നിതേഷ് തിവാരി സംവിധാനം ചെയ്യുന്ന ബ്രഹ്മാണ്ഡ ബോളിവുഡ് ചിത്രമായ ‘രാമായണ’ത്തിന്റെ സെറ്റിൽ നിന്നുള്ള ചില ചിത്രങ്ങൾ അടുത്തിടെയാണ് സമൂഹമാധ്യമങ്ങളിൽ ചോർന്നത്. സാക്ഷാൽ ശ്രീരാമനായി രൺബീർ കപൂറും, സീതാദേവിയായി തെന്നിന്ത്യയുടെ പ്രിയതാരം സായ് പല്ലവിയുമാണ് ആ ചിത്രങ്ങളിലുണ്ടായിരുന്നത്. എന്നാൽ ഈ ചിത്രങ്ങൾ പുറത്തുവന്നതിന് പിന്നാലെ ഇൻ്റർനെറ്റിൽ വലിയൊരു ചർച്ചയ്ക്കും തുടക്കമായി. എന്നാൽ ഇപ്പോൾ ചിത്രത്തിന്റെ ട്രെയ്ലർ പുറത്തു വന്നതോടെ വീണ്ടും അത് കൂടിയിരിക്കുകയാണ്. സായി പല്ലവിയുടെ കാസിറ്റിംഗ് ശെരിയായിരുന്നില്ല എന്ന വാദമാണ് പലരും മുന്നോട്ട് വക്കുന്നത്. ഗ്ലാമർ ലോകത്തിന് മാത്രം പരിചിതമായ ബോളിവുഡിലെ ഒരുവിഭാഗം സിനിമാ പ്രേമികൾ ചോദിക്കുന്നത് ഒറ്റ ചോദ്യമാണ്; “സീതയാകാൻ സായ് പല്ലവിക്ക് ആവശ്യത്തിന് സൗന്ദര്യമുണ്ടോ?”
സിനിമയിലെ നായികമാർ എന്നാൽ വെളുത്ത് തുടുത്തവരും, വിദേശികളെപ്പോലെ തോന്നിക്കുന്നവരും, കിലോക്കണക്കിന് മേക്കപ്പ് ഉപയോഗിക്കുന്നവരുമാകണം എന്ന കാലാകാലങ്ങളായുള്ള ഒരു അലിഖിത നിയമം ബോളിവുഡിലുണ്ട്. എന്നാൽ ഇന്ത്യയുടെ സിനിമാ ചരിത്രത്തിൽ ഈ പൊള്ളയായ സൗന്ദര്യ സങ്കൽപ്പങ്ങളെ അതിന്റേതായ അർത്ഥത്തിൽ പൊളിച്ചടുക്കിയ ഒരു നടിയുണ്ടെങ്കിൽ അത് സായ് പല്ലവിയായിരിക്കും.
മലയാളികളുടെ സ്വന്തം ‘മലർ മിസ്സ്’
മലയാളികളെ സംബന്ധിച്ചിടത്തോളം സായ് പല്ലവിയുടെ സൗന്ദര്യത്തെക്കുറിച്ചുള്ള ഈ ചർച്ചകൾ വലിയൊരു തമാശയാണ്. 2015-ൽ പുറത്തിറങ്ങിയ ‘പ്രേമം’ എന്ന ഒറ്റ ചിത്രം മതിയായിരുന്നു കേരളത്തിന് അവളെ നെഞ്ചിലേറ്റാൻ. മുഖക്കുരു മറയ്ക്കാതെ, മേക്കപ്പിന്റെ അതിപ്രസരമില്ലാതെ, വളരെ സ്വാഭാവികമായി ക്യാമറയ്ക്ക് മുന്നിലെത്തിയ ആ ‘മലർ മിസ്സിനെ’ മലയാളികൾക്ക് എങ്ങനെ മറക്കാനാകും? അഭിനയം എന്നത് മുഖത്ത് തേച്ചുപിടിപ്പിക്കുന്ന ചമയങ്ങളിലല്ല, മറിച്ച് കണ്ണുകളിലെ ഭാവങ്ങളിലാണെന്ന് അവർ അന്നേ തെളിയിച്ചതാണ്.
