, ഇപ്പോൾ ജനകീയ കോടതിയിൽ വോട്ട് ചോദിക്കുകയാണ്. ഈ താരപോരാട്ടത്തിൽ ആർക്കാണ് വിജയം വരിക്കാൻ സാധിക്കുകയെന്ന് തിരഞ്ഞെടുപ്പ് ഫലം വരുമ്പോൾ നമുക്ക് കാത്തിരുന്ന് കാണാം.