കോടികൾ വലിച്ചെറിഞ്ഞ ആത്മവിശ്വാസം
“മതിയായ സൗന്ദര്യമില്ല” എന്ന് പറഞ്ഞ് ഇപ്പോൾ അവളെ വിമർശിക്കുന്നവർക്ക് ഒരുപക്ഷേ സായ് പല്ലവി ആരാണെന്ന് പൂർണ്ണമായും അറിയാനിടയില്ല. തന്റെ കരിയറിന്റെ തുടക്കത്തിൽ തന്നെ ഒരു പ്രമുഖ ഫെയർനെസ്സ് ക്രീം (Fairness Cream) കമ്പനിയുടെ പരസ്യത്തിൽ അഭിനയിക്കാനായി വന്ന രണ്ട് കോടി രൂപയുടെ വമ്പൻ ഓഫർ നിരസിച്ച വ്യക്തിയാണവർ. “ഇന്ത്യക്കാരെന്ന നിലയിൽ നമ്മുടെ നിറം ഇതാണ്. വെളുക്കാൻ വേണ്ടി കെമിക്കലുകൾ തേച്ച് പിടിപ്പിക്കുന്നതിൽ എനിക്ക് യാതൊരു താല്പര്യവുമില്ല. ഈ ലഭിക്കുന്ന കോടികൾ കൊണ്ട് ഞാനെന്ത് ചെയ്യാനാണ്? ഞാൻ വീട്ടിൽപ്പോയി എനിക്ക് വേണ്ട ഭക്ഷണം കഴിക്കുന്നു, സന്തോഷമായി ഉറങ്ങുന്നു,” ഇതായിരുന്നു അന്ന് അവർ നൽകിയ മറുപടി. നിറമല്ല, മറിച്ച് ആത്മവിശ്വാസമാണ് ഒരു വ്യക്തിയുടെ യഥാർത്ഥ സൗന്ദര്യം എന്ന് സ്വന്തം ജീവിതത്തിലൂടെ അവർ ഉറക്കെ പ്രഖ്യാപിച്ചു.
അഭിനയശേഷിക്ക് മുന്നിൽ മറ്റെല്ലാം വഴിമാറും
സൗന്ദര്യമെന്നത് കേവലം ബാഹ്യമായ ഒന്നാണെന്ന് വിശ്വസിക്കുന്നവർക്ക് സായ് പല്ലവിയുടെ ആഴത്തിലുള്ള അഭിനയ പ്രതിഭ മനസ്സിലാകാൻ ബുദ്ധിമുട്ടായിരിക്കും. ‘ശ്യാം സിംഗ റോയ്’, ‘ഗാർഗി’, ‘ഫിദ’ തുടങ്ങിയ ചിത്രങ്ങളിലെ അവരുടെ പ്രകടനം മാത്രം മതി ആ പ്രതിഭയുടെ ആഴം അളക്കാൻ. സീത എന്ന ഇതിഹാസ കഥാപാത്രത്തിന് ആവശ്യമായ ശാന്തതയും, സ്നേഹവും, അതേസമയം ഉള്ളിലെ അതിയായ ആത്മധൈര്യവും പ്രതിഫലിപ്പിക്കാൻ സായ് പല്ലവിയോളം മികച്ച മറ്റൊരു നടി ഇന്ന് ഇന്ത്യയിലുണ്ടോ എന്നത് സംശയമാണ്.
പ്ലാസ്റ്റിക് സർജറികളുടെയും ആർട്ടിഫിഷ്യൽ ഇന്റലിജൻസിന്റെയും ഇക്കാലത്ത്, തന്റേതായ സ്വാഭാവിക സൗന്ദര്യം കൊണ്ട് തിളങ്ങാൻ ധൈര്യം കാണിക്കുന്ന സായ് പല്ലവിയെ നാം അഭിനന്ദിക്കുകയാണ് വേണ്ടത്. ഗ്ലാമർ വേഷങ്ങളുടെയും ഐറ്റം ഡാൻസുകളുടെയും ലോകത്ത് നിന്ന് വരുന്ന ചില ബോളിവുഡ് ആരാധകർക്ക് സായ് പല്ലവിയുടെ ഈ തനിമ ഉൾക്കൊള്ളാൻ കഴിഞ്ഞെന്ന് വരില്ല. എന്നാൽ, ‘രാമായണം’ തിയേറ്ററുകളിൽ എത്തുമ്പോൾ, സീതയാകാൻ വേണ്ടത് കൃത്രിമമായ സൗന്ദര്യമല്ല, മറിച്ച് അഭിനയശേഷിയും ആത്മാർത്ഥതയുമാണെന്ന് അവർ തൻ്റെ വിമർശകർക്ക് മുന്നിൽ സ്വയം തെളിയിക്കും. സൗന്ദര്യത്തിന്റെ പുതിയ വ്യാകരണങ്ങൾ രചിക്കുകയാണ് ഈ തെന്നിന്ത്യൻ നായിക.
